އެމް.ޕީ.އެލްގެ އައު ވެބްސައިޓާއި، ވެންޑަރ ޕޯޓަލްއާއި ބަސް އެޕްލިކޭޝަން ރަސްމީކޮށް އިފްތިތާހްކޮށްފި

މޯލްޑިވްސް ޕޯޓްސް ލިމިޑެޓްގެ އައު ވެބްސައިޓާއި، ވެންޑަރ ޕޯޓަލް އާއި ބަސް އެޕްލިކޭޝަން ރަސްމީކޮށް އިފްތިތާހްކޮށްފިއެވެ..

މިކަމަށްޓަކާ ޗަމްޕާ ސެންޓަރަލް ހޮޓެލްގައި ބޭއްވި ޚާއްސަ ރަސްމިއްޔާތެއްގައި އެމް.ޕީ.އެލްގެ އައު ވެބްސައިޓާއި، ޕޯޓަލް އާއި ބަސް އެޕްލިކޭޝަން އިފްތިތާހްކޮށްދެއްވީ މިނިސްޓަރ އޮފް ޓްރާންސްޕޯޓް އެންޑް ސިވިލް އޭވިއޭޝަން އައިޝަތު ނަހުލާއެވެ.

އެމް.ޕީ.އެލްގެ އައު ވެބްސައިޓާއި، ވެންޑަރ ޕޯޓަލް އާއި މާލޭ ބަސް އެޕްލިކޭޝަން ޑިޒައިންކޮށް ޑިވެލޮޕްކޮށްފައިވަނީ އެމް.ޕީ.އެލްގެ މުވައްޒަފުން އަމިއްލައަށް ކަމަށް އެކުންފުނިން ބުނެއެވެ. މިއީ ނަޒާޙަތްތެރިކަމާއި، ހަމަހަމަކަމާއެކު އަވަސް ޚިދުމަތްތަކެއް ދިނުމުގެ މަޤުޞަދުގައި ތަޢާރަފުކުރި ވަޞީލަތްތަކެއްކަމަށް އެމް.ޕީ.އެލުން ބުނެއެވެ.

އެމް.ޕީ.އެލްގެ ޗީފް އެގްޒެކެޓިވް އޮފިސަރ، ސީ.އީ.އޯ ޝާހިދު ޢަލީ ވިދާޅުވީ، އެމް.ޕީ.އެލްގެ ޚިދުމަތްތައް ޒަމާނީކުރުމަށް ކުރަމުންދާ މަސައްކަތުގެ ދަށުން އަލަށް ތަޢާރަފުކުރި ވެބްސައިޓް މެދުވެރިކޮށް އެކުންފުންޏާއި ގުޅޭ މުހިއްމު ބޭނުންތެރި މަޢުލޫމާތުތަކެއް ލިބިގެންދާނެކަމަށެވެ. އެގޮތުން މުދާ ކްލިއަރކުރުމާއި، ޓެރިފް ރޭޓްތަކާއި، ޕޯޓާއި ގުޅުންހުރި ޤާނޫނުތަކާއި ޤަވާއިދުތަކާ ގުޅޭ މަޢުލޫމާތުތައް ފަސޭހަކަމާއެކު ލިބިގެންދާނެކަމަށް ޝާހިދު ވިދާޅުވިއެވެ.

"އައު ވެބްސައިޓާއި ވެންޑަރ ޕޯޓަލުން މުހިއްމު މަޢުލޫމާތުތަކެއް ކުންފުންޏާގުޅޭ ލިބޭނެ. އެމް.ޕީ.އެލްގެ މުހިއްމު ޚިދުމަތްތައް މިސާލަކަށް މުދާ ކްލިއަރކުރުން، އަދި ކްލިއަރކުރުމަށް ބޭނުންވާ ޓެރިފްތަކުގެ މަޢުލޫމާތު އަދި އާއްމު ޤަވާއިދުތައްފަދަ މަޢުލޫމާތުތައް ފަސޭހައިން ދެނެގަނެވޭނެހެން ވެބްސައިޓު ފަރުމާކޮށްފައި ވާނީ" ޝާހިދު ވިދާޅުވިއެވެ.

