ބަނގުރާފުޅިތަކަކާއެކު ޓެކްސީއެއްގައި ހުޅުމާލެއިން އިން މާލެއަށް ދަތުރުކުރި 2 ބިދޭސީއަކު ހައްޔަރުކޮށްފިއެވެ.
ފުލުހުން ވިދާޅުވީ، މި މައްސަލައިގައި ހައްޔަރުކޮށްފައިވަނީ 23 އަހަރުގެ ފިރިހެނަކާއި، 24 އަހަރުގެ ފިރިހެނެއްކަމަށެވެ. އަދި އެ ދެމީހުންނަކީވެސް ބަންގަލަދޭޝްއަށް ނިސްބަތްވާ ދެ މީހުންކަމަށް ފުލުހުން ވިދާޅުވިއެވެ.
މި ބަނގުރާ ފެނިފައިވަނީ ޓެކްސީއެއްގައި ބަނގުރާ ހުރިކަމުގެ މަޢުލޫމާތު މިއަދު ހަވީރު 17:14 ހާއިރު ލިބުމާގުޅިގެން ފުލުހުން އެ ސަރަޙައްދަށްގޮސް އެ ޓެކްސީ ހުއްޓުވާ، ޓެކްސީގެ ޑިކީގައި ހުރި ދަބަސްތަކެއް ބަލާފާސްކުރިއިރުއެވެ. އެ ދަބަސްތަކުން 20 ފުޅި ބަނގުރާ ފެނިފައިވާކަމަށް ފުލުހުން ވިދާޅުވެއެވެ.
ބަނގުރާ ފެނިފައިވަނީ 2 ބިދޭސީންގެ އަތުންކަމުން މި މައްސަލައިގައި ޓެކްސީ ދުއްވަން އިން ދިވެހި ޑްރައިވަރު ހައްޔަރުކޮށްފައިނުވާކަމަށް ފުލުހުން ވިދާޅުވެއެވެ.
މި މައްސަލަ ފުލުހުން އަންނަނީ އިތުރަށް ތަޙްޤީޤުކުރަމުންނެވެ.