ފާއިތުވި އަހަރެއްހައި ދުވަހުގެ ތެރޭގައި ސިފައިންގެ ޚިދުމަތަށް ލިބުނު އެންމެ ބޮޑު ކާމިޔާބަކީ ސިޔާސީ ނުފޫޒުން އެއްކިބާވެ، ސިފައިންގެ ޢަދުލުގެ ނިޒާމެއް ޤާއިމްކުރެވުންކަމަށް ޑިފެންސް މިނިސްޓަރ އަލްއުސްތާޛާ މާރިޔާ އަޙްމަދު ދީދީ ވިދާޅުވެއްޖެއެވެ. މިނިސްޓަރ މިހެން ވިދާޅުވީ ޕީއެސްއެމް ނިއުސްއަށް ދެއްވި ޚާއްޞަ އިންޓަރވިއުއެއްގައެވެ.
ފާއިތުވި އަހަރު ދިވެހި ސިފައިންގެ ޚިދުމަތުން ހޯދާފައިވާ ކާމިޔާބީއާއި ގުޅޭގޮތުން ވާހަކަފުޅު ދައްކަވަމުން ޑިފެންސް މިނިސްޓަރ މާރިޔާ އަޙްމަދު ދީދީ ވިދާޅުވީ، މީގެ ކުރިން ސިފައިންނަށް އެންމެ ބޮޑަށް އަމާޒުވި ތުހުމަތުތަކަކީ ސިޔާސީ ނުފޫޒު ފޯރުވުންކަމަށެވެ. މިނިސްޓަރ ވިދާޅުވީ، ސިފައިންނަށް މިހާރު އެއްވެސް ސިޔާސީ ނުފޫޒެއް ނުފޯރުވާނެކަމަށާ، އެކަންކަމުން މުޅި މުއައްސަސާ އެއްކޮށް އެއްކިބާކޮށްފައިވާކަމަށެވެ. އެގޮތުން ސިފައިންގެ ޢަދުލުގެ ނިޒާމް ޤާއިމްކޮށް ޢަމަލުކުރަންފަށާފައިވާކަން ފާހަގަކުރައްވާ ޑިފެންސް މިނިސްޓަރ މާރިޔާ ވިދާޅުވީ، ސިފައިންނަށް ތުހުމަތުކުރެވޭ ކަންކަން އެޕީލްކުރާނެ ކޮމިޓީ އުފައްދާ ޤާނޫނީ ގޮތުން ލިބެންޖެހޭ އެހީތެރިކަން ސިފައިންނަށް ފޯރުކޮށްދެމުން އަންނަކަމަށެވެ. ސިފައިން ސިޔާސީ ވެގެން އުޅުއްވާތަން މިހާރު ނުފެންނާނެކަމުގެ ޔަޤީންކަން މިނިސްޓަރ ދެއްވިއެވެ.
"އެއީ ޕީޕީއެމް މީހަކަސް އެއީ އެމްޑީޕީ މީހަކަސް ބަލިވެއްޖެއްޔާ ހަމަ ސީއެމްބިއުލާންސްއިން މާލެ ގެންނާނެ. އެނޫން ޚިދުމަތްތައްވެސް މިހާރު ޙާލުގައިޖެހިއްޖެއްޔާ އެއީ ކާކުގެ ދޯންޏެއްތޯ ބަލާކަށް ނުޖެހޭނެ. 191އަށް ގުޅީމަ ކޯސްޓްގާޑްގެ ޚިދުމަތް ލިބޭނެ. މިކަންކަމުގެ މިހާރު މިނިސްޓަރަށް ގުޅާކަށް ނުޖެހޭނެ. އެ ލިބެންޖެހޭ ޚިދުމަތް ހުރިހާ ރައްޔިތުންނަށް ހަމަހަމަކަމާއެކު ލިބޭނެ." މާރިޔާ ވިދާޅުވިއެވެ.
މިނިސްޓަރުގެ ވާހަކަފުޅުގައިވަނީ އަދުގެ ސަރުކާރު ވެރިކަމަށްއާއިރު ސިފައިންގެ އުޅަނދުތައް ވަރަށް ބޮޑަށް ހަލާކުވެ މަރާމަތަށް ބޭނުންވެފައިވާކަމަށް ވިދާޅުވެފައެވެ. ނަމަވެސް އަވަށްޓެރި ޤައުމުތަކުގެ އެހީގައި އެއުޅަނދުތައް މަރާމާތުކޮށް ސިފައިންގެއަށް ބޭނުންވާ އިތުރު ވަސީލަތްތައްވެސް ހޯދާފައިވާކަމަށް ޑިފެންސް މިނިސްޓަރ ވިދާޅުވިއެވެ.
"އަޅުގަނޑުމެން ސަރުކާރާ ހަވާލުވީއިރު އުޅަނދުތަކާއި ވަސީލަތްތައް ހުރީ ވަރަށް ބޮޑަށް ހަލާކުވެފައި. އެ އެހީތެރިކަން ހޯދާ، އަވަށްޓެރި ޤައުމުތަކުގެ އެހީގަ ލީތަލް، ނޮންލީތަލް ރަނގަޅު ސްޓޮކެއް ހޯދިފައިވާނެ. ޕެޓްރޯލިއަމް ވެސެލްއެއްވެސް ލިބިއްޖެ. އެއީ ވަރަށް ބޮޑު ކާމިޔާބީއެއް ކޯސްޓްގާޑަށް ލިބިގެންދިޔަ. ބަޖެޓްގައިވެސް ކޯސްޓްގާޑް މަރާމާރުކުރުމަށް ފައިސާވެސް ވަނީ ހިމަނާފައި" މާރިޔާ ވިދާޅުވިއެވެ.
މިނިސްޓަރުގެ ވާހަކަފުޅުގައި ހަރުކަށި ފިކުރާ ދެކޮޅަށް ވާހަކަދައްކަން ބިރުގަންނަ ޙާލަތުގައި ކުރިން ރާއްޖެ އޮތްކަން ފާހަގަކުރައްވައި ވިދާޅުވީ، އެކަންކަން ދައުލަތުގެ މަތީފަންތީގައި މަޝްވަރާކޮށް އެކަންކަމާ ދެކޮޅަށް ބަސްބުނުގެ ފުރުޞަތު ހޯދާދީފައިވާކަމަށެވެ. އަދި ހަރުކަށި ފިކުރާއި ދެކޮޅަށް ކުރެވުނު މަސައްކަތްތަކުގެ ނަތީޖާ ރަނގަޅުކަމަށްވެސް ޑިފެންސް މިނިސްޓަރ މާރިޔާ އަޙްމަދު ދީދީ ވިދާޅުވިއެވެ.