ބިދޭސީންނާއި ގުޅޭ ލިޔެކިޔުން ހަމަނުވުމުން 6 ތަަނަކަށް އިންޒާރުގެ ސިޓީ އިމިގްރޭޝަނުން ދީފިއެވެ.
މޯލްޑިވްސް އިމިގްރޭޝަނުން ބުނީ އިއްޔެ ކުރިއަށްގެންދިޔަ އޮޕަރޭޝަނެއްގައި 14 ބަލާ ފާސްކޮށްފައިވާކަމަށެވެ. މީގެތެރޭގައި ހިމެނެނީ ބިދޭސީން މަސައްކަތްކުރާ ކެފޭ، ރެސްޓޯރެންޓް އަދި ފިހާރަތައްކަމަށް އިމިގްރޭޝަނުން ބުނެއެވެ. އަދި މައްސަލަތައް ފާހަގަވި ތަންތަނަށް އިންޒާރުގެ ސިޓީ ދީފައިވާކަމަށްވެސް އިމިގްރޭޝަނުން ބުނެއެވެ.
އިމިގްރޭޝަނުން ބުނީ މި އިންސްޕެކްޝަންއިން އެކަނިވެސް، 25 ބިދޭސީއެއްގެ އަތުގައި ލިޔެކިޔުންތަކާއި، ސައްޙަ ވޯކް ވިސާއެއް ނެތްކަން ފާހަގަކުރެވިފައިވާކަމަށެވެ.
ބިދޭސީ މަސައްކަތު މީހުން ރާއްޖޭގައި އާދަޔާ ޚިލާފަށް ގިނަވެ އެމީހުންގެ ސަބަބުން ތަފާތު މައްސަލަތައް ވަނީ އުފެދިފައެވެ. މީގެތެރެއިން ވަރަށް ގިނަ މީހުންނަކީ ޤަވާޢިދާ ޚިލާފަށް އުޅެމުންދާ މީހުންނެވެ. އިމިގްރޭޝަނުން ބުނާ ގޮތުގައި ރާއްޖޭގައި މަސައްކަތްކުރާ ބަންގްލަދޭޝްގެ އެއްލައްކަ ތިރީސް ހާހެއްހާ މީހުންގެ ތެރެއިން ފަސްދޮޅަސް ތިންހާސް މީހުންނަކީ ޤަވާޢިދުތަކަށް ނުފެތި އުޅޭ މީހުންނެވެ.
މި މައްސަލަ ހައްލުކުރުމަށް ޤަވާޢިދާ ޚިލާފަށް އުޅޭ ބިދޭސީން އަލުން ރަޖިސްޓްރީވާން ސަރުކާރުން ދީފައިވަނީ 6 މަސް ދުވަހުގެ މުއްދަތެކެވެ.
ޤަވާއިދާ ޚިލާފަށް ރާއްޖޭގައި އުޅޭ ބިދޭސީންގެ މައްސަލަ ހައްލުކުރުމަށް ސަރުކާރުން ފަށާފައިވާ މަސައްކަތުގެ ނަތީޖާ އެއް އަހަރު ދުވަހުގެ ތެރޭގައި ފެންނާނެކަމަށް ރައީސުލްޖުމްހޫރިއްޔާ އިބްރާހީމް މުޙައްމަދު ޞާލިޙް ވަނީ ވިދާޅުވެފައެވެ.