މާލޭ ހުޅަނގު ހާބަރު ސަރަޙައްދުގައި ތަރައްޤީކޮށްފައިވާ ފުޑްކޯޓުތަކުގެ ތެރެއިން 4 ތަނެއް ކުއްޔަށް ދޫކުރުމަށް އެސްޓީއޯއިން ހުޅުވާލައިފިއެވެ.
އެސްޓީއޯ އިން ކުރި އިއުލާނެއްގައި ބުނެފައިވަނީ މި 4 ފުޑްކޯޓަށް ފުރޮފޯސަލް ހުށައެޅުމުގެ ފުރުސަތު އަންނަ މަހުގެ 5 ވަނަ ދުވަހުގެ ނިޔަލަށް ހުޅުވާލާފައިވާ ކަމަށެވެ. މި 4 ފުޑްކޯޓުވެސް ހުންނަނީ ބުލޮކް 4 ގައި އިއްޒުއްދީން މަގާވީ ފަޅީގައެވެ. އެއީ ޔުނިޓް 16، 17، 20 އަދި 26 އެވެ.
އެސްޓީއޯއިން ހާބަރު ފުޑްކޯޓު ޔުނިޓު ކުއްޔަށް ދޫކުރާނީ ފަސް އަހަރުގެ މުއްދަތަކަށެވެ. ކުއްޔަށް ދޫކުރާތާ މަހެއްގެތެރޭ ހިދުމަތް ފަށަންވާނެކަމަށްވެސް އެސްޓީއޯއިން ބުނެއެވެ.
މާލޭ ހުޅަނގު ދެކުނު ހާބަރު ސަރަޙައްދުގައި 26 ފުޑްކޯޓް ތަރައްޤީކޮށް ހިންގަމުންދާއިރު މި ފުޑް ކޯޓުގައި ބާރަސަތޭކަ ފަސްދޮޅަސް އަކަފޫޓާއި، ނުވަސަތޭކަ ފަސްދޮޅަސް އަކަފޫޓާއި، ފަސްދޮޅަސް އަކަފޫޓުގެ ތަންތަން ހިމެނެއެވެ.