ރައީސުލްޖުމްހޫރިއްޔާ އިބްރާހީމް މުޙައްމަދު ޞާލިޙު ކ. ގިރިފުށީ ޓްރެއިނިންގ ސެންޓަރަށް ޒިޔާރަތްކުރައްވާ، އެތަނުގައި ކުރިއަށްދާ 21 ވަނަ ޤައުމީ ކެޑޭޓް ކޭމްޕުގެ ތަމްރީންތައް ބައްލަވައިލައްވައިފިއެވެ. މި ދަތުރުފުޅުގައި ޑިފެންސް މިނިސްޓަރ އަލްއުސްތާޛާ މާރިޔާ އަޙްމަދުދީދީއާއި އެޑިއުކޭޝަން މިނިސްޓަރ ޑރ. ޢާއިޝަތު ޢަލީގެ އިތުރުން ރައީސުލްޖުމްހޫރިއްޔާގެ އޮފީހުގެ ބައެއް ވަޒީރުންނާއި ޤައުމީ ދިފާޢީ ބާރުގެ ބައެއް އިސްވެރިން ރައީސްގެ އަރިހުގައި ބައިވެރިވެވަޑައިގެންފައިވެއެވެ.
ޤައުމީ ކެޑޭޓް ކޭމްޕަކީ އެމް.އެން.ޑީ.އެފްގެ ފަރާތުން ދިވެހިރާއްޖޭގެ ޤައުމީ ކެޑޭޓް ކޯރގައި ހިމެނޭ ސްކޫލް ކެޑޭޓް ކޯރތަކުން ހޮވާލެވޭ ކެޑޭޓުންނާއި ބޭންޑް ކެޑޭޓުންނަށް އަމާޒުކޮށްގެން 1992 ވަނަ އަހަރުން ފެށިގެން ކުރިގެންދާ ކޭމްޕެކެވެ.
ރައީސުލްޖުމްހޫރިއްޔާ އިބްރާހީމް މުޙައްމަދު ޞާލިޙު ގިރިފުށްޓަށް ކުރެއްވި މި ދަތުރުފުޅުގައި އެންމެ ފުރަތަމަ ވަޑައިގަތީ އެމް.އެން.ޑީ.އެފްގެ ނޮން ކޮމިޝަންޑް އޮފިސަރޒް އެކެޑަމީއަށެވެ. މިދަތުރުފުޅުގައި ބައިވެރިވެވަޑައިގެންނެވި އިއްޒަތްތެރިންނަށް އެމް.އެން.ޑީ.އެފްގެ ފަރާތުން ވަނީ ޤައުމީ ކެޑޭޓް ކޭމްޕާއި ގުޅޭގޮތުން ޙާއްސަ ބްރީފިންގއެއް އަރުވާފައެވެ. މި ބްރީފިންއަަށްފަހު
ރައީސް ވަނީ މިކޭމްޕުގައި ކުރިއަށްދާ ބައެއް ތަމްރީންތައް ބައްލަވާލައްވާފައެވެ.
01 ޑިސެންބަރު 2019 އިން 12 ޑިސެމްބަރު 2019 ގެ ނިޔަލަށް ކުރިއަށްގެންދާ މި ކޭމްޕުގައި މާލޭގެ 14 ސްކޫލަކާއި، އަތޮޅުތަކުގެ 18 ސްކޫލެއް ހިމެނޭހެން ޖުމްލަ 118 ދަރިވަރުން ބައިވެރިވެއެވެ. މީގެ ތެރޭގައި 88 ފިރިހެން ދަރިވަރުންނާއި 30 އަންހެން ދަރިވަރުން ހިމެނެއެވެ. އަދި އިންޓަރނޭޝަނަލް ކެޑޭޓް އެކްސްޗޭންޖް ޕްރޮގްރާމްގެ ދަށުން އިންޑިއާ، ސްރީލަންކާ، ބަންގްލަދޭޝް އަދި ނޭޕާލް ހިމެނޭހެން 16 ކެޑޭޓުންނާއި 5 އޮފިސަރުން މިފަހަރުގެ ކޭމްޕުގައި ބައިވެރިވެއެވެ.
މިއީ ކޮންމެ ކެޑޭޓަކީވެސް މުޖުތަމަޢުއަށް ފައިދާހުރި އަދި ދިމާވާ އެކިއެކި ޙާދިސާތަކުގައި ރޭވުންތެރިކަމާއެކު އެހީތެރިކަން ފޯރުކޮށްދިނުމުގެ ޤާބިލުކަން ހުރި ޒިންމާދާރު ރައްޔިތަކަށް ހެދުމުގެ މަޤްޞަދުގައި ކުރިއަށްގެންދާ ކޭމްޕެކެވެ. އަދި ކެޑޭޓުންގެ މެދުގައި ދީނީ އަދި އަޙުލާޤީ ރޫޙު އާލާކޮށް، އެކުވެރިކަމާއި އެއްބައިވަންތަކަން ޢާލާކުރުމަކީވެސް މިފަދަ ކޭމްޕެއް ބޭއްވުމުގެ މަޤްޞަދެއްކަމަށް އެމް.އެން.ޑީ.އެފުން ބުނެއެވެ.
މި ކޭމްޕުގައި އަޙުލާޤީ ރިވެތި ސުލޫކާއި، އަސްކަރީ ބައެއް ހުނަރުތަކުގެ އިތުރުން ދިވެހި އަސްކަރިއްޔާގެ ވެއްޓެއްގައި ނަފްސު ތަރުބިއްޔަތު ކުރުމުގެ ފުރުޞަތު ކެޑޭޓުންނަށް ފަހިކޮށްދެވޭނެއެވެ. އެގޮތުން ތަފާތު 8 މާއްދާއެއް ކިޔަވައިދިނުމަށް ހަމަޖެހިފައިވާއިރު، ތިއަރީއާއި ޕްރެކްޓިކަލް ކްލާސްތައް ހިމެނޭހެން ޖުމްލަ 94 ކްލާހެއް ކޭމްޕުގެ ބައިވެރިންނަށް ނަގައިދެވިގެންދާނެއެވެ. އަދި ޑްރިލް، ކޮމާންޑް ޓާސްކް، ކަލްޗަރަލް ޝޯވ އަދި އޮބްސްޓެކަލް ކޯސް ހިމެނޭހެން ވާދަވެރިކަމުގެ 4 މުބާރާތް ބޭއްވުމަށް ހަމަޖެހިފައިވެއެވެ.
މިފަހަރުގެ ކޭމްޕުންވެސް އެންމެ މޮޅު އަންހެން ކެޑޭޓާއި، އެންމެ މޮޅު ފިރިހެން ކެޑޭޓުގެ އިތުރުން، ކިޔަވައިދެވުނު އެކެޑަމިކް މާއްދާތަކުން އެންމެ މޮޅު ދަރިވަރާއި، އެންމެ މޮޅު ޕްލެޓޫން އަދި ކޭމްޕުގެ އެންމެ މޮޅު 10 ދަރިވަރުންވެސް ހޮވުމަށް ވަނީ ހަމަޖެހިފައެވެ.