ޗައިނާގެ ވޫހާން ސިޓީން ފެނުނު ކޮރޯނާ ވައިރަސްގެ ނުރައްކާތެރިކަން މުޅި ދުނިޔެއަށް ކުރިމަތިވެފައިވާއިރު، ރައްކާތެރިވުމަށް އަޅަންޖެހޭ ފިޔަވަޅުތައް ދަނީ ހުރިހާ ޤައުމަކުންވެސް އަޅަމުންނެވެ. ރާއްޖެއަށް މި ވައިރަސް އެތެރެވެދާނެކަމަށް ބަލައި، އެކަމަށް ފުރިހަމައަށް ތައްޔާރުވެފައިވާއިރު، ކްރޯނާ ވައިރަސްއާބެހޭ މަޢުލޫމާތު ރަނގަޅަށް ނުހޯދާ ބައެއް ފަރާތްތަކުން ދަނީ ރައްޔިތުންގެ މެދުގައި ބިރުވެރިކަން އުފެދޭފަދަ ވާހަކަތައް ދައްކަމުންނެވެ.
މިގޮތުން ސޯޝަލް މީޑިއާގައި ބައެއް ފަރާތްތަކުން މިހާރު ދައްކަމުންދާ އެއް ވާހަކައަކީ ކްރޯނާ ވައިރަސްއަކީ އެއް ޤައުމުން އަނެއް ޤައުމަށް ފޮނުވާ ޕާރުސަލްތަކުގެ ޒަރިއްޔާއިން ފެތުރިދާނެ ވައިރަސްއެއްކަމަށް ބުނެ ދައްކަމުންދާ ވާހަކަތަކެވެ. ފަހަރެއްގައި މިއީ ދެހާހުގެ ކުރީކޮޅު އަޅުގަނޑުމެންނަށް އިވުނު "އެންތްރެކްސް" ވައިރަސްގެ ޚަބަރުތަކުގެ ސަބަބުން ދައްކަމުންދާ ވާހަކައަކަށްވެސް ވެދާނެއެވެ. ނަމަވެސް ކްރޯނާ ވައިރަސް އެންމެ ގަދައަށް ފެތުރެމުންދާ ޗައިނާއިން ރާއްޖެއަށް ދުވާލަކު އެތައް ސަތޭކަ ޕާރުސަލްތަކެއް އަލީ އެކްސްޕްރެސްއާއި އެެހެނިހެން އޮންލައިން ފިހާރަތަކުން ފޮނުވަމުންދާއިރު، ޗައިނާއިން އަންނަ ޕާރުސަލްތަކުން މި ވައިރަސް ފެތުރިދާނެތޯ މިއީ ގިނަ ބަޔަކު ކުރާނޭ ސުވާލެއްކަން ޔަޤީނެވެ.
ކޮރޯނާ ވައިރަސްއާއި ގުޅޭގޮތުން މީޑިއާއަށް މައުލޫމާތު ދެއްވުމަށް ހެލްތު މިނިސްޓްރީން އާދީއްތަދުވަހު ބޭއްވި ނޫސްވެރިންގެ ބައްދަލުވުމުގައި ހެލްތު މިނިސްޓަރ ވަނީ މިސުވާލުތަކަށް ޖަވާބުދެއްވާފައެވެ.
ހެލްތް މިނިސްޓަރ އަބްދުﷲ އަމީން ވިދާޅުވީ، މި ވައިރަސްއާ ގުޅޭ މައުލޫމާތު ކަމާ ގުޅުންހުރި ފަރާތްތަކުގެ އެހީގައި ހޯދަމުންދާކަމަށެވެ. ނަމަވެސް މިހާތަނަށް އައިއިރު މިއީ އެއްގައުމުން އަނެއް ޤައުމަށް ޕާރުސަލްގެ ޒަރިއްޔާއިން ފެތުރޭ ވައިރަސްއެއްކަމުގެ މައުލޫމާތު ލިބިފައިނުވާކަމަށެވެ.
