އެކިއެކި ކުއްތަކާމެދު ޢާއްމުން ހޭލުންތެރިކުރުމަށް ކުއްތަކާގުޅޭ މަޢުލޫމާތު ހިމެނޭ ބިލްބޯޑުތަކެއް މަގުމަތީގައި ހަރުކުރުމުގެ މަސައްކަތް ފުލުހުން ފަށައިފިއެވެ. މިއީ މުޖުތަމަޢުގައި ޢާއްމުކޮށް ހިންގާ ކުއްތަކުގެ މަޢުލޫމާތު ވީހާވެސް ފަސޭހައިން ޢާއްމުނަށް ފޯރާނެ މަގުފަހިކުރުމަށް ފުލުުހުން ފަށާފައިވާ މަސައްކަތެކެވެ.
މިމަސައްކަތުގެ ދަށުން ފުލުހުން އެންމެ ފުރަތަމަ ބިލްބޯޑުތައް ބަހައްޓަން ފަށާފައިވަނީ ހުޅުމާލޭގައެވެ. ފުރަތަމަ ބޯޑު ބަހައްޓާފައިވަނީ ހުޅުމާލޭ ގުލްޗަންޕާ މަގުގައެވެ. ފުލުހުން ބުނެފައިވަނީ ބޯޑުތައް ބެހެއްޓުމުގެ ފުރަތަމަ ބުރުގައި ބޯޑުތައް ބެހެއްޓުމަށް ހަމަޖެހިފައިވަނީ ހުޅުމާލޭގެ ސްކޫލްތައް ހުންނަ ސަރަޙައްދުތައްކަމަށެވެ. އެގޮތުން މިބުރުގައި ހުޅުމާލޭގެ 5 ސްކޫލެއް ހުންނަ ސަރަޙާއްދުގައި ބޯޑު ބަހެއްޓުމަށްވަނީ ހަމަޖެހިފައެވެ.
މި ބޯޑުތަކުގައި ކޮންމެ ބޯޑެއްގައި މުޖުތަމަޢުގައި އާއްމުކޮށް ހިނގާ ކުއްތަކުގެ ތެރެއިން 3 ކުށެއްގެ މަޢޫލޫމާތާއި، އެފަދަ ކުއްތަކުން ދުރުހެލިވުމާއި ގުޅޭ މަޢުލޫމާތު ހިމަނާފައިވެއެވެ. މީގެރޭގައި ވައްކަމާއި، ފޭރުން އަދި މަސްތުވާތަކެތި ފަދަ ކުއްތައް މުޖުތަމައުން މަދުކުރުމަށް އެޅިދާނެ ފިޔަވަޅުތަކާއި ގުޅޭގޮތުން ވަނީ ހިމަނާފައެވެ.
ސްކޫލްތައް ހުންނަ ސަރަހައްދުތަކުގައި ބޯޑުތައް ބެހެއްޓުމަށް ނިންމީ މިއީ އާއްމުކޮށް މީހުން އެއްވެ އުޅޭ ސަރަޙައްދުތަކަށް ވުމާއި، ވީހާވެސް ގިނަ މީހުންނަށް މި މެސެޖުތައް ފޯރުކޮށްދިނުމަށެވެ. އަދި މިކަމަށް ކުޑަކުދިން ހޭލުންތެރިކޮށް، އަންނަންއޮތް ޖީލުތަކަކީ ކުއްތަކުން ރައްކާތެރި މުޖުތަމަޢުއަކަށް ހެދުމަށެވެ.
ބޯޑުތައް ފަރުމާކޮށްފައިވަނީވެސް ތުއްތުކުދިންނަށް ޢާމާޒުކޮށްގެން، އެ ކުދިން ކިޔަން ޝަޢުގުވެރިވާގޮތަށް ފޮޓޯއާއި ލިޔުން ހިމަނައިގެންނެވެ. މިބޯޑުތަކުގައި ކުއްތައް ތިޕޯޓްކުތާނެ ގޮތާއި، އަދި އިތުރު މަޢުލޫމާތުތައް ހޯދުމަށް ގުޅާނެގޮތުގެ މަޢުލޫމާތުވެސް ހިމެނާފައިވެއެވެ.