ހދ. ނޮޅިވަރަމް ބަނދަރު ސަރަހައްދުގައި ގާޑިޔާ ބަހައްޓައިގެން ތަކެތިވިއްކުމަށް ހުއްދަދިނުމަށް އެރަށު ކައުންސިލުން ނިންމައިފިއެވެ.
ނޮޅިވަރަމް ކައުންސިލުން ވިދާޅުވީ، ބަނދަރު ސަރަހައްދުގައި ގާޑިޔާ ބަހައްޓައިގެން ތަކެތި ވިއްކުމަށް ބިންދޫކުރުމަށް ނިންމާފައިވާކަމަށެވެ. ބަނދަރު ސަރަހައްދުގައި ގާޑިއާ ބަހައްޓައިގެން ތަކެތި ވިއްކުމަށް 5 ބިމެއް ދޫކުރަން ވަނީ ހަމަޖެހިފައެވެ. މި ބިންތަކުގެ ބޮޑުމިނަކީ 15 ފޫޓު 12 ފޫޓުކަމަށް ކައުންސިލުން ވިދާޅުވެއެވެ.
ޕީއެސްއެމް ނިއުސްއަށް މައުލޫމާތުދެއްވަމުން ނޮޅިވަރަމް ކައުންސިލްގެ ރައީސް އިބްރާހިމް ރަޝީދު ވިދާޅުވީ، މި ގާޑިއާތަކުގައި ވިއްކޭނީ ދިވެހި އުފެއްދުންތައްކަމަށެވެ. އަދި ބިންތައް ދޫކުރަނީ ރަށަށް އާމްދަނީ އިތުރުކޮށް، ރައްޔިތުންނަށް އާމްދަނީ ހޯދޭނެ އިތުރު ގޮތްތައް ފަހިކޮށްދިނުމަށްކަމަށެވެ. އަދި ކައުންސިލަށް އާމްދަނީ ލިބޭނެ އިތުރު ގޮތެއް ހޯދުމަކީވެސް މީގެ މަޤްސަދެއްކަމަށް ކައުންސިލްގެ ރައީސް ވިދާޅުވިއެވެ.
ހދ. ނޮޅިވަރަމް ބަނދަރު ސަރަހައްދުން ގާޑިޔާގެ ވިޔަފާރިކުރުމަށް ބިން ދޫކުރުމަށް ހަމަޖެހިފައިވަނީ 2 އަހަރު ދުވަހުގެ މުއްދަތަކަށެވެ. މި ބިންތައް ކުއްޔަށް ނަގަންބޭނުންވާ ފަރާތްތަކުން މިމަހުގެ 30 ވަނަ ދުވަހު މައުލޫމާތު ސާފުކުރަންޖެހެއެވެ. އަދި 5 ފެބްރުއަރީގައި އަގު ހުށައަޅަންޖެހޭނެކަމަށް ނޮޅިވަރަމް ކައުންސިލުން ވިދާޅުވެއެވެ.