މޯލްޑިވްސް އެސޯސިއޭޝަން އޮފް ހިއުމަން ރިސޯސް ޕްރޮފެޝަނަލްސް (މާޕް)އިން ހިންގާ ހަރަކާތްތަކުގެ މީޑިއާ ޕަރޓްނަރެއްގެގޮތުގައި ޕަބްލިސް ސަރވިސް މީޑިއާ ޕީއެސްއެމް ހަމަޖައްސައިފިއެވެ.
މި އެއްބަސްވުމަކީ އެއް އަހަރުގެ މުއްދަތަށް އެކުލަވާލި އެއްބަސްވުމެކެވެ.
އެއްބަސްވުމުގައި މާޕްގެ ފަރާތުން ސޮއިކުރެއްވީ އެ އެސޯސިއޭޝަންގެ ރައީސް ހުސައިން އަފީފެވެ. އަދި ޕަބްލިކް ސަރވިސް މީޑިއާ (ޕީއެސްއެމް)ގެ ފަރާތުން ސޮއިކުރެއްވީ އެކުންފުނީގެ މެނޭޖިންގ ޑިރެކްޓަރ އަލީ ޚާލިދެވެ.
މި އެއްބަސްވުމުގެދަށުން އެ ޖަމިއްޔާއިން ރާވާ ހިންގާ ހަރަކާތްތަކުގެ މީޑިއާ ކަވަރޭޖް ހެދުމާއި، ޕްރޮމޯޓްކުރުން ހިމެނެއެވެ.
މާޕަކީ އިންސާނީ ވަސީލަތް ތަރައްޤީކުރުމަށް ބޭނުންވާ މަޢުލޫމާތާއި ތަމްރީން ދިނުމުގައި ފުޅާ ދާއިރާއެއްގައި މަސައްކަތްކުރާ ޖަމިއްޔާއެކެވެ.
މިއެއްބަސްވުމުގައި ސޮއިކުރެއްވުމަށްފަހު ވާހަކަދައްކަވަމުން މާޕްގެ ރައީސް ހުސައިން އަފީފް ވިދާޅުވީ މިއަހަރަށް އެ އެސޯސިއޭޝަނުން މުހިންމު ގިނަ މަސައްކަތްތަކެއް ރާވާފައިވާކަމަށެވެ. އެގޮތުން ނޭޝަނަލް އެޗް.އާރް އެންޑް އެކްސްޕޯ އާއި، ލަރނިންގ އެންޑް ޑެވެލޮޕްމަންޓް ކޮންފަރެންސް އާއި، ތޯޓް ލީޑަރ އިވެންޓްސްގެ އިތުރުންވެސް ކޯޗިންގް އާއި، ގައިޑެންސް ޕްރޮގްރާމް ހިންގުމަށް ރާވާފައިވާކަމަށެވެ.
" މާޗު 14-15އަށް އަޅުގަނޑުމެންގެ އެންމެ ބޮޑު އިވެންޓް މިއޮތީ. ނޭޝަނަލް އެޗް.އާރް އެންޑް އެކްސްޕޯ. މި އެކްސްޕޯގައި ހިއުމަން ޑިވެލޮޕްމަންޓްގެ ދާއިރާގައި މަސައްކަތްކުރާ 500އެއްހާ މީހުން ބައިވެރިވާނެ." ހުސައިން އަފީފް ވިދާޅުވިއެވެ.
މާޕްގެ ރައީސް ވިދާޅުވީ އެސޯސިއޭޝަންގެ މަސައްކަތްތައް ޢަމާޒުކުރަނީ މާލެ ސަރަޙައްދަށް އެކަނި ނޫންކަމަށާއި، މާޕްގެ ހަރަކާތްތަކުގައި ރާއްޖޭގެ ހުރިހާ ކަންކޮޅުތަކުގައި މަސައްކަތްކުރާ ފަރާތްތަކަށްވެސް ބައިވެރިވެވޭނެކަމަށެވެ.
އެ އެސޯސިއޭޝަނުން އިއްޔެވެސް ވަނީ އިންކަމް ޓެކުހަށް ހޭލުންތެރިކުރުމުގެ ޕްރޮގްރާމެއް ކުރިއަށްގެންގޮސްފައެވެ. މި ހަރަކާތުގައި 137 މީހުން ބައިވެރިވެފައި ވެއެވެ.