މިހާރު ހިނގަމުންދާ މިއަހަރުގެ ފުރަތަމަ ކުއާޓަރގެ ތެރޭގައި 4 މަސްދުވަހު ތެރޭގައި ޝިޕިންގލައިންގ ޤާޢިމްކުރުމުގެ މަސައްކަތް ފަށާނެކަމަށް އެސްޓީއޯގެ މެނޭޖިން ޑިރެކްޓަރ ހުސައިން އަމްރު ވިދާޅުވެއްޖެއެވެ.
އެސްޓީއޯގެ މަސައްކަތްތަކާބެހޭ ގޮތުން މީޑިއާއަށް މައުލޫމާތު ދިނުމަށް ބޭއްވި ޕްރެސް ކޮންފަރެންސްގައި ވާހަކަ ދައްކަވަމުން އެކުންފުނީގެ މެނޭޖިން ޑިރެކްޓަރ، ހުސެން އަމްރު ވިދާޅުވީ މިހާރު ހިންގަމުންދާ ކުއަޓާތެރޭގައި ޝިޕިން ލައިންގެ މަސައްކަތް ފަށާނެކަމަށެވެ. އަދި މިކަންކުރުމަށް ގިނަ މަސައްކަތްތަކެއް ކުރަންޖެހޭކަމަށާއި، މިކަމުގެ އިތުރު ތަފްސީލް މީޑިއާޔާ ފަހުން ހިއްސާކުރާނެކަމަށް އަމްރު ވިދާޅުވިއެވެ.
އެސްޓީއޯއިން ޝިޕިންގލައިންގ ޚިދުމަތް ފެށުމަށް ތައްޔާރުވަމުންދަނީ ބޮޑެތި ވިޔަފާރިތަކަށް ވަނުމަށް އެކުންފުނިން ގެންގުޅޭ ސިޔާސަތުގެ ދަށުންކަމަށެވެ. އެގޮތުން ކުދި ވިޔަފާރިތަކާއި މެދު ފަންތީގެ ވިޔަފާރިތަކާއި ވާދަކުރުން ހުއްޓާލާއި، ބޮޑެތި ވިޔަފާރިތަކާއި ދިމާލަށް ދިއުމަކީ ކުންފުނީގެ މިހާރުގެ ސިޔާސަތެކެވެ.
އެސްޓީއޯގެ އަމިއްލަ ޝިޕިންލައިނަކާއެކު ކުންފުންޏަށް ރަނގަޅު އާމްދަނީއެއް ލިބޭނެކަމަށް ލަފާކުރެއެވެ. މީގެ އިތުރުން ނުއަގުގައި ބޭރުގެ އާގުބޯޓުތައް ބޭނުންކޮށްގެން ރާއްޖެއަށް މުދާ ގެނައުމުގައި ކުންފުންޏަށް ލިބޭ ގެއްލުން ކުޑަވެގެންދާނެކަމަށްވެސް އެސްޓީއޯއިން ބުނެއެވެ.
ރާއްޖޭގައި އެންމެ ފުރަތަމަ ޝިޕިންގލައިނެއް އުފެއްދީ ރައީސް އިބްރާހިމް ނާސިރުގެ ސަރުކާރުގައެވެ.މޯލްޑިވްސް ނެޝަނަލް ޝިޕިންގ ލިމިޓެޑް، އެމްއެންއެސްއެލްގެ ނަމުގައި ގިނަ އަހަރުތަކެއް ވަންދެން ކުންފުނި ހިންގުމަށްފަހު ކުންފުނި ހުއްޓާލީ ދަރަނި ބޮޑުވުމާއި ގުޅިގެންނެވެ.
އެސްޓީއޯއިން ޝިޕިންގލައިންގެ ވިޔަފާރިއަށް ވަނުމަށް ތައްޔާރުވަމުންދާއިރު އެސްޓީއޯއިން ބުނީ އޭރު އެމްއެންއެސްއެލް ކުންފުނި ބަނގުރޫޓުވުމަށް ދިމާވީ ބަނދަރުގެ ދަތިކަމާއި ޝިޕިންގ މާކެޓަށް އޭރު އައި ބަދަލުތަކަށް އެކުންފުނި ތައްޔާރުނުވެ ތިބުމުގެ ސަބަބުންކަމަށެވެ. އަދި އެސްޓީއޯއިން ޝިޕިންގލައިންގ ވިޔަފާރިއަށް ވަންނާނީ ފުރިހަމަ ތައްޔާރީތަކާއެކުކަމަށް އެސްޓީއޯއިން ބުނެއެވެ. އެގޮތުން މިއަހަރުގެ ތެރޭ މިކަމަށް ބޭނުންވާ ފީސިބިލިޓީ ދިރާސާތައް ހަދަން ފަށާފައިވާކަމަށް އެސްޓީއޯއިން ބުނެއެވެ.