ރާއްޖޭގައި އިޖްތިމާޢީ އެހީތެރިންގެ ގޮތުގައި ފާޅުގައި މަސައްކަތްކުރާ ފަރާތްތަކުގެ ތެރެއިން އަޙްމަދު ހިޝާނަކީ ފާހަގަކޮށްލެވޭ ބޭފުޅެކެވެ.
ހިލޭސާބަހަށް އިންސާނިއްޔަތައް މަސައްކަތްކޮށްދިނުމުގެ ދާއިރާއިން އޭނާ ވަނީ އަގުނުކުރެވޭ ފަދަ އެތައް މަސައްކަތްތަކެއް ކޮށްފައެވެ. ވޭނާ ކެކުޅުމުގައި ދިރިއުޅެމުންދިޔަ އެތައް އާއިލާއެއްގެ ހާލަތު ބަދަލުކޮށްދީފައެވެ. މާޔޫސްވެ ގޮތްހުސްވެފައިވާ އެތައް ބަޔަކަށް އުއްމީދު ގެނެސްދީފައެވެ. އުމުރުން ދުވަސްވީ ފަރާތްތަކާއި، ޚާއްސަ އެހީއަށް ބޭނުންވާ ފަރާތްތަކުގެ އިތުރުން ފަޤީރު ނިކަމެތި ހާލުގައި ދިރިއުޅޭ ފަރާތްތަކަށް އެހީތެރިކަމުގެ އަތް ހިޝާން ދިއްކޮށްލަނީ އޯގާތެރިކަމާއި ހިތްހެޔޮކަމާއެކުއެވެ.
އަޅާނުލެވި މުޖުތަމަޢުއިން ހަވާސާވެފައިވާ ފަރާތްތަކުގެ ގާތައް ޒިޔާރަތްކޮށް، މަދަދުވެރިއެއްގެގޮތުގައި އޭނާގެ މުޅި ދުވަސް ހޭދަކުރެއެވެ. އިޖްތިމާޢީ އެހީތެރިކަން ބޭނުންވާ ފަރާތްތަކަށް އެކި ގޮތްގޮތުން އެހީތެރިކަން ފޯރުކޮށްދިނުމަށް ހިޝާން ކުރަމުންދާ މަސައްކަތަކީ ތަޢުރީފް ޙައްޤު މަސައްކަތްތަކެކެވެ.
ހިޝާން ވަނީ އިޖްތިމާޢީ ޚިދުމަތުގެ ދާއިރާއިން ހިތްވަރު ދިނުމުގެ ޤައުމީ އިނާމް 2014 ވަނަ އަހަރު ހާސިލްކޮށްފައެވެ. ލޯތްބަކީ ވަކި މީހެއްގެ ހައްގެއް ނޫންކަމަށް ހިޝާން ބުނެއެވެ. އެންމެ ނިކަމެތި މީހާއަށް ވެސް ލޯބި ބޭނުންވެއެވެ. އަދި އެ ލޯބި ރަނގަޅު ގޮތުގައި ދެވިއްޖެނަމަ އެކަމުން ލިބޭ ރޫހާނީ އުފަލާއި ހިތްހަމަޖެހުން އެހެން އެއްވެސް މާއްދީ އުފަލަކަށް ވުރެ ބޮޑު ވާނެކަމަށް އޭނާ ބުނެއެވެ.
އިންސާނިއްޔަތަށް މަސައްކަތްކުރުމުގައި ނަމޫނާ ދައްކަމުންދާ ހިޝާން އެ މަސައްކަތް ކުރަނީ އެކަމަށް ޖެހިފައިވާ ލޯތްބަކާއި ޝަޢުގެއްގެ ބޮޑުކަމުންނެވެ. އެކަމުގައި އޭނާ 18 އަހަރު ހޭދަކުރީ ހަމަ އެގޮތުގަައެވެ. ޤައުމީ ހިދުމަތުގައި އެއްވެސް ވަރުބަލިކަމެއްނެތިއެވެ. ނަމަވެސް ޤައުމުގެ ކަންކަން ބަދަލުވަމުންދާގޮތުން ހިޝާން އޭނާގެ އުދާސްތައް ސޯޝަލް މީޑިއާއަށް ދޫކޮށްލީ ވޭނާއި އަސަރާއެކުއެވެ. ހަޤީޤަތުގައިވެސް މިއަދު އޭނާގެ ހިތް ފަޅައިގެންގޮސްސިއެވެ.
