މާލޭ ހުކުރު މިސްކިތުގެ މުންނާރާއި ފެންވަޅުތަކުގެ އާބާތުރަފިލުވުމުގެ މަސައްކަތުގައި ސްޓެލްކޯއިން އެހީތެރިކަން ފޯރުކޮށްދިނުމުގެ އެއްބަސްވުމެއްގައި ސޮއިކޮށްފިއެވެ.
ސްޓެލްކޯގެ ބޯޑްރޫމުގައި ބޭއްވި ޙާއްސަ ރަސްމިއްޔާތެއްގައި މާލޭ ހުކުރު މިސްކިތުގެ މުންނާރާއި ފެންވަޅުތަކުގެ އާބާތުރަފިލުވުމުގެ މަސައްކަތަށް އެހީތެރިކަން ފޯރުކޮށްދިނުމުގެ އެއްބަސްވުމުގައި މިނިސްޓްރީ އޮފް އާޓްސް، ކަލްޗަރ އެންޑް ހެރިޓޭޖްގެ ފަރާތުން ސޮއިކުރެއްވީ ސްޓޭޓް މިނިސްޓަރ މުޙައްމަދު ޠާރިޤެވެ. އަދި ސްޓެލްކޯގެ ފަރާތުން ސޮއިކުރައްވާފައިވަނީ އެކުންފުނީގެ މެނޭޖިންގ ޑިރެކްޓަރ ޙަސަން މުޣުނީއެވެ. 4 އަހަރު ދުވަހުގެ މުއްދަތަކަށް ވެވުނު މި އެއްބަސްވުމުގެ ދަށުން މާލޭ ހުކުރު މިސްކިތުގެ މުންނާރާއި ފެންވަޅުތަކުގެ އާބާތުރަފިލުވުމުގެ މަސައްކަތްކުރުމަށް ހަމަޖެހިފައިވަނީ ހެރިޓޭޖް މިނިސްޓްރީއާއި، ސަޤާފީ ތަރިކަ ރައްކާތެރިކުރާ ޤައުމީ މަރުކަޒާއި، ސްޓެލްކޯ ގުޅިގެންނެވެ.
މި ރަސްމިއްޔާތުގައި ވާހަކަދައްކަވަމުން ހެރިޓޭޖް މިނިސްޓްރީގެ ސްޓޭޓް މިނިސްޓަރ މުޙައްމަދު ޠާރިޤު ވިދާޅުވީ، މިއީ ދިވެހި ތާރީޚާއި ސަޤާފަތާއި ގުޅުންހުރި އާސާރުތައް ހިމާޔަތްކުރުމަށް ކުރާ މަސައްކަތަށް އެހީތެރިކަން ހޯދުމަށް ހުޅުވިގެންދިޔަ އިތުރު ދޮރެއްކަމަށެވެ. އެއްބަސްވުމުގެ ދަށުން އާބާތުރަފިލުވުމުގެ މަސައްކަތަށް ޚަރަދުކުރުމަށް ހަމަޖެހިފައިވަނީ ދެ ފަރާތް އެއްބަސްވާގޮތެއްގެ މަތިންކަމަށް ޠާރިޤު ވިދާޅުވިއެވެ. އަދި އާބާތުރަފިލުވުމުގެ މަސައްކަތުގައި ސްޓެލްކޯގެ މުވައްޒަފުން ހަރަކާތްތެރިވާއިރު، އެ މަސައްކަތުގައި ބޭނުންވާ ފަންނީ އެހީތެރިކަން މިނިސްޓްރީގެ ފަރާތުން ފޯރުކޮށްދޭނެކަމަށް ޠާރިޤު ވިދާޅުވިއެވެ.
