ހުޅުމާލޭއިން 2017ވަނަ އަހަރު ދިން 704 ހައުސިންގ ޔުނިޓްތަކީ ހުޅުމާލޭގައި އެންމެފަހުން މީހުން ދިރިިއުޅެންފެށި ހައުސިންގ ޔުނިޓްތަކެވެ. ފްލެޓްތަކުގައި މީހުން ދިރިއުޅޭތާ މިހާތަނަށްވީ އަދި އެންމެ 2 އަހަރެވެ. ނަަމަވެސް މިހާރުވެސް މިތަންތަނުގެ ޢިމާރާތަށް މައްސަލަތައް ދިމާވެ، ފްލެޓްތަކުގެ ވެރިފަރާތްތަކުން އަންނަނީ ހައުސިންގ މިނިސްޓްރީއަށް މައްސަލަ ހުށައަޅަމުންނެވެ. ފްލެޓުތަކުގައި ހުރި މައްސަލަތައް ހައުސިންގ މިނިސްޓްރީއަށް އެންގުމަށް ހުޅުވާލުމުން 36 ޔުނިޓަކުން 90އަށްވުރެ ގިނަ މައްސަލަ މިނިސްޓްރީއަށް ހުށައެޅިއެވެ.
މި ހައުސިން ޔުނިޓުތައް ސަރވޭކޮށް ލިބިފައިވާ ގެއްލުން ދެނެގަނެ މިނިސްޓްރީން މިހާރުވަނީ ގެތަކުގެ މަރާމާތަށް ބޭނުންވާ މަސައްކަތްތައް ފަށާފައެވެ. މިިމަސައްކަތާއި ގުޅޭގޮތުން ވާހަކަދައްކަވަމުން ހައުސިންގ މިނިސްޓްރީގެ ސީނިއާ އެގްޒެކެޓިވް ޑިރެކްޓަރ ދާވޫދު އިބްރާހީމް ވިދާޅުވީ ފްލެޓްތަކަށް އެންމެ ބޮޑީ ފެން ލީކްވުމުގެ މައްސަލަކަމަށެވެ. މި މައްސަލަ ދިމާވެގެން 36 ހައުސިންގ ޔުނިޓަކުން ހުށަހަޅާފައިވާކަމަށް ދާވޫދު ވިދާޅުވިއެވެ.
މި މައްސަލަ ގިނަ ގެތަކަށް ދިމާވީ ސީލިންގ ހަދާފައިހުރިގޮތުން ސީލިންގެ ދޭތެރޭގައި އާވި އުފެދޭތީކަމަށް އޭނާ ވިދާޅުވިއެވެ. ނަމަވެސް ބައެއް ގެތަކުގެ ފެންވައިރުކޮށްފައި ހުރިގޮތުންވެސް މިމައްސަލަ ދިމާވެފައިވެއެވެ. ހައުސިން މިނިސްޓްރީން މިހާރުވަނީ މިމައްސަލަތައް ޙައްލުކުރުމުގެ މަސައްކަތް ފަށާފައެވެ.
"6 ފާހަނަަކުންވެސް އެބަ ލީކްވޭ. 1ގޭގެ ސިޓީންގ ރޫމަށް ފަންކައިން އެބަ ފެން ފައިބާ. 6 ގޭގެ ސީލިންގ ކްރެކް އެބަހުރި. ފްލެޓްތައް ހެދިއިރު ރަނގަޅަށް މޮނިޓަރކޮށްފައެއް ނުވެ." ދާވޫދް ވިދާޅުވިއެވެ.
ދަވޫދް ވިދާޅުވީ ބައެއް ފްލެޓަކަށް ފެން ފޯރުކޮށްދިނުމަށް ހަދާފައިހުރި ފެން ވަޅުތަކުގައިވެސް ބޮޑެތި މައްސަލަ ހުރިކަމަށެވެ. އޭނާ ވިދާޅުވީ ބައެއް ވަޅުތައް ވަޅުލާފައިވާލެއް ތިލަ ކަމުން، ދިޔަވަރު ކުޑަވާގަޑިތަކުގައި އެ ވަޅުތަކަށް ފެން ނާރާކަމަށެވެ. މިހާތަނަށް ބެލި ބެލިމުން މި ވަޅުތައް ހަދާފައިވަނީ މިނިސްޓްރީއިން ދީފައިވާ މިނަށް ނޫންކަން އިނގިފައިވާކަމަށްވެސް ދާވޫދު ވިދާޅުވިއެވެ.
