2020ވަނަ އަހަރުގެ ބަޖެޓް: އެންމެ ބޮޑު އެއް އަމާޒަކީ ރާއްޖެއަށް ބޭނުންވާ އުމްރާނީ ވަސީލަތްތައް ޤާއިމުކުރުން

2020ވަނަ އަހަރުގެ ބަޖެޓުގެ އެންމެ ބޮޑު އެއް އަމާޒަކީ، ރާއްޖެއަށް ބޭނުންވާ އަސާސީ އުމްރާނީ ވަސީލަތްތައް ޤާއިމުކުރުންކަމަށް ފިނޭންސް މިނިސްޓަރ އިބްރާހީމް އަމީރު ވިދާޅުވެއްޖެއެވެ.

2020 ވަނަ އަހަރުގެ ދަޢުލަތުގެ ބަޖެޓް ބަޔާން ރައްޔިތުންގެ މަޖިލީހުގައި އިއްވަވަމުން ފިނޭންސް މިނިސްޓަރ ވިދާޅުވީ، އަންނަ އަހަރުގެ ބަޖެޓު ވެގެންދާނީ ދިވެހި އެންމެހާ ރައްޔިތުންނަށް ގަދަރުވެރި ދިރިއުޅުމެއް ހޯދައިދިނުމަށް މަގުފަހިކޮށްދޭނެ ބަޖެޓަކަށްކަމަށެވެ.

އަންނަ އަހަރަށް ހުށަހަޅާ ދައުލަތުގެ ބަޖެޓުގެ ޖުމްލައަކީ 37,504,493,680 (ތިރީސް ހަތް ބިލިއަން ފައްސަތޭކަ ހަތަރު މިލިއަން ހަތަރު ލައްކަ ނުވަދިހަ ތިންހާސް ހަސަތޭކަ އަށްޑިހަ) ރުފިޔާއެވެ. މީގެ ތެރެއިން، ޚަރަދުގެ ގޮތުގައި ހިނގާނެކަމަށް ބެލެވެނީ 35.6 ބިލިއަން ރުފިޔާއެވެ. އަދި 2020 ވަނަ އަހަރު ޖުމްލަ އާމްދަނީ އާއި ހިލޭއެހީގެ ގޮތުގައި ދައުލަތަށް ލިބޭނެކަމަށް ލަފާކުރެވެނީ 29.9 ބިލިއަން ރުފިޔާއެވެ.

ބަޖެޓާއި ޚަރަދާއި ހުރި ތަފާތުގެ ބޮޑު ބައެއް ޙިއްސާކުރަނީ، ދައުލަތުގެ ދަރަނި އަދާކުރުމަށް ދައްކާ 1.9 ބިލިއަން ރުފިޔާކަމަށްވެސް ފިނޭންސް މިނިސްޓްރީން ވިދާޅުވެއެވެ. އަދި 2020 ވަނަ އަހަރުގެ ބަޖެޓު ޑެފިސިޓް ވާނީ 5.7 ބިލިއަން ރުފިޔާއިންކަމަށާއި މިއީ ޖީޑީޕީގެ ނިސްބަތުން 5.8 އިންސައްތަކަމަށްވެސް ފިނޭންސް މިނިސްޓްރީން ވިދާޅުވެފައިވެއެވެ.

2020 ވަނަ އަހަރުގެ ދަޢުލަތުގެ ބަޖެޓް ބަޔާން ރައްޔިތުންގެ މަޖިލީހުގައި އިއްވަވަމުން ފިނޭންސް މިނިސްޓަރ އިބްރާހީމް އަމީރު ވިދާޅުވީ، މި ބަޖެޓު ވެގެންދާނީ ދިވެހި އެންމެހާ ރައްޔިތުންނަށް ގަދަރުވެރި ދިރިއުޅުމެއް މަގުފަހިކޮށްދޭ، ރައްޔިތުންނަށް ބުރަބޮޑުނުވާނެ ފަދަ އުޞޫލެއްގެ މަތިންކަމަށް ޖަޒީރާ ދިރިއުޅުމަކަށް މަގުކޮށައިދޭ ބަޖެޓަކަށްކަމަށެވެ.