"މުންނާރުވީމަ އެތަނުގެ ގޮތުން ފެށުނީއްސުރެއް ބޭނުން މިކުރަނީ އުވަ. އުވަ ހޯދުމަކީ މިހާރު އެހާ ފަސޭހަކަމެއްނޫން. އެކަން މިކުރެވެނީ ޙާއްސަ ހުއްދައެއްގެ ދަށުން. އެހެންވީމަ އުވަ ހޯދުމުގެ މަސައްކަތް ކުރާނީ ތަރިކަ ރައްކާތެރިކުރާ ޤައުމީ މަރުކަޒުގެ ފަރާތުން. މުންނާރު ސާފުކުރާއިރު އެތަނުގައި އަށިއަޅައިގެން މުއްނާރުގައި ޖައްސައިގެނެއްނޫން އެކަންކަން ކުރަނީކީ. އެހެންވީމަ އެ އިންތިޒާމްތައް ހަމަޖައްސައިދޭނީ ސްޓެލްކޯއިން" މިނިސްޓްރީ އޮފް އާޓްސް، ކަލްޗަރ އެންޑް ހެރިޓޭޖެ ސްޓޭޓް މިނިސްޓަރ މުޙައްމަދު ޠާރިޤު ވިދާޅުވިއެވެ،
ސްޓެލްކޯގެ މެނޭޖިންގ ޑިރެކްޓަރ ޙަސަން މުޣުނީ ވިދާޅުވީ، މިފަދަ މަސައްކަތެއްކުރުމަށް އެކުންފުނިން ޝަޢުގުވެރިކަން ފާޅުކުރީ، މިއީ ޤައުމީ މަސައްކަތެއްގެ ގޮތުގައި ދެކިގެންކަމަށެވެ. އަދި މި އެއްބަސްވުމުގެ ދަށުން ހުކުރު މިސްކިތުގެ މުންނާރާއި، ގޯތިތެރޭގައި ހުރި ފެންވަޅުތަކުގެ އާބާތުރަފިލުވުމުގެ މަސައްކަތް މިފެށޭ ހަފްތާގެ ހޮނިހިރު ދުވަހު ފެށުމަށް ހަމަޖެހިފައިވާކަމަށް މުޣުނީ ވިދާޅުވިއެވެ. އޭނާ ވަނީ ޤައުމީ އާސާރުތައް ރައްކާތެރިކުރުމަށް ކުރާ މަސައްކަތުގައި ކުންފުނިތަކުގެ ބައިވެރިވުން އިތުރުކުރުމުގެ މުހިއްމުކަން ފާހަގަކުރައްވާފައެވެ.
"ކުންފުންޏަކުން މިކަހަލަކަމެއްގައި ބައިވެރިވުމަކީ ދެމެހެއްޓެނިވިގޮތެއްގައި މިފަދަ ކަންކަން ކުރަން ލިބޭ ބާރެއް. އަޅުގަނޑު މިއަދު ގޮވާލަން އެހެން ކުންފުނިތަކަށްވެސް އަޅުގަނޑުމެންގެ ޤައުމީ ތަރިކަތައް ހިމާޔަތްކުރަން މަސައްކަތްކުރާ ބޭފުޅުންނަށް، އެކުންފުންޏަކުން ދެވޭނެ އެކްސްޕަޓީޒްތަކާއި އެހީތެރިކަން ފޯރުކޮށްދިނުމަށް" ސްޓެލްކޯގެ މެނޭޖިންގ ޑިރެކްޓަރ ޙަސަން މުޣުނީ ވިދާޅުވިއެވެ.
މާލޭ ހުކުރު މިސްކިތަކީ ދިވެހީންގެ އިސްލާމީ ވަޙުދަތާއި، ދިވެހީންގެ ހުނަރުވެރިކަމާއި ފަންނުވެރިކަން ދައްކުވައިދޭ އެންމެ ދުވަސްވީ އެއް ބިނާއެވެ.
އައްސުލްޠާން އިބްރާހީމް އިސްކަންދަރު 1 ގެ އަމުރުފުޅަކަށް މީލާދީން 1656 ގައި ބިނާކުރެވުނު މި މިސްކިތަކީ ދުނިޔޭގެ އެހެން އެއްވެސް ޤައުމަކުން ނުފެންނަ ފަދަ ހިރިގަލުގެ ފުރިހަމަ މަސައްކަތް ފެނިގެންދާ ބިނާއެކެވެ. މާލޭ ހުކުރު މިސްކިތަކީ 199 އަކަފޫޓުގެ ޖާގައިގެ މިސްކިތެކެވެ. އަދި މިސްކިތުގެ މުންނާރު ބިނާކޮށް ނިންމާފައިވަނީ މީލާދީން 1677 ގައެވެ.
ރާއްޖޭގައި ހިރިގަލުން އިމާރާތްކޮށްފައިވާ މަދު މިސްކިތްތަކުގެ ތެރޭގައި ހިމެނޭ ހުކުރު މިސްކިތް ދުނިޔޭގެ ތަރިކައިގެ ލިސްޓުގައި ހިމެނުމަށް ސަރުކާރުން ގިނަ މަސައްކަތްތަކެއް ކުރަމުންދާއިރު، އެތަނަށް ލިބިފައިވާ ގެއްލުންތައް މަރާމާތު ކުރުމުގެ މަސައްކަތް ޔުނެސްކޯއާއި އިންޑިއާ ސަރުކާރާއި ގުޅިގެން ދަނީ ކުރަމުންނެވެ.