ރާއްޖޭގައި މަސައްކަތްކުރަން އަންނަ ބިދޭސީންނަށް ދޫކުރާ ވާރކް ވިޒާގެ ބަދަލުގައި ވާރކް ޕާރމިޓް ދޫކުރުމަށާއި، މުޅިން އަލަށް މީޓިންގ ވީޒާއާއި ކޯޕަރޭޓް ރެސިޑެންޓް ވީޒާ ދޫކުރާގޮތަށް އިމިގްރޭޝަން ޤާނޫނަށް ސަރުކާރުން އިޞްލާޙު ހުށައަޅާއިފިއެވެ. ސަރުކާރުގެ ފަރާތުން މި އިޞްލާޙު ހުށައެޅުއްވީ ތިނަދޫ އުތުރު ދާއިރާގެ މެންބަރު ޢަބްދުލްމުޣުނީ އެވެ.
މިހާރު އިމިގްރޭޝަން ޤާނޫނުގައި ބުނާގޮތުން ރާއްޖޭގައި މަސައްކަތްކުރާ ބިދޭސީންނަށް ދޫކުރަނީ ވޯކް ވިޒާއެވެ. އަދި މީޓިންގ ވިޒާއާއި ކޯޕަރޭޓް ރެސިޑެންޓް ވިޒާއަކީ މިހާރު ޢަމަލުކުރަމުން އަންނަ ޤާނޫނުން ދޫކުރުން ހުއްދަ ވިޒާއެއް ނޫނެވެ.
އިމިގްރޭޝަން ޤާނޫނަށް ސަރުކާރުން ހުށައަޅާ އިޞްލާހުގެ ދަށުން ރާއްޖޭގައި މަސައްކަތްކުރަން އަންނަ ބިދޭސީންނަށް ވޯކް ވިޒާގެ ބަދަލުގައި ދޫކުރަން ނިންމި ވޯކް ޕާރމިޓަކީ، އިކޮނޮމިކް މިނިސްޓަރު ކަނޑައަޅުއްވާ އުސޫލެއްގެ ދަށުން ރާއްޖޭގައި ވަޒީފާއަދާކުރުމަށް އަންނަ ބިދޭސީއަކަށް، އޭނާ މަސައްކަތްކުރުމަށް ރާއްޖޭގައި ހުއްދަކޮށްފައިވާ މުއްދަތަށް ރާއްޖޭގައި ހުރުމަށް ދެވޭ ހުއްދައެކެވެ. ނަމަވެސް ވާރކް ވީޒާއަކީ ސަރުކާރުގެ ކަމާބެހޭ އިދާރާއަކުން ހަމަޖައްސާ އުސޫލުތަކާ އެއްގޮތްވާ ގޮތުގެމަތިން، ރާއްޖޭގައި މަސައްކަތްކުރުމުގެ ހުއްދަހޯދައިގެން، ރާއްޖެއަށް މަސައްކަތްކުރުމަށް އަންނަ ބިދޭސީއަކު އޭނާ މަސައްކަތްކުރުމަށް ރާއްޖޭގައި ހުއްދަކޮށްފައިވާ މުއްދަތަށް ރާއްޖޭގައި ހުރުމަށް ދެވޭ ހުއްދައެވެ.
އަލަށް ތަޢާރަފްކުރާ މީޓިންގ ވީޒާއަކީ، ކޮންޓްރޯލަރ އޮފް އިމިގްރޭޝަން ކަނޑައަޅާ ގޮތެއްގެމަތިން، ރަޖިސްޓްރާރ އޮފް ބިޒްނަސް ޤަބޫލުކުރާ ވިޔަފާރިއަކާ ގުޅުންހުރި ބައްދަލުވުމެއް، ނުވަތަ ދައުލަތުގެ މުއައްސަސާއެއްގެ ބޭނުމަށް ރާއްޖޭގައި ބޭއްވޭ ބައްދަލުވުމެއް، ނުވަތަ އެނޫންވެސް ފަރާތަކުން އިންތިޒާމްކޮށްގެން ސަރުކާރުގެ ކަމާބެހޭ އިދާރާއެއްގެ ހުއްދަ ލިބިގެން ބާއްވާ ބައްދަލުވުމެއްގައި ބައިވެރިވުމަށް އަންނަ ބިދޭސީއަކަށް، ކުރު މުއްދަތަކަށް ރާއްޖޭގައި ހުރުމަށް، ދޫކުރާ ހުއްދައެކެވެ.
އަދި ކޯޕަރޭޓް ރެސިޑެންޓް ވީޒާއަކީ ރަޖިސްޓްރާރ އޮފް ބިޒްނަސް ކަނޑައަޅާ ގޮތެއްގެމަތިން، ދިވެހިރާއްޖޭގައި ރަޖިސްޓްރީކޮށްގެން ހިންގާ ފޮރިން އިންވެސްޓްމަންޓެއްގެ ހިއްސާދާރެއް ނުވަތަ ޑިރެކްޓަރެއް ނުވަތަ ޕާޓްނަރެއް ނުވަތަ އެނޫންވެސް އިސް ފަރާތެއް، އަދި އެއިން ފަރާތެއްގެ ޢާއިލާގެ
މެންބަރެއް، ރާއްޖޭގައި ވަޒީފާއަދާކުރާ މީހެއްގެ ގޮތުގައި ނޫން ގޮތަކަށް، އެފޮރިން އިންވެސްޓްމަންޓް ނުވަތަ އެ ވިޔަފާރި ހިންގުމުގެ ބޭނުމަށް ދިގު މުއްދަތަކަށް ރާއްޖޭގައި ހުރުމަށް،ދޫކުރާ ހުއްދައެކެވެ.
ކޯޕަރޭޓް ރެޒިޑެންޓް ވީސާ ދޫކުރާނީ ކޮންމެ ތިންމަހަކަށް ނުވަތަ ތިން މަހުން ބަޔަކަށް 750 ރުފިޔާގެ ރޭޓުންކަމަށްވެސް މި އިޞްލާހުގައި ބުނެފައިވެއެވެ.
އިމިގްރޭޝަންގެ ޤާނޫނަށް ގެންނަ މި އިޞްލާޙު އަންނަ މަހުގެ އެއްވަނަ ދުވަހުން ފެށިގެން ޢަމަލުކުރަން ފަށަންވެސް މި އިޞްލާޙުގައި ބަޔާންކޮށްފައިވެއެވެ. އެހެންކަމުން މި އިޞްލާޙުތައް މިމަހުގެ ތެރޭގައި ފާސްކުރާނެކަމަށް ބެލެވެއެވެ.
ރާއްޖޭގައި ޤަވާއިދާއި ޚިލާފަށް ދިރިއުޅޭ ބިދޭސީންގެ މައްސަލައަށް ޙައްލެއް ގެނައުމަށް ސރުކާރުން ވަނީ ގިނަ މަސައްކަތްތަކެއް ފަށާފައެވެ. އެގޮތުން ޤަވާއިދާއި ޚިލާފަށް ދިރިއުޅޭ ބިދޭސީން ރަޖިސްޓްރީކުރުމުގެ ޕްރޮގްރާމެއް ސަރުކާރުން މިހާރު ވަނީ ފަށާފައެވެ.