ހުޅުމާލޭ ދެވަނަ ފިޔަވަހީގައި 1700 ހައުސިންގ ޔުނިޓް އެޅުމަށް ތައްޔާރުވަމުންދާކަމަށް މިނިސްޓްރީ އޮފް ހައުސިންގ އެންޑް އަރބަން ޑިވެލޮޕްމަންޓުން ވިދާޅުވެއްޖެއެވެ. މި ފެށޭ 2020ވަނަ އަހަރު ވެގެންދާނީ ރާއްޖޭގެ ރައްޔިތުންނަށް ކުރިމަތިވެފައިވާ ބޯހިޔާވަހިކަމުގެ މައްސަލައަށް އުއްމީދީ ހައްލުތަކެއް ގެނުވާނެ އަހަރަކަށް ކަމަށް ހައުސިންގ މިނިސްޓްރީން ވިދާޅުވެއެވެ.
ދިވެހި ރައްޔިތުންނަށް ކުރިމަތިވެފައިވާ ބޯހިޔާވަހިކަމުގެ މައްސަލައަށް ހައްލެއްގެނެސް، އަތްފޯރާފަށުގައި ބޯހިޔާވަހިކަން ފޯރުވައިދިނުމަކީ ރައީސުލްޖުމްހޫރިއްޔާ އިބްރާހީމް މުޙައްމަދު ޞާލިޙުގެ ސަރުކާރުގެ އެންމެ މުހިއްމު އެއް ވަޢުދެވެ. އެގޮތުން މި ދައުރުގެ ތެރޭގައި ރާއްޖޭގެ އެކި ސަރަޙައްދުތަކުގައި ޖުމްލަ 20،000 ހައުސިންގ ޔުނިޓް އިމާރާތްކުރުމަކީ ސަރުކާރުގެ އަމާޒެކެވެ. އަދި އެކަމަށް ބޭނުންވާ ފްރޭމްވޯރކް އެގްރީމެންޓްތަކުގައި ސޮއިކޮށް، ރާއްޖޭގެ ބޯހިޔާވަހިކަމުގެ ހާލަތު ދެނެގަތުމަށް މިއަހަރުގެ ތެރޭގައި ޚާއްސަ އެސެސްމަންޓެއް ވަނީ ކުރިއަށްގެންގޮސްފައެވެ.
ހައުސިންގ މިނިސްޓްރީގެ ސްޓޭޓް މިނިސްޓަރ އަޙްމަދު ނަޝީދު ވިދާޅުވީ، ހުޅުމާލޭ ދެވަނަ ފިޔަވަހީގައި 1700 ހައުސިންގ ޔުނިޓުގެ ޢަމަލީ މަސައްކަތްފެށުމަށް މިހާރު ތައްޔާރުވަމުންދާކަމަށެވެ. އަދި އެކަމަށް ބޭނުންވާ ފައިސާގެ ކަންކަން ހަމަޖެހި، ކައިރި މުސްތަޤުބަލެއްގައި ހައުސިންގ ޔުނިޓްތަކުގެ ބިންގާ އެޅިގެންދާނެކަމަށް ނަޝީދު ވިދާޅުވިއެވެ.
"އެންމެ އަވަހަށް ފެށޭތޯ މި މަސައްކަތްކުރަނީ ހުޅުމާލޭގައި 1700 ހައުސިންގ ޔުނިޓް އެޅުމުގެ މަސައްކަތް. ޑިވެލޮޕަރގެ ފަރާތުން މި މަޝްރޫޢަށް ފައިސާ ޚަރަދުކުރުމަށް ރާވާފައިވާގޮތުގެ ޓަރމް ޝީޓް މިހާރު ވަނީ ހުށަހަޅާފައި. އެ ދިރާސާކުރުމަށްފަހު ފައިސާގެ ކަންކަން ފައިނަލްވީމަ ބިންގާ އަޅާފައި މަސައްކަތް ކުރިއަށްގެންދެވޭ ހިސާބުގައި މިހާރު އޮތީ" އޭނާ ވިދާޅުވިއެވެ.
ނަޝީދު ވިދާޅުވީ، އެ މިނިސްޓްރީން ކުރިއަށްގެންދިޔަ ހައުސިންގ ނީޑް އެސެސްމަންޓުގެ ހޯދުންތަކަށް ބަލާ، 20،000 ހައުސިންގ ޔުނިޓް އަތޮޅުތަކަށް ބަހާލުމުގެ މަސައްކަތް ކުރަމުންދާކަމަށެވެ. އަދި ހައުސިންގ ޔުނިޓްތައް ބެހުމުގައި އާބާދީގެ ނިސްބަތަށް އިސްކަންދިން ނަމަވެސް އެއްވެސް އަތޮޅެއް ބާކީ ނުކުރާނެކަމަށް އޭނާ ވިދާޅުވިއެވެ.
ސްޓޭޓް މިނިސްޓަރ ވިދާޅުވީ، 20،000 ހައުސިންގ ޔުނިޓްގެ އަމަލީ މަސައްކަތްވެސް އަންނައަހަރުގެ ކުރީކޮޅު ފެށުމަކީ ސަރުކާރުގެ އަމާޒެއްކަމަށާއި، އެކަމަށް ބޭނުންވާ ތައްޔާރީތައް މިހާރު ވަމުންދާކަމަށެވެ.
"ފްރޭމްވޯރކް އެގްރީމެންޓުގައި ސޮއިކުރާ ހިސާބުން ޑިވެލޮޕަރ ފައިނޭންސް ހޯދުމާއި، ޑީޓެއިލް ޑިޒައިން ހެދުމާއި، މަސައްކަތް މޮބިލައިޒްކުރުމަށް ބޭނުންވާ ޑޮކިއުމަންޓްތައް ތައްޔާރުކުރުމުގެ މަސައްކަތް ކުރިއަށްދާނެ. އަޅުގަނޑުމެންނަށް 2020 ވަނަ އަހަރުގެ ވަރަށް ކުރީކޮޅު މި މަޝްރޫޢުގެވެސް ޢަމަލީ މަސައްކަތް ފެށިގެންދާނެ" ނަޝީދު ވިދާޅުވިއެވެ.
ސަރުކާރުގެ ހައުސިންގ ސްކީމްތަކަށް ފަސޭހައިން ކުރިމަތިލެވޭނެ އިންތިޒާމް ހަމަޖެއްސުމުގެ ގޮތުން "މަގޭ ހިޔާވެހި"ގެ ނަމުގައި ޚާއްސަ ޕޯޓަލެއް ލޯންޗުކޮށްފައިވާއިރު، މި ޕޯޓަލް މެދުވެރިކޮށް ހައުސިންގ ސްކީމްތަކަށް ކުރިމަތިލުމަށް އަންނަ އަހަރުގެ ކުރީކޮޅު ތައްޔާރުވަމުންދާކަމަށްވެސް ހައުސިންގ މިނިސްޓްރީން ވިދާޅުވެއެވެ. މީގެ އިތުރުން، ކުރީގެ ސަރުކާރުތަކުން ހަވާލުކުރި މަޝްރޫޢުތަކުގެ ތެރެއިން 3 އަތޮޅެއްގައި ހުއްޓިފައިހުރި 352 ހައުސިންގ ޔުނިޓެއްގެ މަސައްކަތް ފެބްރުއަރީމަހު އަލުން ފެށުމަށްވެސް ހައުސިންގ މިނިސްޓްރީން ދަނީ ތައްޔާރުވަމުންނެވެ.