އެކި ދުވަސްމަތިން ކުޑަކުދިންތަކަކަށް ޖިންސީ ގުނަވަން ދެއްކި 60 އަހަރުގެ މީހަކު ނައިފަރުން ހައްޔަރުކޮށްފިއެވެ.
ފުލުހުން ވިދާޅުވީ، މިމަހުގެ އެކި ދުވަސްމަތިން ކުޑަކުދިންތަކަކަށް ޖިންސީ ގުނަވަން ދެއްކި އުމުރުން 60 އަހަރުގެ ދިވެހި ފިރިހެނަކު ޅ. ނައިފަރުން ހައްޔަރުކޮށްފައިވާކަމަށެވެ. އޭނާ ހައްޔަރުކޮށްފައިވަނީ ކޯޓު އަމުރެއްގެ ދަށުން މިއަދު އިރުއޮއްސި 18:10 ހާއިރުކަމަށް ފުލުހުން މަޢުލޫމާތުދެއްވައެވެ. ނަމަވެސް އޭނާއާއި ގުޅޭ އިތުރު މަޢުލޫމާތެއް ފުލުހުން ހާމަކޮށްފައެއްނުވެއެވެ.
މި މައްސަލަ ފުލުހުން މިހާރު ދަނީ ތަޙްޤީޤުކުރަމުންނެވެ.
ގއ. ކަނޑުހުޅުދޫގައި އުމުރުން 2 އަހަރުވެސް ނުވާ ތުއްތު އަންހެން ކުއްޖަކަށް އޭނާގެ ބައްޕަ ފަރާތު ކާފައާއި މުނިކާފަ ޖިންސީ އަނިޔާކޮށް އެކުއްޖާ ރޭޕްކުރި މައްސަލައެއް މިމަހުގެ ކުރީކޮޅު ފެންމަތިވުމާއެކު، ކުޑަކުންދިންނަށް ޖިންސީ ގޯނާކުރުމާއި ގުޅޭ ގިނަ މައްސަލަތަކެއް މިދުވަސްކޮޅު އަންނަނީ ކަމާބެހޭ ފަރާތްތަކަށް ރިޕޯޓްކުރަމުންނެވެ.
އަދި ކުޑަކުދިންނަށް ޖިންސީ އަނިޔާކުރުން ހުއްޓާލުމަށާއި، ކުޑަކުދިންގެ ހައްޤުތައް ކަށަވަރުކޮށްދީ އެކުދިންނަށް ރައްކާތެރި އަމާން މުޖުތަމަޢުއެއް ޤާއިމުކޮށްދިނުމަށް މާލެއާއި އަތޮޅުތެރޭގައި އަންނަނީ ތަފާތު ހަރަކާތްތަކެއްވެސް ކުރިއަށްގެންދަމުންނެވެ.