ހުޅުމާލޭގެ ކަރަންޓުގެ ކެޕޭސިޓީ ސަތޭކަ މެގަވޮޓަށް އިތުރުކުރުމަކީ އަމާޒެއްކަމަށް ސްޓޭޓް އިލެކްޓްރިކް ކޮމްޕެނީ ލިމިޑެޓް، ސްޓެލްކޯގެ މެނޭޖިންގ ޑިރެކްޓަރ ޙަސަން މުޣުނީ ވިދާޅުވެއްޖެއެވެ.
ޕީ.އެސް.އެމް ނިއުސްގެ އެކްސްކްލޫސިވް ޕްރޮގްރާމުގައި ވާހަކަފުޅުދައްކަވަމުން މުޣުނީ ވިދާޅުވީ، ބްރިޖު މެދުވެރިކޮށް އިންޓަރ-ކަނެކްޝަން ކޭބަލް އެޅުމުގެ މަސައްކަތް ނިންމާ، އަންނައަހަރުގެ އޯގަސްޓްމަހުގެ ތެރޭގައި މާލެ، ހުޅުލެ އަދި ހުޅުމާލޭގެ ޕަވަރގްރިޑް އެއްކޮށް ގުޅުވާލެވޭނެކަމަށެވެ.
ގްރޭޓަރ މާލޭ ސަރަހައްދުގެ އާބާދީ ދުވަހުން ދުވަހަށް އިތުރުވެ، މި ސަރަޙައްދުގެ ކަރަންޓް ޔޫސޭޖް އިތުރުވަމުންދިއުމާއެކު، ޑިމާންޑާއި އެއްވަރަށް ޚިދުމަތް ދިނުމަށްޓަކާ ސްޓެލްކޯއިން އަންނަނީ ޙާއްސަ މަސައްކަތްތަކެއް ކުރަމުންނެވެ. މީގެ ތެރޭގައި ހިމެނޭ އެންމެ މުހިއްމު އެއް މަސައްކަތަކީ މާލެއާއި ހުޅުލެއާއި ދެމެދު އަޅާފައިވާ ސިނަމާލެ ބްރިޖު މެދުވެރިކޮށް، މާލެ، ހުޅުލެ އަދި ހުޅުމާލޭގެ ކަރަންޓް ވިއުގާ ގުޅާލުމުގެ މަސައްކަތެވެ. މިއީ ދަޢުލަތުގެ ބަޖެޓުން ގާތްގަނޑަކަށް 45 މިލިއަން ޑޮލަރު ޚަރަދުކޮށްގެން ކުރިއަށްގެންދާ މަޝްރޫޢެކެވެ.
މި މަޝްރޫޢުގެ ދަށުން ކަރަންޓް ވިއުގަ ގުޅާލުމަށްޓަކާ ބޭނުންވާ ސަބްސްޓޭޝަންތައް މާލެ، ހުޅުލެ އަދި ހުޅުމާލޭގައި ހެދުމުގެ މަސައްކަތް ސްޓެލްކޯއިން މިހާރު ވަނީ ފަށާފައެވެ. މި ސަބްސްޓޭޝަންތަކަކީ ޓްރާންސްފޯރމަރުތަކެއްގެ އެހީގައި އެއްތަނުން އަނެއްތަނަށް ކަރަންޓް ދޫކުރުމަށް ހަދާ ސަބްސްޓޭޝަންތަކެކެވެ.
ސްޓެލްކޯގެ މެނޭޖިންގ ޑިރެކްޓަރ ޙަސަން މުޣުނީ ވިދާޅުވީ، ގްރޭޓަރ މާލޭ ސަރަޙައްދުގެ ޕަވަރ ސެކިއުރިޓީ ވަރުގަދަކުރުމަށް އެކުންފުނިން ކުރަމުންދާ މަސައްކަތުގެ ދަށުން، ހުޅުމާލޭގައި ކުރިއަށްދާ ފިފްތް ޕަވަރ ޕްރޮޖެކްޓާއެކު، މާލޭގެ އިންޖީނުތަކަށް އޮންނަ ލޯޑު އެތައް ގުނައެއް ކުޑަކުރެވިގެންދާނެކަމަށެވެ. އަދި ބްރިޖު މެދުވެރިކޮށް މާލެއާއި ހުޅުމާލެއާއި ދެމެދު އަޅާ އިންޓަރ-ކަނެކްޝަން ކޭބަލަކީ 100 މެގަވޮޓާއި ހަމައަށް ކަރަންޓް ޓްރާންސްފަރކުރުމުގެ ޤާބިލުކަން ލިބިފައިވާ ކޭބަލްތަކެއްކަމަށްވުމުން، ހުޅުމާލޭގެ ޕަވަރ ކެޕޭސިޓީ 100 މެގަވޮޓާއި ހަމައަށް އިތުރުކުރުމަކީ އެކުންފުނީގެ އަމާޒެއްކަމަށް މުޣުނީ ވިދާޅުވިއެވެ.
