ހުޅުމާލެ ފުރަތަމަ ފިޔަވައްސާއި ދެވަނަ ފިޔަވަހި ގުޅުވައިދޭ ބުރިޖުތަކުގެ މަސައްކަތް މާރިޗުމަހު ނިމޭނެ - އެޗް.ޑީ.ސީ

ހުޅުމާލޭ ފުރަތަމަ ފިޔަވައްސާއި ދެވަނަ ފިޔަވަހި ގުޅާލުށް ހަދާ ކަނެކްޓިންގ ބްރިޖުތަކުގެ މަސައްކަތް މާރިޗު މަހުގެ ނިޔަލަށް ނިންމާލެވޭނެކަމުގައި ހައުސިންގ ޑިވެލޮޕްމަންޓް ކޯޕަރޭޝަން، އެޗް.ޑީ.ސީގެ މެނޭޖިންގ ޑިރެކްޓަރ ސުޙެއިލް އަޙްމަދު ވިދާޅުވެއްޖެއެވެ.

ހުޅުމާލޭ ފުރަތަމަ ފިޔަވައްސާއި ދެވަނަ ފިޔަވަހި ގުޅާލުމަށް 4 ބްރިޖެއް އެޅުމުގެ މަސައްކަތް އަންނަނީ ކުރަމުންނެވެ.

ހުޅުމާލޭ ފުރަތަމަ ފިޔަވައްސާއި ދެވަނަ ފިޔަވަހި ގުޅާލުމަށް ހަދާ ކަނެކްޓިންގ ބްރިޖުތަކުގެ މަސައްކަތްކުރަމުންދަނީ ޗައިނާ ސްޓޭޓް ކޮންސްޓްރަކްޝަން މޯލްޑިވްސް ޕްރައިވެޓް ލިމިޓެޑުގެ ފަރާތުންނެވެ. މިއީ ސަޢުދީ ފަންޑް ފޯރ ޑިވެލޮޕްމަންޓް، އެސް.އެފް.ޑީގެ ފަންޑު އެހީގައި ކުރިއަށްގެންދާ މަޝްރޫޢެކެވެ.

މި މަޝްރޫޢުގެ ދަށުން ހުޅުމާލޭގެ ފުރަތަމަ ފިޔަވައްސާއި ދެވަނަ ފިޔަވަހި ގުޅާލައި، ފަސޭހައިން ވެހިކަލްތަކަށް ދަތުރުކުރެވޭނެ ގޮތް ހެދުމުގެ ގޮތުން 4 ބްރިޖެއް އެޅުމުގެ މަސައްކަތް ދަނީ ކުރަމުންނެވެ.

ޕީ.އެސް.އެމް ނިއުސްއަށް މަޢުލޫމާތު ދެއްވަމުން އެޗް.ޑީ.ސީގެ މެނޭޖިންގ ޑިރެކްޓަރ ސުޙެއިލް އަޙްމަދު ވިދާޅުވީ، މި ހަތަރު ބުރިޖަށް ބޭނުންވާ ކޮންސްޓްރަކްޝަންގެ ހުރިހާ މަސައްކަތްތައް ނިމިފައިވާކަމަށެވެ. އަދި ބްރިޖުތަކުގައި ތާރުއެޅުމަށް މިހާރު ތައްޔާރުވެފައިވާކަމަށާއި، މާރިޗުމަހުގެ ނިޔަލަށް 4 ބްރިޖުގެ މަސައްކަތްވެސް އެއްކޮށް ނިންމާލެވޭނެކަމަށް ސުޙެއިލް ވިދާޅުވިއެވެ.

ސުޙެއިލް ވިދާޅުވީ، ހުޅުމާލޭ ދެވަނަ ފިޔަވަހީގައި ބޮޑެތި ކޮންސްޓްރަކްޝަން މަސައްކަތްތަކެއް ކުރިއަށްދާތީ، ބްރިޖުގެ މަސައްކަތް ނިންމުންކަމުގައިވިޔަސް އާއްމުންނަށް ދަތުރުކުރުމަށް ހުޅުވާލުމަށް އަދި ނިންމާފައިނުވާކަމަށެވެ.

"ބްރިޖުތަކުގެ ކޮންކްރީޓް މަސައްކަތް ނިމިފައި އެވަނީ. މިހާރު ތާރު އެޅުމަށް އެދަނީ ތައްޔާރުވަމުން. މިއަހަރުގެ މާރިޗުމަހުގެ ނިޔަލަށް ބްރިޖުތަކުގެ ހުރިހާ މަސައްކަތެއް ނިމޭނެ. މަސައްކަތް ނިމުނަސް، ފޭސް 2 ގައި އަދިވެސް ރެސްޓްރިކްޝަންތަކެއް ގެންގުޅެންޖެހޭތީވެ، އާއްމުންނަށް ބްރިޖުތައް ބޭނުންކުރުމަށް އަދި ހުޅުވާ ނުލެވިދާނެ" އެޗް.ޑީ.ސީގެ މެނޭޖިންގ ޑިރެކްޓަރ ސުޙެއިލް އަޙްމަދު ވިދާޅުވިއެވެ.

މެދަށް އުސްކޮށް ފަރުމާކޮށްފައިވާ މި ބްރިޖުތައް ޑިޒައިންކޮށްފައި ވަނީ އިންޖީނުލީ އުޅަނދުތަކަށް ޚާއްސަ 2 ލޭނާއެކުއެވެ. ހުޅުމާލެ ފޭސް 1 އަދި ފޭސް 2 ގުޅާލުމަށް ހަދާ ބްރިޖުތަކުގެ މަސައްކަތުގެ ބޮޑުބައެއް މިހާރު ނިމިފައިވާއިރު، ދެ ފޭސްގެ ދެމެދުން ލޮނުގަނޑު ދައުރު ކުރުމަށް ހަދާފައިވާ ކޯރުގެ މަސައްކަތް ކުރިއަށްގެންދިއުމަށްޓަކައި، ކޮންޓްރެކްޓަރަކު ހަމަޖައްސައި، މޮބިލައިޒޭޝަންގެ މަސައްކަތްތައް ފަށާފައިވާކަމަށްވެސް އެޗް.ޑީ.ސީން ވަނީ ވިދާޅުވެފައެވެ.