ދަރިވަރުން ތަޢުލީމު ޙާސިލްކުރަންވާނީ މާދަމާ މިޤައުމު ހިންގުމުގެ އެކި މަސްއޫލިއްޔަތުތަކާ ޙަވާލުވުމުގެ ޢަޒުމުގައިކަމަށް ނައިބުރައީސް ފައިސަލް ނަސީމް ވިދާޅުވެއްޖެއެވެ.
އެމަނިކުފާނު މިހެން ވިދާޅުވީ ޖަމާލުއްދީން ސްކޫލްގެ 35ވަނަ އަހަރީ ދުވަހުގެ މުނާސަބާގައި ބޭއްވި ޚާއްސަ އެސެމްބްލީގައި އެސްކޫލުގެ ދަރިވަރުންނާއި މުޚާތަބުކުރައްވައި ދެއްކެވި ވާހަކަފުޅުގައެވެ.
ޕްރައިމަރީ ސްކޫލެއްގެ ގޮތުގައި ޖަމާލުއްދީން ސްކޫލްގެ ކިޔެވުން ފަށާފައިވަނީ 16 ފެބްރުއައީ 1985ގައެވެ. މިސްކޫލް ނިސްބަތްވަނީ ކުޅަދާނަ އިސްމުވެރިއެއްކަމަށްވާ އައްޝައިޚު މުޙައްމަދު ޖަމާލުއްދީން ނައިބު ތުއްތުއަށެވެ. ޖަމާލުއްދީން ސްކޫލުން ތަޢުލީމުދޭތާ 35 އަހަރުފުރުން ފާހަގަކުރުމަށް ބޭއްވި ޚާއްސަ އެސެމްބްލީ ޝަރަފުވެރިކޮށްދެއްވީ ރަޢީސުލް ޖުމްހޫރިއްޔާގެނައިބު ފައިސަލް ނަސީމާއި، އެޑިކޭޝަން މިނިސްޓަރ ޑރ.ޢާއިޝަތު ޢަލީއެވެ.
މިރަސްމިއްޔާތު ޝަރަފުވެރިކޮށްދެއްވައި ވާހަކަފުޅުދައްކަވަމުން ރައިސުލްޖުމްހޫރިއްޔާގެ ނައިބު ފައިސަލް ނަސީމް ވިދާޅުވީ ރާއްޖޭގެ މުޅި ތަޢުލީމީ ދާއިރާއަށް ބަލާއިރުވެސް ޖަމާލުއްދީން ސްކޫލަކީ ހުރިހާ ސްކޫލްތަކަށް ނަމޫނާ ދައްކަމުން އަންނަ ސްކޫލެއްކަމަށެވެ. އަދި ޖަމާލުއްދީން ސްކޫލަކީ މިއަދު ރާއްޖެ ދެކޭ ތަރައްޤީގެ އެތަށް ބައިވެރިއެއް އުފެއްދި ސްކޫލެއްކަމަށް ނައިބު ރައީސް ވިދާޅުވިއެވެ.
ޚާއްސަކޮށް އެއްވެސް ކުއްޖަކު ބާކީ ނުކޮށް ހަމަހަމަ އުސޫލުން ތަޢުލީމުދިނުމަށް، ޖަމާލުއްދީސް ސްކޫލުން ކުރާ މަސައްކަތައް އެމަނިކުފާނުވަނީ ފާހަގަކުރައްވާފައެވެ. ޖަމާލުއްދީން ސްކޫލަކީ ޚާއްސަ އެހީއަށް ބޭނުންވާ ދަރިވަރުންނަށް އެންމެފުޅާ ދާއިރާއެއްގައި ތަޢުލީމުދެމުން އަންނަ އެއް ސްކޫލެވެ.
"ކޮންމެ ކުއްޖަކުވެސް ވާންވާނީ ޢަޒުމެއް ކަނޑައަޅައިގެން ކިޔަވާ ދަރިވަރަކަށް. ތިޔައީ މާދާމަ މި ޤައުމުގެ ހިންގުމުގެ މަޤާމުތަކަން އަންނަން ތިބި ދަރިވަރުންކަން ދެނެގެން އެ ތަޞައްވުރަށް މަސައްކަތް ކުރަންޖެހޭނީ." ފައިސަލް ނަސީމް ވިދާޅުވިއެވެ.
ޖަމާލުއްދީން ސްކޫލަކީ ތިމާވެއްޓާއި ރައްޓެހި ގޮތްތަކަށް ސްކޫލް ބައްޓަންކުރުމުގައިވެސް ނަމޫނާ ސްކޫލެއްކަން ނައިބުރައީސް ފާހަގަކުރެއްވިއެވެ.
މި ޚާއްސަ އެސެމްބްލީގައިވަނީ ސްކޫލްގެ އިސް މަޤާމުތަކަށް ހޮވުނު ދަރިވަރުން އެކަމުގެ އިޤުރާރުގައި ސޮއިކޮށްފައެވެ. އަދި މި ދަރިވަރުންނަށް މަޤާމުގެ ބެޖު ހަވާލުކޮށްދެއްވީ ނައިބުރައީސް ފައިސަލް ނަސީމްއެވެ.
އެސެމްބަލީގައި ވާހަކަދައްކަވަމުން ސްކޫލްގެ ޕްރިިންސިޕަލް ހަސަން މުޙައްމަދު ވިދާޅުވީ ޖަމާލުންދީން ސްކޫލުން އަބަދުވެސް މަސައްކަތްކުރަނީ މާދަމާގެ ޖީލަށް މޮޅު ކުދިންތަކެއް ބިިނާކުރުމަށްކަމަށެވެ.
"މިއަދު މި ފާހަގަކުރާ އަހަރީ ދުވަހުގައިވެސް އަޅުގަނޑުމެންގެ ތީމަކަށް ވެފައިވަނީ ކުއްޖާ ބޮޑުވެގެން މަސައްކަތް ކުރަން ބޭނުންވާ ދާއިރާ. އަދި ކޮންމެ ކުއްޖަކުވެސް އެ އަމާޒަށް ވަސިލްވުމަށް ޓަރގެޓެއް މި ކަނޑައެޅީ." ޕްރިންސިޕަލް ވިދާޅުވިއެވެ.
ޖަމާލުއްދީން ސްކޫލަކީ ޕްރައިމަރީ ސްކޫލެއްގެ ގޮތުގައި މާލޭގައި ހުޅުވި ދެވަނަ ސްކޫލެވެ. ނަމަވެސް މިހާރު މިސްކޫލަކީ ގްރޭޑް ދިހަޔަކާއި ހަމައަށް ތަޢުލީމް ދެމުން އަންނަ ސްކޫލެކެވެ. މިސްކޫލްގައި ކޮންމެ އަހަރަކުވެސް އެވަރެޖްކޮށް 2000 އަށްވުރެ ގިނަ ދަރިވަރުން ތަޢުލީމް ޙާސިލްކުރެއެވެ.