"މިއީ މިސަރުކާރުގެ ސިޔާސަތުތައް ފުރިހަމައަށް ހިމަނައި، "ޖަޒީރާ ރާއްޖެ" މެނިފެސްޓޯގައިވާ ކަންކަމުގެ މައްޗަށް ބިނާކޮށް ތައްޔާރުކުރަން ފުރުސަތު ލިބުނު ފުރަތަމަ ބަޖެޓުކަމުން، މި ބަޖެޓު ވެގެންދާނީ ދިވެހި އެންމެހާ ރައްޔިތުންނަށް ގަދަރުވެރި ދިރިއުޅުމެއް ހޯދައިދިނުމަށް މަގުފަހިކޮށްދޭ، ރައްޔިތުންނަށް ބުރަބޮޑުނުވާނެ ފަދަ އުސޫލުތަކެއްގެ މަތިން، ޖަޒީރާ ދިރިއުޅުމަކަށް މަގުކޮށައިދޭ ބަޖެޓަކަށް. މިއީ ދިވެހި ތާރީޚުގައިވެސް ފުރަތަމަ ފަހަރަށް ޖުމްލަ ބަޖެޓު ނަންބަރެއްގެ ބަދަލުގައި، ބަޖެޓު ބައިކުރެވޭ ގޮތް ނުވަތަ އެޕްރޮޕްރިއޭޝަން ސްޓްރަކްޗަރއެއް މި އިއްޒަތްތެރި މަޖިލީހުން ފާސްކުރަން ހުށަހަޅާ ފަހަރު. އަދި މިއީ ލާމަރުކަޒު ކުރުމުގެ ސިޔާސަތުގެ ދަށުން ކައުންސިލްތައް މާލީގޮތުން ބާރުވެރިކުރުމަށް ހިލޭ އެހީގެ ގޮތުގައި ފައިސާ ދިނުމަށް ކަނޑައަޅައި ބަޖެޓުގައި ހުށަހަޅާ ފުރަތަމަ ފަހަރުވެސްމެ" ފިނޭންސް މިނިސްޓަރ އިބްރާހީމް އަމީރު ވިދާޅުވިއެވެ.

ފިނޭންސް މިނިސްޓަރ އަމީރު ވިދާޅުވީ، 2020 ވަނަ އަހަރުގެ ބަޖެޓު ވެގެންދާނީ ރައްޔިތުންގެ އުއްމީދުތަކުގައި ކުލަ ޖައްސައިދޭނެ ބަޖެޓަކަށްކަމަށާއި، ބަޖެޓުގެ ސިޔާސަތުގެ ތެރެއިން އިގުތިސާދީ ކުރިއެރުން ގެނުވައި، ރައްޔިތުންގެ އަތްމަތި ތަނަވަސްކުރުމަށް އެހީތެރިވެދޭނެ ބަޖެޓަކަށްކަމަށެވެ. އަދި ބަޖެޓުގެ އެންމެ ބޮޑު އެއް އަމާޒަކީ، ރާއްޖެއަށް ބޭނުންވާ އަސާސީ އުމްރާނީ ވަސީލަތްތައް ގާއިމުކުރުންކަމަށްވެސް މިނިސްޓަރ ވިދާޅުވިއެވެ.

"2020 ވަނަ އަހަރުގެ ބަޖެޓު ތައްޔާރުކުރުމުގައި އަސާސަކަށް ބަލާފައިވާނީ ސަރުކާރުގެ ސްޓްރެޓީޖިކް އެކްޝަން ޕްލޭން ނުވަތަ އެސްއޭޕީ. މިގޮތުން، ބަޖެޓުގައި ހިމަނާފައިވާ ހުރިހާ ޕްރޮގްރާމްތަކަކާއި މަޝްރޫޢުތަކެއް ބައްޓަންކުރެވިފައިވާނީ އެސްއޭޕީ ގައި ކަނޑައަޅާފައިވާ ލަނޑުދަނޑިތަކާއި ހަމައަށް ވާސިލްވުމަށް މަގުފަހިވާނެ ގޮތަށް. މިގޮތުން، "ނޫ އިޤްތިސާދު" ސިޔާސަތުގެ ދަށުން އިގުތިސާދީ ހުރިހާ ދާއިރާތަކަށްވެސް ފައިދާ ކުރުވަނިވި މަޝްރޫއުތަކަކާއި ޕްރޮގްރާމްތަކެއް މި ބަޖެޓުގައި ހިމެނިފައިވާނެ" ފިނޭންސް މިނިސްޓަރ އިބްރާހީމް އަމީރު ވިދާޅުވިއެވެ.

2020ވަނަ އަހަރަށް 37.5 ބިލިއަން ރުފިޔާގެ ބަޖެޓެއް ހުށަހަޅާފައިވާއިރު، ސަރުކާރުގެ "އޯގާތެރި ސަރުކާރު"ގެ ސިޔާސާތުގެ ދަށުން މުޅި ބަޖެޓުން އެންމެ ބޮޑު ޚަރަދެއް ކުރުމަށް ނިންމާފައިވަނީ އިޤްތިޞާދީ އަދި ސިނާޢީ ކުރިއެރުމަށް ޚަރަދުކުރުމަށެވެ. އެގޮތުން ބަޖެޓްގެ 21 އިންސައްތަ އިޤްތިޞާދީ އަދި ސިނާޢީ ކުރިއެރުމަށް ޚަރަދުކުރުމަށް ހަމަޖެހިފައިވާއިރު، އާއްމު ޚިދުމަތްތަކާއި، އިޖްތިމާޢީ އަދި ދީނީ ޚިދުމަތްތައް ފޯރުކޮށްދިނުމަށް ބަޖެޓުގެ 20 އިންސައްތަ ޚަރަދުކުރުމަށް ވަނީ ހަމަޖެހިފައެވެ.