މާފުށީ ބިން ހިއްކުމުގެ މަޝްރޫޢު ތަޖުރިބާކޮށްލުމުގެ ފުރުޞަތު އެމް.އެންޔޫގައި އިންޖިނިއަރިންގ ކިޔަވާ ދަރިވަރުންނަށް!
ކ. މާފުށީ ބިން ހިއްކުމުގެ މަޝްރޫޢުގެ މަސައްކަތްތައް ކުރިއަށްދާގޮތް ތަޖުރިބާކޮށްލުމުގެ ފުރުޞަތު ދިވެހިރާއްޖޭގެ ޤައުމީ ޔުނިވަރސިޓީގައި އިންޖިނިއަރިންގ ކިޔަވާ ދަރިވަރުންނަށް ދީފިއެވެ.
އެމް.ޓީ.ސީ.ސީގެ ފަރާތުން މި ފުރުޞަތު ދީފައިވަނީ އެކުންފުނިން ފަށާފައިވާ "ޑިސްކަވަރ އެމް.ޓީ.ސީ.ސީ" ޕްރޮގްރާމުގެ ދަށުންނެވެ.
މޯލްޑިވްސް ޓްރާންސްޕޯޓް އެންޑް ކޮންޓްރެކްޓިންގ ކޮމްޕެނީ، އެމް.ޓީ.ސީ.ސީއަކީ އާއްމު ދަތުރުފަތުރުގެ ޚިދުމަތް ފޯރުކޮށްދިނުމުގެ އިތުރުން ސަރުކާރުން ހިންގާ ޢުމްރާނީ ތަރައްޤީގެ މަޝްރޫޢުތައް ކުރިއަށްގެންދިއުމުގައިވެސް މުހިއްމު ދަޢުރެއް އަދާކުރާ ކުންފުންޏެކެވެ. އަހަރެއްގެ މައްޗަށް އެތައް މަޝްރޫޢުތަކެއް އެމް.ޓީ.ސީ.ސީގެ ބެލުމުގެ ދަށުން ރާއްޖޭގެ އެކި ސަރަޙައްދުތަކުގައި ކުރިއަށްދެއެވެ. މީގެ ތެރޭގައި ރަށްރަށް ދިމާވެފައިވާ ލަފާފުރުމުގެ ދަތިކަން ހައްލުކުރުމުގެ ގޮތުން ބަނދަރު ހެދުމާއި، ބިމުގެ ދަތިކަން ހައްލުކުރުމަށް ހިންގާ ބިން ހިއްކުމުގެ ގިނަ މަޝްރޫޢުތަކެއް ހިމެނެއެވެ.
އެމް.ޓީ.ސީ.ސީން ހިންގާ ތަފާތު މަޝްރޫޢުތަކާގުޅޭ މަޢުލޫމާތު މަތީ ތަޢުލީމު ހާސިލްކުރާ ދަރިވަރުންނަށް ހިއްސާކުރުމުގެ މަޤްޞަދުގައި އެކުންފުނިން މިހާރު ވަނީ "ޑިސްކަވަރ އެމް.ޓީ.ސީ.ސީ"ގެ ނަމުގައި ޚާއްސަ ޕްރޮގްރާމެއް ފަށާފައެވެ. މި ޕްރޮގްރާމްގެ ދަށުން، ދިވެހިރާއްޖޭގެ ޤައުމީ ޔުނިވަރސިޓީގެ ދަރިވަރުން، ކ. މާފުށީގެ ބިން ހިއްކުމުގެ މަޝްރޫއުގެ ޕްރޮޖެކްޓް ސައިޓަށް ވަނީ ޒިޔާރަތްކޮށްފައެވެ.
އެމް.އެން.ޔޫގެ ދަރިވަރުންގެ މި ޒިޔާރަތުގައި މަޝްރޫޢުގެ މަސައްކަތް ކުރިއަށްދާގޮތް ބަލައި، މަޝްރޫޢޫގެ މަޢުލޫމާތު ހޯދާފައިވެއެވެ. މި ޒިޔާރަތުގައި ޔުނިވަރސީޓީގެ ފެކަލްޓީ އޮފް އިންޖިނިއަރިންގ، ސައިންސް އެންޑް ޓެކްނޮލޮޖީގެ، އިންޖިނިއަރިންގ ޑިޕާރޓްމަންޓުގެ 25 ދަރިވަރުން ބައިވެރިވެފައިވެއެވެ.
މިފަދަ ޕްރޮގްރާމެއް ހިންގުމުގެ އެންމެ ބޮޑު އަމާޒަކީ މަތީ ތަޢުލީމު ހާސިލްކުރާ ދަރިވަރުންގެ މަޢުލޫމާތު މުއްސަނދިކޮށް، އެކުންފުނީގެ މަސައްކަތްތަކާގުޅޭ މަޢުލޫމާތު ވީހާވެސް ފަސޭހަކަމާއިއެކު ފޯރުކޮށްދިނުން ކަމަށް އެމް.ޓީ.ސީ.ސީން ބުނެއެވެ. އަދި ދަރިވަރުން ތަޢުލީމު ހާސިލްކުރާ ދާއިރާތަކާ ގުޅުންހުރި ވަޒީފާގެ ފުރުސަތުތަކުގެ މަޢުލޫމާތުވެސް މިޕްރޮގްރާމްގެ ދަށުން ފޯރުކޮށްދިނުމަށް ހަމަޖެހިފައިވާކަމަށް އެކުންފުނިން ބުނެއެވެ.
ދައުލަތުގެ ބަޖެޓުން 99 މިލިއަނަށްވުރެ ގިނަ ރުފިޔާ ޚަރަދުކޮށްގެން ހިންގާ ކ. މާފުށީ ބިން ހިއްކުމުގެ މަޝްރޫޢުގެ ޢަމަލީ މަސައްކަތް އެމް.ޓީ.ސީ.ސީން ފަށާފައިވަނީ 25 ޑިސެމްބަރު 2019 ގައެވެ. މި މަޝްރޫޢަކީ މިނިސްޓްރީ އޮފް ނޭޝަނަލް ޕްލޭނިންގް އެންޑް އިންފްރާސްޓަރަކްޗަރގެ ފަރާތުން ހަވާލުކޮށްގެން، 225 ދުވަހުން ފުރިހަމަކުރުމަށް ތާވަލުކުރެވިފައިވާ މަޝްރޫޢުއެކެވެ. މި މަޝްރޫޢުގެ ދަށުން 25 ހެކްޓަރުގެ ބިން ހިއްކުމަށް ވަނީ ހަމަޖެހިފައެވެ. އަދި 1110 މީޓަރުގެ ރިވެޓްމަންޓެއް ޖެހުމަށްވެސް ވަނީ ހަމަޖެހިފައެވެ.