"ހުޅުމާލޭގައި އަލަށް މި އެޅި އިންޖީނުގެއަކީ 2 އަހަރަށް ބޭނުންވާ މިންވަރަށް ކަރަންޓް އުފެއްދޭނެ ތަނެއް. ހުޅުމާލޭގައިވެސް އިތުރު އެކްސްޓެންޝަނަކަށް ދިއުން ޕްލޭންގައި އެބައޮތް. ޖުމްލަ 100 މެގަވޮޓަށް އަންނާނެ. 50 މެގަވޮޓު އެވަނީ އެޅިފައި. އަނެއް 50 މެގަވޮޓު ޕްލޭން ކުރަމުންމިދަނީ" ސްޓެލްކޯގެ މެނޭޖިންގ ޑިރެކްޓަރ ޙަސަން މުޣުނީ ވިދާޅުވިއެވެ.
މުޣުނީ ވިދާޅުވީ، އިންޓަރ-ކަނެކްޝަން ކޭބަލް އަޅާ ނިމި، ހުޅުމާލޭ އައު އިންޖީނުގެ އޮޕަރޭޝަނަށް ގެނެވުމާއެކު އެކުންފުނީގެ ކަރަންޓުގެ ޚިދުމަތް އޮޓޮމެޓިކް ނިޒާމަކަށް ބަދަލުކުރެވިގެންދާނެކަމަށެވެ. މުޣުނީ ވިދާޅުވީ، ތިލަފުށްޓާއި، ގުޅީފަޅާއި، ވިލިމާލޭގެ ކަރަންޓުވެސް އެއް ވިއުގަރއަކުން ގުޅާލުމަކީ އެކުންފުނީގެ އަމާޒެއްކަމަށާއި، އެކަމަށް ބޭނުންވާ ދިރާސާތައް މިހާރު ކުރަމުންދާކަމަށެވެ.
"އަޅުގަނޑުމެންގެ ޕަވަރ ސެކިއުރިޓީ ޕްލޭންގައި އެބައޮތް މާލެއާއި ހުޅުލެއާއި ހުޅުމާލެ އެއް ވިއުގަރއަކުން ގުޅާލުމުގެ އިތުރުން، ތިލަފުށްޓާއި، ގުޅީފަޅާއި، ވިލިމާލެ ހިމެނޭހެން ކަރަންޓު ވިއުގަރ ގުޅާލުންވެސް. އޭރުން ގްރޭޓަރ މާލޭ ޒޯން އެއްކޮށް ކަނެކްޓްކޮށްލެއްވުނީ އަޅުގަނޑުމެންނަށް" މުޣުނީ ވިދާޅުވިއެވެ.
މާލޭ ސަރަޙައްދުގެ ޕަވަރ ސެކިއުރިޓީ ވަރުގަދަ ކުރުމަށް ހިންގާ މަޝްރޫޢާއެކު ކަރަންޓުގެ ޚިދުމަތް ފޯރުކޮށްދިނުމުގައި މިހާރަށްވުރެ ލުއިފަސޭހަވެގެންދާނެކަމަށް ސްޓެލްކޯއިން ބުނެއެވެ. ވަކިން ޙާއްސަކޮށް ޖަނަރޭޓަރުތައް އޯވަރލޯޑުވެގެން ކަރަންޓު ކެނޑޭކެނޑުން ނިމުމަކަށް އައިސް، ޕަވަރ ޝޯޓޭޖެއް އަތުވެއްޖެ ހާލަތެއްގައި ކުޑަވަގުތުކޮޅެއްގެ ތެރޭގައި ކަރަންޓު އަނބުރާ ފޯރުކޮށްދެވޭނެކަމަށް އެކުންފުނިން ބުނެއެވެ.