އާމްދަނީން ޓެކްސް ނެގުމުގެ ޤާނޫނަށް މިއަދު އަމަލުކުރަން ފަށައިފިއެވެ.
އާމްދަނީން ޓެކްސް ނެގުމުގެ ޤާނޫނަށް އަމަލުކުރަން ފަށާފައިވާއިރު، އެޤާނޫނުގެ ދަށުން އެކުލަވާލަންޖެހޭ އާމްދަނީން ޓެކްސް ޤަވާއިދު މިހާރު ވަނީ ގެޒެޓްކޮށްފައެވެ.
ފަރުދުންނަށް ލިބޭ އާމްދަނީން ޓެކްސް ނެގުމުގެ ޤާނޫނުގެ ދަށުން ހަދާފައިވާ އާމްދަނީން ޓެކްސް ނެގުމުގެ ޤަވާއިދުގައި، ޤާނޫނުގައި ބަޔާންކޮށްފައިވާ އެކިއެކި ކަންކަމުގައި ޢަމަލުކުރާނެގޮތް ކަނޑައަޅާފައިވެއެވެ. މީގެ ތެރޭގައި، އާމްދަނީން ނެގޭ ޓެކުހަށް ޓެކްސް ދައްކާ ފަރާތްތައް ރަޖިސްޓަރީކުރުމާއި ޓެކްސް ބަޔާން ހުށަހެޅުމުގައި ޢަމަލުކުރަންޖެހޭ އުސޫލުތައް ހިމެނެއެވެ.
އާމްދަނީން ޓެކްސް ނެގުމުގެ ޤާނޫނުގެ ދަށުން ޓެކްސް ނަގަން ފަށާނީ މިއަދުން ފެށިގެނެވެ. އަދި މުވައްޒަފުންގެ އުޖޫރައިން ޓެކްސް ނަގަން ފަށާނީ އެޕްރީލްމަހުގެ 1 ވަނަ ދުވަހުން ފެށިގެނެވެ. މި ޤާނޫނުގެ ދަށުން 1 ޖަނަވަރީ 2020 އިން ފެށިގެން ޓެކްސް ނަގަން ފެށުމާއެކު ވަޒީފާއާ ބެހޭ ޤާނޫނުގެ ދަށުން ނަގަމުންދިޔަ ރެމިޓެންސް ޓެކްސް އަދި ދިވެހިރާއްޖޭގެ ބިމާބެހޭ ޤާނޫނުގެ ދަށުން ނަގަމުންދިޔަ ލޭންޑް ސޭލްސް ޓެކްސް އުވިގެންދާނެއެވެ.
ޓެކްސް ނެގުމާބެހޭ އިދާރީ ޤާނޫނުގެ ދަށުން މިހާރު މީރާގައި ރަޖިސްޓަރީކޮށްފައިވާ ފަރާތްތަކުން އާމްދަނީން ޓެކްސް ނެގުމުގެ ޤާނޫނުގެ ދަށުން އަލުން މީރާގައި ރަޖިސްޓަރީކުރާކަށް ނުޖެހޭނެކަމަށް ޤަވާއިދުގައި ވަނީ ކަނޑައަޅާފައެވެ. އަދި އެ ފަރާތްތައް އާ ޤާނޫނުގެ ދަށުން ރަޖިސްޓަރީކުރުމުގެ ކަންތައްތައް މީރާއިން ކުރިއަށް ގެންދާނެކަމަށްވެސް މީރާއިން ބުނެއެވެ.
އާމްދަނީން ޓެކްސް ނެގުމުގެ ޤާނޫނާއި ޤަވާއިދުގައި ވާގޮތުން މުވައްޒަފުންގެ އުޖޫރައިން ނެގޭ ވިތުހޯލްޑިންގ ޓެކްސް ދައްކަންޖެހޭ ފަރާތްތައް މީރާގައި ރަޖިސްޓަރީކުރުމަކީ ވަޒީފާ ދޭ ފަރާތުގެ ޒިންމާއެކެވެ. މިގޮތުން، ވަޒީފާ އަދާކުރާ ފަރާތްތައް ޓެކުހަށް ރަޖިސްޓަރީ ކުރަންޖެހޭނީ އުޖޫރައިގެ ގޮތުގައި ފަސްދޮޅަސް ހާސް ރުފިޔާ ލިބޭނަމަ، ނުވަތަ ލިބޭނެ ކަމަށް އަންދާޒާކުރެވޭނަމައެވެ.
ވިޔަފާރި ރަޖިސްޓަރީކުރުމުގެ ޤާނޫނުގެ ދަށުން ރަޖިސްޓަރީކުރަންޖެހޭ އެންމެހާ ފަރާތްތައް އާމްދަނީން ޓެކްސް ނެގުމުގެ ޤާނޫނު ދަށުން ރަޖިސްޓަރީކުރަން ޖެހެއެވެ.