ހުޅުމާލޭ ބާބަކިއު ޕޮއިންޓް ހުޅުމާލެ 2ވަނަ ރުއްގަނޑު ސަރަޙައްދަށް ބަދަލުކުރުމުގެ މަސައްކަތް ކުރުމުންދާކަމަށް އެޗްޑީސީން ބުުނެފިއެވެ.
އެޗްޑީސީން މިހާރު ގެންދަނީ ބާބަކިއު ހެދުމަށް ބޭނުންވާ ވަސީލަތްތައް އެ ސަރަޙައްދަށް ބަދަލުކުރުމުގެ މަސައްކަތް ކުރަމުންނެވެ.
ކުރިން ހުޅުމާލެ ބާބަކިއު އޭރިއާގެ ގޮތުގައި ބޭނުންކުރަމުން އައީ ހުޅުމާލޭ ފޭސް އެކަކާއި ދޭއް ގުޅޭ ސަރަހައްދުގެ ގޮނޑުދަޮށެވެ. ނަމަވެސް އެތަނުގައި އިމާރާތްކުރުމުގެ މަސައްކަތްތަކެއް ކުރަމުންދާތީ މިމަހުގެ 18ވަނަ ދުވަހުން ފެށިގެން ބާބަކިއު ޕޮއިންޓް ވަނީ ބަންދުކޮށްފައެވެ.
ނަމަވެސް ޚިދުމަތް މުޅިން ހުއްޓާލުމުގެ ބަދަލުގައި، އެޗްޑީސީން މިހާރުގެންދަނީ ބާބަކިއު އޭރިއާ ހުޅުމާލެ ރުއްގަނޑު ދޭއް ސަރަހައްދަށް ބަދަލުކުރުމުގެ މަސައްކަތް ކުރަމުންނެވެ.
ރުއްގަނޑު 2 ސަރަޙައްދަކީ ހުޅުމާލޭގައި މީހުން ދިރިއުޅޭ ފްލެޓްތަކާއިވެސް ކައިރި ސަރަޙައްދެކެވެ. އަދި މޫދަށް އެރޭ ޓްރެކްކާއި، އާއްމު ފާޚަނަތައްވެސް ހުޅުމާލެ ރުއްގަޑު 2 ސަރަޙައްދުގައި އެޗްޑީސިންވަނީ ހަދާފައެވެ.
ބާބަކިއު އޭރިއާގެ މަސައްކަތް ނިންމައި އަލުން ބޭނުންކުރަން ފަށާނެ ވަކި އިރެއް އެޗްޑީސީން ބުނެފައެއް ނުވެއެވެ.
ހުޅުމާލޭގެ ބާބަކިއު އޭރިއާ ބަންދުކޮށްފައި ވަނީ ހުޅުމާލޭގެ ފޭސް 1 އާއި ފޭސް 2 ގެ ދެމެދުން ކަނޑާފައިވާ ކޯރު ތަރައްޤީކުރުމަށެވެ.
ކޯރުގެ ލޭންޑް ސްކޭޕިންގ މަސައްކަތްކުރުމަށް މިހާރުވަނީ މުޅި އެ ސަަރައްޙައްދު އެއްކޮށް ބަންދުކޮށްފައެވެ. އަދި އެ ސަރަޙައްދުގައި އާއްމުން އަޅާފައިވާ ޑިންގިތައްވެސް މިހާރުވަނީ އެ ސަރަޙައްދުން އެހެން ސަރަޙައްދަކަށް ބަދަލުކޮށްފައެވެ.
ހުޅުމާލޭގެ ބާބަކިއު ޕޮއިންޓަކީ ޗިއްޓީ ދުވަތަކުގައި އާއިލާއާއިއެކު ވަގުތު ހޭދަކުރުމަށް ގިނަ އަދަދެއްގެ އާއްމުން ހަރަކާތްތެރިވެ އުޅޭ ސަރަޙާއްދެކެވެ.