ހިޝާން ސިފަކުރާގޮތުން މި ޤައުމުގައި ހައްޤު ބަސް ބުނާ މިހުންނަށް ދިރިހުރުމުގެ ހައްޤެއްނެތެވެ. 18 އަހަރު ވަންދެން ނިކަމެތިންގެ ހައްޤުތައް ހޯދުމަށް މަގުތަކަށް ނުކުމެގެން ކުރި މަސައްކަތުގެ ބަދަލު އޭނާއަށް ލިބުނީ ބިރުދެއްކުމާއި މަރުގެ އިންޒާރުންނެވެ. ހުރިހާވެސް މައްސަލައަކީ ނިކަމެތިންގެ ހައްޤުގައި އޭނާ ވަކާލާތު ކުރާތީއެވެ. އިޖްތިމާޢީ ރައްކާތެރިކަން ކަށަވަރުކުރުމަށް ކަމާބެހޭ މުއައްސަސާތައް ޖަވާބުދާރީކުރުވުމަށް އޭނާ މަސައްކަތް ކުރާތީއެވެ.
ހިޝާން އަންގަނީ މިވަރުން އޭނާއަށް ފުދިއްޖެކަމަށެވެ. ރައީސުލްޖުމްޙޫރިއްޔާ އިބްރާހީމް މުޙައްމަދު ޞާލިޙާއި، ރައީސުލްޖުމްހޫރިއްޔާގެ ނާއިބު ފައިޞަލް ނަސީމާއި، ރައްޔިތުންގެ މަޖިލީހުގެ ރައީސް، ރައީސް މުޙައްމަދު ނަޝީދާއި، ހިއުމަން ރައިޓްސް ކޮމިޝަން އޮފް ދަ މޯލްޑިވްސް ޓެގްކޮށް، ހިޝާން ކޮށްފައިވާ ޓުވީޓެއްގައި ބުނެފައިވަނީ ދެން ބޭނުންވަނީ ޤައުމުދޫކޮށް ދާންކަމަށެވެ.
އެތައް ބައެއްގެ މަލާމާތާއި ފުރައްސާރައާއެކު ދަރުމަވެރިއެއްގެ ގޮތުގައި މިއަދާ ހަމައަށް މި މަސައްކަތުގައި ދެމިހުރެވުނީވެސް އަމިއްލަ ދިރިއުޅުމުން އޭނާއަށްދަސްވި ފިލާވަޅުތަކެއްގެ ސަބަބުންކަމަށް ހިޝާން ބުނެއެވެ. އަދި އޭނާގެ މަސައްކަތުގައި އެކިގޮތްގޮތުން އެހީތެރިވެދީ ހިތްވަރުދިން ފަރާތްތައް ހިޝާން ބަލައިގަންނަނީ ޝުކުރުވެރިކަމާއެކުއެވެ.
ކޮންމެއަކަސް ހިޝާންގެ މި އަސަރުގަދަ ޓުވިޓާއެކު އޭނާގެ މަސައްކަތްތަކަށް ތަޢުރީފުކުރާ އެތައްބަޔަކު ދަނީ ހިޝާންގެ ދިފާޢުގައި ތަފާތު ޝުޢޫރުތައް ފާޅުކުރަމުންނެވެ. މި މަސައްކަތުގައި ދެމިހުރުމަށް ހިތްވަރުދެމުންނެވެ.