ދުޅަހެޔޮ ޞިއްޙަތެއްގައި ތިބުމަށް ބާރުއެޅުމަށް ކަސްޓަމްސްގެ މުވައްޒަފުންނަށް ޙާއްސަކޮށްގެން ޕްރޮގްރާމެއް ފަށައިފި

ދުޅަހެޔޮ ޞިއްޙަތެއްގައި ތިބުމަށް ބާރުއެޅުމަށް ކަސްޓަމްސްގެ މުވައްޒަފުންނަށް އަމާޒުކޮށްގެން ޙާއްސަ ޕްރޮގްރާމެއް ފަށައިފިއެވެ.

ޑައިބެޓީސް ސޮސައިޓީ އޮފް މޯލްޑިވްސްއާއި ކަސްޓަމްސް ރެކްރިއޭޝަން ކްލަބް ގުޅިގެން ހިންގާ "ލައިފް ސްޓައިލް އިންޓަރވެންޝަން ޕްރޮގްރާމް" ރަސްމީކޮށް އިފްތިތާޙްކޮށްދެއްވާފައިވަނީ އެކަމަށްޓަކާ ބޭއްވި ރަސްމިއްޔާތެއްގައި މިނިސްޓަރ އޮފް ޔޫތު، ސްޕޯޓްސް އެންޑް ކޮމިއުނިޓީ އެމްޕަވަރމަންޓް އަޙްމަދު މަޚްލޫފެވެ.

ޔޫތް މިނިސްޓަރ މަޚްލޫފް ވިދާޅުވީ، ރާއްޖޭގައިވެސް ހަކުރު ބަލި ފަދަ ގައިންގައިން ނާރާ ބަލިތައް އިތުރުވަމުންދާއިރު، މިފަދަ ބަލިތަކުން ރައްކާތެރިވުމުގެ މުހިއްމުކަން އެންމެނަށްވެސް ވަރަށް ސާފުކަމަށެވެ. ނަމަވެސް ހަމައެކަނި ހޭލުންތެރިކަން އިތުރުކޮށްގެން މިފަދަ ބަލިތައް ކޮންޓްރޯލްނުކުރެވޭނެކަމަށާއި، ފުރިހަމަ ޞިއްޙަތެއްގައި ތިބުމަށް ބޭނުންވާ ދުޅަހެޔޮ އާދަތައް ދިވެހިންގެ ތެރޭގައި އިތުރުކުރަންޖެހޭކަމަށް މިނިސްޓަރ ވިދާޅުވިއެވެ.

މި ޕްރޮގްރާމަކީ ދުނިޔޭގެ ހަކުރު ބަލީގެ ދުވަސް ފާހަގަކުރުމަށް ކުރިއަށްގެންދާ ހަރަކާތްތަކުގެ ދަށުން، ދުޅަހެޔޮ ޞިއްޙަތެއްގައި ތިބުމަށްޓަކާ ދިރިއުޅުމުގެ ވައްޓަފާޅިއަށް ގެންނަންޖެހޭ ބަދަލުތަކާމެދު ހޭލުންތެރިކުރުވުމަށް ހިންގާ ޕްރޮގްރާމެކެވެ. މި ޕްރޮގްރާމާއި ގުޅޭގޮތުން ވާހަކަދައްކަވަމުން ޑައިބެޓީސް ސޮސައިޓީ އޮފް މޯލްޑިވްސްގެ ސީ.އީ.އޯ އައިޝަތު ޝިރުހާނާ ވިދާޅުވީ، ކަސްޓަމްސްގެ 70 އަށްވުރެ ގިނަ މުވައްޒަފުން މި ޕްރޮގްރާމުގައި ބައިވެރިވެފައިވާކަމަށެވެ. އަދި 6 މަސް ދުވަހަށް ބަހާލައިގެން ކުރިއަށްގެންދާ މި ޕްރޮގްރާމުގައި ކަސްރަތުކުރުމާއި، ކެއުންބުއިމުގެ ކަންކަން ބަހައްޓަންވީގޮތާއި ގުޅޭގޮތުން މައުލޫމާތުދެވިގެންދާނެކަމަށް ޝިރުހާނާ ވިދާޅުވިއެވެ.

ކަސްޓަމްސްގެ މުވައްޒަފުންނަށް އަމާޒުކޮށްގެން ފެށި މި ހަރަކާތުގެ ކާމިޔާބީއަށް ބަލާ، އިތުރު މުއައްސަސާތަކުގައިވެސް މި ހަރަކާތް ކުރިއަށްގެންދިއުމަކީ އަމާޒެއްކަމަށް ޑައިބެޓީސް ސޮސައިޓީ އޮފް މޯލްޑިވްސްއިން ބުނެއެވެ.