ނުކުޅެދުންތެރިކަން ހުންނަ ފަރާތްތަކަށް ރަށުގައި ތިބެގެން ފަރުވާ ލިބޭނެ އިންތިޒާމް ހަމަޖެއްސުމުގެ މަސައްކަތް ކުރަނީ
ޙާއްސަ އެހީއަށް ބޭނުންވާ ފަރާތްތަކަށް ފަސޭހަކަމާއެކު ފަރުވާތައް ލިބޭނެ ވަސީލަތްތައް ރާއްޖޭގެ ރަށްރަށުގައި ޤާއިމުކުރުމުގެ މަސައްކަތް ކުރަމުންދާކަމަށް ރައީސުލްޖުމްހޫރިއްޔާގެ ނާއިބު ފައިޞަލް ނަސީމް ވިދާޅުވެއްޖެއެވެ.
އެމަނިކުފާނު މިހެން ވިދާޅުވެފައިވަނީ ޙާއްސަ އެހީއަށް ބޭނުންވާ ފަރާތްތަކުގެ ފަންނުވެރިކަމާއި ހުނަރުވެރިކަން ދައްކާލުމަށް ނެޝެނަލް އާޓްގެލަރީގައި ކުރިއަށްދާ "ރިވެލި މައުރަޒު" ހުޅުވުމުގެ ރަސްމިއްޔާތު ޝަރަފުވެރިކޮށްދެއްވާ ވާހަކަފުޅުދައްކަވަމުންނެވެ.
"ރިވެލި މައުރަޒު" ހުޅުވުމުގެ ރަސްމިއްޔާތު ޝަރަފުވެރިކޮށްދެއްވާ ވާހަކަފުޅުދައްކަވަމުން ރައީސުލްޖުމްހޫރިއްޔާގެ ނާއިބު ފައިޞަލް ނަސީމް ވިދާޅުވީ، ޙާއްސަ އެހީއަށް ބޭނުންވާ ފަރާތްތަކުގެ ހައްޤުތައް ރައްކާތެރިކޮށް، އެފަރާތްތަކަށް ބޭނުންވާ ފަރުވާގެ ކަންކަން ފަސޭހަކުރުމަށްޓަކާ އަދިވެސް މި ދާއިރާއިން ގިނަ ކަންތައްތަކެއް ކުރަންހުރިކަމަށެވެ. އެހެންކަމުން ސަރުކާރުގެ މިހާރުގެ އަމާޒަކީ ޚާއްސަ އެހީއަށް ބޭނުންވާ ކުދިންނާއެކު އެކުދިންގެ އާއިލާތަކަށް ހިތްހަމަޖެހުމާއެކު އަމިއްލަ ރަށުގައި ތިބެގެން އެކުދިންނަށް ބޭނުންވާ އިތުރުފަރުވާއާއި ހުނަރުދެވޭނެ ފަދަ ގޮތަކަށް ކަންކަން ފަހިކޮށްދިނުންކަމަށް ނާއިބު ރައީސް ވިދާޅުވިއެވެ.
"މި ދާއިރާއިން އިތުރު ބަދަލުތަކެއް، ހެޔޮ ބަދަލުތަކެއް ގެންނައުމަކީ އަޅުގަނޑުމެންގެ އަމާޒު. ރާއްޖޭގެ ރަށްތަކުގައި ތިބެގެންވެސް ފަސޭހަކަމާއެކު ފަރުވާތައް އިތުރަށް ލިބޭނެ ވަސީލަތްތައް ޤާއިމުކޮށް އެކަންތައްތަކުގައި އަޅުގަނޑުމެން މެދުކެނޑުމެއްނެތި މަސައްކަތްކުރާނެކަމުގެ ޔަޤީންކަން އަޅުގަނޑުދެން" ނާއިބް ރައީސް ވިދާޅުވިއެވެ.
