އުދައިގެ އަސަރުކުރުން އެކަށީގެންވާތީ ދުރާލާ ރައްކާތެރިކަމުގެ ފިޔަވަޅު އެޅުން މުހިއްމު - އެން.ޑީ.އެމް.އޭ

ރާއްޖޭގެ ބައެއް ރަށްތަކަށް މިދުވަސްވަރު އުދައިގެ އަސަރު ކުރުން އެކަށީގެންވާތީ، ދުރާލާ ރައްކާތެރިކަމުގެ ފިޔަވަޅު އެޅުމަށް ނެޝެނަލް ޑިޒާސްޓަރ މެނޭޖްމަންޓް އޮތޯރިޓީ، އެން.ޑީ.އެމް.އޭއިން އިލްތިމާސްކުރައްވައިފއެވެ.

ޕީ.އެސް.އެމް ނިއުސްއަށް މަޢުލޫމާތުދެއްވަމުން އެން.ޑީ.އެމް.އޭގެ ޗީފް އެގްޒެކެޓިވް ހިސާން ޙަސަން ވިދާޅުވީ، އުދައިގެ އަސަރުކޮށްގެން މިހާތަނަށް އެ އޮއޯރިޓީއަށް ރިޕޯޓް ލިބިފައިވަނީ 2 ރަށަކުންނެވެ.

އެގޮތުން ރ. ކިނޮޅަހާއި، އެއަތޮޅު އިނގުރައިދޫއަށް ރޭގެ ވަގުތެއްގައި ވަރަށް ބޮޑަށް އުދަ އަރާފައިވާކަމުގެ ރިޕޯޓު ލިބިފައިވާކަމަށާއި، މީހުންގެ މުދަލަށާއި ގޯތޮގެދޮރަށް ގެއްލުން ލިބިފައިވާކަމަކަށް ދެ ރަށުންވެސް ރިޕޯޓުކޮށްފައިނުވާކަމަށެވެ.

ނަމަވެސް ރާޅު ބޮޑުވި ވަގުތު ބަނދަރުގެ ނެރުބައްތިތަކަށާއި، ނެރުފައިކަށްޓަށް ކޮންމެވެސް ވަރެއްގެ ގެއްލުންތަކެއް ލިބިފައިވާކަމަށް 2 ރަށުގެ ކައުންސިލުންވެސް މަޢުލޫމާތުދީފައިވާކަމަށް ޙިސާން ވިދާޅުވިއެވެ.

ޙިސާން ވިދާޅުވީ، މިދުވަސްވަރު ރާއްޖޭގެ ބައެއް ސަރަޙައްދުތަކަށް އުދައަރާނެކަމަށް މޫސުމާބެހޭ ޤައުމީ އިދާރާއިން ލަފާކޮށްފައި ވާއިރު، ކައުންސިލުތަކާއި، އާއްމު ރައްޔިތުންވެސް ދުރާލާ އެކަމަށް ތައްޔާރުވުން މުހިއްމުކަމަށެވެ. އެގޮތުން އާއްމުކޮށް އުދައަރާ ރަށްރަށުން، އުދަ އަރާ ސަރަޙައްދުތަކުގައި ހުރި ގޯތިގެދޮރަށް ފެން ނުވަންނާނެހެން ވެލިބަސްތާޖަހާ، މުދަލާއި ހިފާގެންގުޅޭ ތަކެއްޗަށް ފެނުގެ އަސަރު ނުކުރާނެހެން ރައްކާތެރިކުރުމަށް ޙިސާން ވަނީ އިލްތިމާސްކުރައްވާފައެވެ.

މިދުވަސްވަރު އިރުވައި މޫސުމުގެ ހަޅަޖަހަމުންދާތީވެ، ރާއްޖޭގެ ކަނޑުތަކުގެ ބާނިބޮޑުވެ، ކަނޑުގަދަވުމުގެ ސަބަބުން ރާއްޖޭގެ ހުރިހާ ހިސާބަކަށް ކުރިއަށްއޮތް 24 ގަޑިއިރުވެސް އުދައިގެ އަސަރުކުރާނެކަމަށް މޫސުމާބެހޭ ޤައުމީ އިދާރާއިން ވަނީ ވިދާޅުވެފައެވެ. ނަމަވެސް އާދަޔާ ޚިލާފަށް އުދައަރާފާނެކަމަށް ލަފާނުކުރެވޭކަމަށްވެސް އެ އިދާރާއިން ވަނީ ވިދާޅުވެފައެވެ.

މޫސުމާބެހޭ ޤައުމީ އިދާރާއިން އާއްމުކޮށްފައިވާ އެންމެފަހުގެ މަޢުލޫމާތަށް ބަލާއިރު، ދެކުނާއި މެދުތެރޭގެ އެކި ހިސާބަށް ކެރީގެ އަސަރު ފޯރާނެކަމަށާއި، ބައެއް ރަށްތަކަށް ގުގުރުން އެކަށީގެންވާކަމަށް ވަނީ ލަފާކޮށްފައެވެ. އަދި އިރުއުތުރާއި އިރުން، މެދުތެރޭގެ އަތޮޅުތަކަށް ގަޑިއަކު 15 މޭލާއި، 25 މޭލާ ދެމެދުގެ ބާރުމިނުގައި ވައިޖެހޭނެކަމަށާއި، އެހެން ހިސާބުތަކަށް ގަޑިއަކު 8 މޭލާއި 18 މޭލާ ދެމެދުގެ ބާރުމިނުގައި ވައިޖެހޭނެކަމަށްވެސް މޫސުމާބެހޭ ޤައުމީ އިދާރާއިން ވިދާޅުވެފައިވެއެވެ.

މީގެ އިތުރުން މެދުތެރޭގެ ކަނޑުތައް އާއްމުގޮތެއްގައި ގަދަވާނެކަމަށާއި، އެހެން ހިސާބުތަކުގެ ކަނޑުތައް އާދައިގެ ވަރަކަށް ގަދަވާނެކަމަށްކަމަށް ލަފާކޮށްފައިވާއިރު، 5 ފޫޓާއި 7 ފޫޓާއި ދެމެދުގެ އުސްމިނަށް މެދުތެރޭގެ ކަނޑުތަކުގައި ރާޅު ނަގާނެކަމަށާއި، އެހެން ހިސާބުތަކުގައި 3 ފޫޓާއި 5 ފޫޓާ ދެމެދުގެ އުސްމިނަކަށް ރާޅު ނެގުން އެކަށީގެންވާކަމަށްވެސް މޫސުމާބެހޭ ޤައުމީ އިދާރާއިން ވިދާޅުވެއެވެ.