އެމް.ޕީ.އެލްގެ ސީ.އީ.އޯ ޝާހިދު ވިދާޅުވީ، އެކުންފުންޏަށް އެކި ކަހަލަ މުދަލާއި ޚިދުމަތް ފޯރުކޮށްދޭ ފަރާތްތަކަށް ޚާއްސަކޮށްގެން ތަޢާރަފުކުރި ވެންޑަރ ޕޯޓަލާއެކު، އެކުންފުނީގެ ޕްރޮކިއުމަންޓް ކަންތައްތައްވެސް ޑިޖިޓަލްވެގެންދާނެކަމަށެވެ. އެގޮތުން އޮންލައިންކޮށް ކޯޓޭޝަންތަކާއި ބިލްތައް ފޮނުވުމުގެ މަގު ސަޕްލަޔަރުންނަށް ފަހިވެގެންދާނެކަމަށް އޭނާ ވިދާޅުވިއެވެ.

"ޕޯޓަލް މެދުވެރިކޮށް އޮންލައިންކޮށް އެމްޕީއެލަށް ޚިދުމަތާއި ތަކެތި ފޯރުކޮށްދޭ ފަރާތްތަކަށް މި ކުންފުނީގެ ޕްރޮކިއުމަންޓް ސިސްޓަމްގައި ރަޖިސްޓްރީކުރެވޭނެ. އަދި ކުރިއަށްއޮތްތާ އޮންލައިންކޮށް އެފަރާތްތަކަށް ރިކުއެސްޓް ފޮނުވުމާއި، ކޯޓޭޝަންތައް ސަބްމިޓްކުރުމުގެ ކަންކަން ކުރިއަށްދާނީ. މީގެ ސަބަބުން ވަރަށް ގިނަ ކަރުދާސްތަކެއް މަދުކުރެވި، އަވަސް ޚިދުމަތެއް ފޯރުކޮށްދެވޭނެ" އޭނާ ވިދާޅުވިއެވެ.

މާލެއާއި ހުޅުލެ އަދި މާލެއާއި ހުޅުމާލެއާއި ދެމެދު އެމް.ޕީ.އެލުން ދެމުންދާ ބަހުގެ ޚިދުމަތް ހޯދާ ފަރާތްތަކަށް ޚާއްސަކޮށްގެން އެކުންފުނިން އިފްތިތާހް ކުރި ބަސް އެޕްލިކޭޝަނުން ބަސް ދަތުރުކުރާ މަގާއި، ބަސް ދަތުރުތައް ހަމަޖެހިފައިވާ ގޮތް ބަލާލެވޭނެކަމަށް އެކުންފުނިން ބުނެއެވެ.

އެމް.ޕީ.އެލުން ދެމުންދާ ޚިދުމަތްތަކަކީ ޓެކްނޮލޮޖީއާއި ރަށްޓެހި ޚިދުމަތްތަކަށް ހެދުމަށް ކުރަމުންދާ މަސައްކަތުގެ ދަށުން 2020 ވަނަ އަހަރަށް އަމާޒުކޮށްގެން އިތުރު ޚިދުމަތްތަކެއް ތަޢާރަފުކުރުމަށް މަސައްކަތް ކުރަމުންދާކަމަށް އެކުންފުނިން ބުނެއެވެ. އެގޮތުން މުދާ އެތެރެކުރާ ފަރާތްތަކާއި، ބަނދަރުތަކުގެ އޮޕަރޭޝަންތަކަށާއި، ކުންފުނިން ހުޅުވާލާ ވަޒީފާގެ ފުރުޞަތުތަކަށް ކުރިމަތިލުމަށް ޚާއްސަ ޕޯޓަލްތަކެއް ތަޢާރަފުކުރުމުގެ މަސައްކަތް ކުރަމުންދާކަމަށް އެމް.ޕީ.އެލުން ބުނެފައިވެއެވެ.