"ބަލި ފެތުރޭ ގޮތާއި، ބަލި ދައުރުވާ ގޮތާއި، ބައްޔާއި ބެހޭގޮތުން ޑޮކްޓަރުންދޭ މައުލޫމާތައް ބަލާއިރުގައި މި ބަލީގެ ސިފަތަކަކީ އާންމު ރޯގާއެއްގެ ސިފަތައް. މިބަލި ފެތުރެނީ އެކަކުގެ ގައިން އަނެކަކުގެ ގަޔަށް. މީގެ ވައިރަސް އަޅުގަނޑަށް ޑޮކްޓަރުންނާއި ފަންނީ ބޭފުޅުން މައުލޫމާތުދޭ ގޮތުގައި މިއީ އެއްގައުމުން ޕާރުސަލްގެ ޒަރިއްޔާއިން އަނެއް ގައުމަށް ދާ ބައްޔެއް ކަމުގައި އަދި އަޅުގަނޑުމެންނަށް މައުލޫމާތު ލިބިފައެއް ނެތް." މިނިސްޓަރ އަމީން ވިދާޅުވިއެވެ.
މިނިސްޓަރ އަމީން ވިދާޅުވީ ކޮރޯނާ ވައިރަސް ޖެހިފައިވާ މީހަކު މިހާތަނަށް ރާއްޖެއިން ފެނިފައި ނުވިނަމަވެސް މި ބަލި ފެތުރިދާނެފަދަ ހާލަތެއް ދިމާވެދާނެކަމަށް ބަލައި އެކަމަށް ތައްޔާރުކުރަންޖެހޭ އައިސޮލޭޝަން ފެސިލިޓީ ހުޅުމާލޭގައި ޤާއިމް ކޮށްފައިވާކަމަށެވެ. އަދި މި ވައިރަސް ފެތުރިގެން ހިނގައިދާނެ ހާލަތަކަށް ބަލައި. މާލެ އާއި ކައިރީގައި އޮންނަ ފޮނަދޫގައިވެސް އައިސޮލޭޝަން ފެސިލިޓީއެއް ޤާއިމް ކުރުމަށް ސަރުކާރުން ނިންމަވާފައިވާކަމަށް މިނިސްޓަރ އަމީން ވިދާޅުވިއެވެ.
ކޮރޯނާ ވައިރަހަކީ އިންސާނުންނާއި ޖަނަވާރުންގެ މެދުގައި ބަލި ޖައްސާ ވައިރަހެކެވެ. އާދައިގެ އަރިފަދުސް ރޯގާ، މާސް، ސާސް ފަދަ ބަލިތައް މި ވައިރަހުން ޖެހެއެވެ.
މިހާތަނަށް އެނގިފައިވާ ގޮތުގައި މި ވައިރަހުގެ އަލާމަތްތައް ފެންނަނީ ވައިރަސް ހަށިގަނޑަށް ވަންނަތާ 2 ދުވަހާއި 14 ދުވަހުގެ ތެރޭގައެވެ. މި ބަލީގެ އަލާމަތްތަކުގެ ތެރޭގައި ހުން އައުން، ކެއްސުން، ނޭވާ ކުރުވެ ނޭވާލާން އުނދަގޫވުން ހިމެނެއެވެ.
މިއީ އަލަށް ފެނުނު ބައްޔެއްކަމުން މި ބައްޔައް ވަކި ފަރުވާއެއް ނުވަތަ ވަކި ވެކްސިނެއް އަދި ނެތެވެ. ފަރުވާ ދެމުން އަންނަނީ ވައިރަހަށް ޕޮޒިޓިވްވާ މީހެއްގެ ގައިން ފެންނަ އަލާމަތްތަކަށް ބަލައިގެންނެވެ.
ޗައިނާގެ އިތުރުން ދިހަ ގައުމަކުން ކޮރޮނާވައިރަސް މިހާތަނަށް ވަނީ ފެނިފައެވެ. އެއީ އޮސްޓްރޭލިޔާ، މެލޭޝިޔާ، ޓައިވާން، ތައިލޭންޑް، ވިއެޓްނާމް، ދެކުނު ކޮރެއާ، ސިންގަޕޫރު، ނޭޕާލް، ޖަޕާން އަދި އެމެރިކާއެވެ. ޗައިނާގެ ހާހަކަށްވުރެ ގިނަ މީހުން ގައިން މިހާތަނަށް މި ވައިރަސް ފެނިފައިިވާއިރު، 80 އަށްވުރެ ގިނަ މީހުން ވަނީ މަރުވެފައެވެ.