ކުންފުނީގެ އަހަރީ ފީ ނުދައްކާ 19 ކުންފުންޏެއް އުވާލުމަށް އިކޮނޮމިކް މިނިސްޓްރީން ނިންމައިފިއެވެ.
އިކޮނޮމިކް މިނިސްޓްރީން ވިދާޅުވީ، 2017އިން 2018ވަނަ އަހަރުގެ ނިޔަލަށް ރަޖިސްޓްރީކޮށްފައިވާ ވިޔަފާރިތަކުގެ ތެރެއިން އަހަރީފީ ނުދައްކާ ކުންފުނިތަށް އުވާލުމަށް ނިންމާފައިވާކަމަށެވެ. މީގެތެރޭގައި 19 ކުންފުންޏެއްހިމެނެއެވެ. އެއީ 2017ވަނަ އަހަރު ރަޖިސްޓްރީކޮށްފައިވާ 16 ކުންފުންޏަކާއި، 2018 ވަނަ އަހަރު ރަޖިސްޓްރީކޮށްފައިވާ 3 ކުންފުންޏެކެވެ. މި ކުންފުނިތަކުގެ މަޢުލޫމާތު އެ މިނިސްޓްރީން މިހާރު ވަނީ ގެޒެޓްވެސް ކޮށްފައެވެ.
އިކޮނޮމިކް މިނިސްޓްރީން އުވާލަން ކަނޑައަޅާފައިވާ ކުންފުނިތަކުގެ ތެރެއިން އެއްވެސް ކުންފުންޏެއް ހިންގަން ބޭނުންވެއްޖެނަމަ ކުންފުނި ހިންގަން ބޭނުންވާކަން އަންގައިދިނުމަށް، ފުރިހަމަކުރަންޖެހޭ އެންމެހާ އިލްތިޒާމްތައް ފުރިހަމަކޮށް ޑިރެކްޓަރުންގެ ބޯޑުގެ ޤަރާރެއް ހުށައަޅަންޖެހޭނެއެވެ. އަދި މި ޤަރާރު އަންނަ ޑިސެމްބަރ މަހުގެ 3 ވަނަ ދުވަހުގެ ކުރިން ހުށައަޅަންޖެހޭނެކަމަށް އެ މިނިސްޓްރީން ބުނެއެވެ.
އުވާލަން ނިންމާފައިވާ ކުންފުނިތަކުގެ ތެރެއިން އެއްވެސް ކުންފުންޏެއްގެ މައްޗައް، އެއްވެސް ދަރަންޏެއް ނުވަތަ ދަޢުވާއެއް އޮތްނަމަ، ވެސް ޑިސެމްބަރ މަހުގެ 3 ވަނަ ދުވަހުގެ ކުރިން އަންގަންޖެހެއެވެ.
ސަރުކާރުން އަންނަނީ ކުދި އަދި މެދުފަންތީގެ ވިޔަފާރިތައް ފުޅާކުރުމަށް އެފަދަ ވިޔަފާރިތަކަށް ފަހި މާހައުލެއްވެސް ޤާއިމުކޮށްދެމުންނެވެ. މިއަހަރުގެ ތެރޭގައިވެސް ގިނަ ކުންފުނިތަކެއް އަލަށް ވަނީ ރަޖިސްޓްރީކޮށްދީފައެވެ. މިއަހަރުގެ ތެރޭގައި 4120 ކުންފުނި އަލަށް ރަޖިސްޓްރީކޮށްދީފައިވާކަމަށް ސަރުކާރުން ބުނެއެވެ.