ސަރުކާރުން ހިންގާ ހައުސިންގ ސްކީމްތަކަށް ފަސޭހައިން ފޯމް ހުށަހެޅުމަށް ތަރައްޤީކުރި "މަގޭ ހިޔާވެހި" ޕޯޓަލްގައި މިހާތަނަށް ނުވަ ހާހަށްވުރެ ގިނަ މީހުން ރަޖިސްޓްރީވެފައިވާ ކަމަށް މިނިސްޓްރީ އޮފް ހައުންސިންގ އެންޑް އަރބަން ޑިވެލޮޕްމަންޓުން ވިދާޅުވެއްޖެއެވެ.
ޕީ.އެސް.އެމް ނިއުސްގެ ރާއްޖެމިއަދު ޕްރޮގްރާމުގައި ވާހަކަފުޅުދައްކަވަމުން ހައުސިންގ މިނިސްޓްރީގެ ސްޓޭޓް މިނިސްޓަރ އަޙްމަދު ނަޝީދު ވިދާޅުވީ، "މަގޭ ހިޔާވެހި" ޕޯޓަލަށް އެކަށީގެންވާރުގެ ތަރުހީބެއް ލިބެމުން އަންނަކަމަށެވެ. އެގޮތުން މިމަހުގެ 19 ވަނަ ދުވަހުގެ ނިޔަލަށް ނުވަ ހާސް ދުއިސައްތަ ފަސްދޮޅަހަށްވުރެ ގިނަ މީހުން ޕޯޓަލްގައި ރަޖިސްޓްރީވެފައިވާކަމަށެވެ.
"އަޅުގަނޑު އެންމެ ފަހުން ބަލާލިއިރުވެސް 9266 މީހަކު ވަނީ މި ޕޯޓަލްގައި ރަޖިސްޓްރީވެފައި. މިއީ ސްކީމެއް އިޢުލާން ނުކުރަނިސް ރަޖިސްޓްރީވެފައިވާ މިންވަރު. މީގެން ރައްޔިތުންގެ ތަރުހީބު އޮތް މިންވަރު އެބަފެނޭ. އަޅުގަނޑު ޤަބޫލުކުރަނީ ސްކީމަކަށް ހުޅުވާލާ ހިސާބުން 20 ހާހާއި 30 ހާހާއި ދެމެދުގެ މީހުން މި ޕޯޓަލަށް އިތުރުވާނެކަމަށް ބެލެވޭ. މިއީ އިންސާފުވެރިކަމާއެކު ބޯހިޔާވަހިކަން ފޯރުކޮށްދިނުމަށް ކުރާ މަސައްކަތަށްވެސް ލިބިގެންދާ ބޮޑު ލުޔެއް" އަޙްމަދު ނަޝީދު ވިދާޅުވިއެވެ.
"މަގޭ ހިޔާވެހި" ޕޯޓަލް މެދުވެރިކޮށް ކޮންމެ ދިވެއްސަކަށް، ބޭނުން ވަގުތަކު ބޭނުން ތާކު ހުރެގެން، އިޖްތިމާޢީ ބޯހިޔާވަހިކަމުގެ މަޝްރޫޢުތަކާއި ގުޅޭ މަޢުލޫމާތު ފަސޭހަކަމާއެކު ހޯދޭނެކަމަށް ހައުސިންގ މިނިސްޓްރީން ވިދާޅުވެއެވެ. ބޯހިޔާވަހިކަމުގެ މަޝްރޫޢުތަކުގެ ސްކީމްތަކަށް ކުރިމަތިލުމަށް ހުޅުވާލުމުން މި ޕޯޓަލް މެދުވެރިކޮށް އޮންލައިންކޮށް ފޯމް ލެވޭނެއެވެ. އަދި ޕޯޓަލް މެދުވެރިކޮށް މީހާއާގުޅޭ މަޢުލޫމާތުތައް ކޮމްޕިއުޓަރައިޒްކޮށް ރައްކާކުރެވޭނެއެވެ.
ޕޯޓަލްގައި ރަޖިސްޓްރީވާން ހުޅުވާލި ނަމަވެސް ހައުސިންގ ސްކީމަށް ކުރިމަތިލުމަށް އަދި ހުޅުވާލާފައެއް ނުވެއެވެ.
ކިއުގައި ނުޖެހި ބޯހިޔާވަހިކަމުގެ މަޝްރޫޢުތަކަށް ކުރިމަތިލެވޭނެ އިންތިޒާމެއް ޤާއިމުކޮށްދެއްވުމަށް ރައީސުލްޖުމްހޫރިއްޔާ އިބްރާހީމް މުޙައްމަދު ޞާލިހު ވެވަޑައިގެންފައިވާ ވަޢުދުފުޅުގެ ދަށުން "މަގޭ ހިޔާވެހި" ޕޯޓަލް ރަސްމީކޮށް ލޯންޗްކޮށްފައިވަނީ މިދިޔަ ފެބްރުއަރީ މަހުގެ 11 ވަނަ ދުވަހުއެވެ.