މިިނިސްޓްރީން ވިދާޅުވެފައިވަނީ މިމަސައްކަތްތައް ކޮންޓްރެކްޓަރާއިވެސް މިހާރު ޙިއްސާ ކޮށްފައިވާނެކަމަށެވެ. އަދި ދެން މަސައްކަތް ފަށާއިރު މިިނިސްޓްރީގެ އިންޖިނިއަރަކު އަބަދުވެސް މަސައްކަތްތައް މޮނިޓަރ ކުރަމުންދާނެކަަމަށް މިނިސްޓްރީންވަނީ ވިދާޅުވެފައެވެ.
މިމައްސަކަތަކުގެ ތެރޭގައި 14 ފްލެޓަކަށް ކަތުރުފަނީގެ މައްސަލަ ދިމާވެގެންވެސް މިނިސްޓްރީއަށް ހުށައަޅާފައިވެއެވެ. މިނިސްޓްރީއިން ބުނެފައިވަނީ މިނިސްޓްރީއާއި ގުޅިގެން މައްސަލަ ޙައްލުކުރަން އެދުނު 12 ގެއެއްގެ މައްސަލަ މިހާރު މުޅިން ޙައްލުކޮށް ނިމިފައިވާކަމަށެވެ.
ކަތުރުފަނީގެ މައްސަލަ ބޮޑުވެ އެއް އާއިލާވަނީ އެމީހުންގެ ފްލެޓުންވެސް ނެރެފައެވެ. ހުޅުމާލެ 173-ޖީ-06 ނަންބަރު ފްލެޓްގައި ދިރިއުޅޭ އަބްދުލް ޤާދިރު ބުނެފައިވަނީ އެމީހުން ފުރަތަމަ ފްލެޓަށް ވަތްއިރުވެސް ކަތުރުފަނީގެ ނިޝާންތައް ފްލެޓްގައި ހުރިކަަމަށެވެ.
"ފުރަތަމަ އައިއިރުވެސް ކަޅު ތަންތަންކޮޅު ފެންނަން ހުރި. އެކަމަކު އޭރު ނޭންގެ މިއީ ކަތުރުފަނިކަމެއް. 2މަސް ވަނިކޮށް ގޭގެ ސޮކެޓެއް ނައްޓާލިއިރު މި ފެނުނީ. ދިރިއުޅެން އުނދަގުވަރަށް ކަތުރުފަނި އެޅި. މިނިސްޓްރީއަށް ގުޅައިގެންނާއި، ސިޓީވެސް މި މައްސަލާގައި ހުށައެޅިން. އެކަމަކުވެސް 2އަހަރުވީއިރު ޙަމަ އަލިމަގެއް ނުފެނުން." އަބްދުލްޤާދިރު ވިދާޅުވެފައިވެއެވެ.
ކަތުރުފަނި އަޅައި ހުރިހާ ދޮރުތައް ހަލާކުވުމުގެ ސަބަބުން މިނިސްޓްރީއިންވަނީ އެގޭގެ ދޮރުތައްވެސް މުޅިން ބަދަލުކޮށްފައެވެ. އަދި އެގެއަށް ޕެސްޓް ކޮންޓްރޯލް ކެމިކަލް ޖަހައި މިހާރު އެ އާއިލާވަނީ އަނބުރައި ގެއަށް ބަދަލުކޮށްފައެވެ. މިނިސްޓްރީން މިހާރުވަނީ މި ފްލެތައް ހުރި ސަރަޙައްދުތަކުގެ ބިންމައްޗައްވެސް ކެމިކަލް ޖަހާފައެވެ.