ޤަވައިދާ ހިލާފަށް ޕާކުކޮށްގެން މިދިޔަ ހަފްތާގެ ތެރޭގައި 1600 އަށްވުރެ ގިނަ އުޅަނދުގައި ސްޓިކަރ ޖަހައިފިއެވެ.
ކޮންމެ ހަފްތާއަކު އެއްފަހަރު ފުލުހުން އާއްމުކުރަމުން އަންނަ ތަފާސް ހިސާބުތައް ދައްކާގޮތުން ޤަވައިދާ ހިލާފަށް ޕާކުކޮށްގެން މިިމަހުގެ 16 ވަނަ ދުވަހުން ފެށިގެން 22 ވަނަ ދުވަހުގެ ނިޔަލަށް ޖުމްލަ 1672 އުޅަނދެއްގައިވަނީ ސްޓިކަރ ޖަހާފައެވެ. މިއީ އޭގެ ކުރީގެ ހަފްތާއާއި އަޅާ ބަލާއިރު 290 ސްޓިކަރ އިތުރު އަދަދެކެވެ.
ޤަވާއިދާ ހިލާފަށް ޕާކުކުރާ އުޅަނދުތައް ފުރަތަމަ ފަހަރުނަމަ ޖޫރިމަނާ ކުރަނީ 250 ރުފިޔާއިންނެވެ. ދެވަނަ ފަހަރު އެ އަދަދު 500 ރުފިޔާއަށް އިތުރުވެއެވެ. އަދި އޭގެ ފަހުން ސްޓިކަރ ޖަހާ ކޮންމެ ފަހަރު 750 ރުފިޔާއިން ޖޫރިމަނާކުރެއެވެ.
ފުލުހުންގެ ތަފާސް ހިސާބުތައް ދައްކާގޮތުން މިދިޔަ ހަފްތާގައި މާލޭ ސަރަހައްދުގައި ހިނގި އެކްސިޑެންޓްގެ އަދަދު ވަނީ 33 އަރާފައެވެ. އަދި މި އެކްސިޑެންޓްތަކުގައި 3 މީހަކަށް އެކިވަރުގެ އަނިޔާވެފައިވާއިރު، އެކްސިޑެންޓްތަކާ ގުޅިގެން 3 މީހެއްގެ ލައިސަންސް ފުލުހުން ވަނީ ހިފަހައްޓާފައެވެ. މިދިޔަ ހަފްތާގައި ފުލުހުން ވަނީ 1068 އުޅަނދެއް ބަލާ ފާސްކޮށްފައެވެ. އަދި 123 ވެހިކަލެއް މިދިޔަ ހަފްތާގައި ޓޯކޮށްފައިވެއެވެ.
މާލޭ ސިޓީއިން ޓްރެފިކް ވައިލޭޝަންސްގެ ގޮތުގައި މިދިޔަ ހަފްތާގައި އެންމެ ބޮޑަށް ފާހަގަކުރެވިފައިވަނީ ލައިސަންސް ނެތި ދުއްވުމެވެ. އެގޮތުން ލައިސަންސް ނެތި ދުއްވި 107 މީހަކު ފުލުހުން ހިފައްހައްޓާފައިވެއެވެ. އަދި ލައިސަންސް ކާޑު ނުލާ ދުއްވި 53 މީހަކާއި، އިންޝުއަރެންސްއާއި ރޯޑްވާދިނަސް ނުހައްދާ 65 މީހެއްގެ އިތުރުން، އަހަރީ ފީ ނުދައްކާ 38 މީހެއްވެސް ފުލުހުން ވަނީ ހިފަހައްޓާފައެވެ.