ސެންޓަރ ފޯރ މެރިޓައިމް ސްޑީޒްއިން ކުރިއަށްގެންދާ ކޯސްތައް ރެގިއުލޭޓްކުރުމުގެ ކަންކަން މިހާރަށްވުރެ ހަރުދަނާކުރުމަށް ދިވެހި ސީފެއަރާޒް އެންޑް ލޭބަރ ޔޫނިއަނުން ގޮވާލައިފިއެވެ.
ބޯޓުދަތުރުފަތުރު ކުރާ ފަރާތްތަކާއި، އެ ސިނާޢަތުގައި ހަރަކާތްތެރިވާ މަސައްކަތްތެރިންގެ ހައްޤުތަކަށް ވަކާލުކުރާ ދިވެހި ސީފެއަރާޒް އެންޑް ލޭބަރ ޔޫނިއަނުން ބޭއްވި ނޫސްވެރިންގެ ބައްދަލުވުމެއްގައި، އެ ސިނާޢަތުގައި ހުރި ބައެއް ކަންބޮޑުވުންތައް ވަނީ ހިއްސާކޮށްފައެވެ. އެ ޔޫނިއަންގެ ލީޑަރ މުޙައްމަދު އާޝިފް ވިދާޅުވީ، މެރިޓައިމްގެ ދާއިރާއަކީ މީގެ އަހަރުތަކެއްކުރިން ދިވެހީން އެންމެ ބޮޑު ޢާމްދަނީއެއް ހޯދި އެއް ސިނާޢަތްކަމަށާއި، މި ދާއިރާއަށް ތަޢުލީމީ ޒުވާނުން ނެރުން މުހިއްމު ކަމަށެވެ. އަދި މެރިޓައިމްގެ ދާއިރާއިން ތަޢުލީމާއި ތަމްރީންގެ ފުރުޞަތުތައް މިހާރަށްވުރެ ބޮޑަށް ފަހިކޮށްދޭންޖެހޭކަމަށްވެސް އޭނާ ވިދާޅުވިއެވެ.
އާޝިފް ވިދާޅުވީ، ކަނޑުދަތުރުފަތުރު ކުރުމުގެ ސިނާޢަތް ކުރިއަރެވުމަށްޓަކާ އެ ދާއިރާއިން ދެވޭ ތަޢުލީމާއި ތަމްރީންތަކަކީ ދިވެހިރާއްޖެއިން ބައިވެރިވެފައިވާ ބައިނަލްއަޤްވާމީ މުޢާހަދާތަކާއި، ބައިނަލްއަޤްވާމީ މިންގަނޑުތަކަށް ފެތޭނެހެން ކޯސްތަކާއި ތަމްރީން ޕްރޮގްރާމްތައް ބައްޓަންކުރުން މުހިއްމުކަމަށެވެ.
"މި ދާއިރާގައި ތަޢުލީމު އުގެނޭ ކުދިންނަށް ދިމާވާ މައްސަލަތައް ބެލޭނެ ނިޒާމެއްވެސް ނެތް.. ކޯސްތައް ހިންގޭނެގޮތާއި، ކޯސްތަކުގެ މޮޑިއުލް ބިނާކުރާނެގޮތާއި، އެ މޮޑިއުލްތައް ހިންގާ، ބަސްބުނާނެ، އެ މޮނިޓަރކުރާނެފަދަ ކޯސް ކޯރޑިނޭޓަރުން ނެތުން ފަދަ ކަންކަން އަޅުގަނޑުމެން ވާނީ ސަމާލުކަމަށް ގެނެސްފައި.." އާޝިފް ވިދާޅުވިއެވެ.
އާޝިފް ވިދާޅުވީ، ބޯޓުދަތުރުފަތުރުކުރުމުގައި ހުރި ގޮންޖެހުންތަކާއި މައްސަލަތަކަކީ ކޮބައިކަން ދެނެގަނެ، އެކަން ކަމާބެހޭ ފަރާތްތަކުގެ ސަމާލުކަމަށް ގެނައުމަށް އެ ޔޫނިއަންގެ ފަރާތުން މަސައްކަތް ކުރަމުންދާކަމަށެވެ. އަދި އެ ސިނާޢަތުގައި ހަރަކާތްތެރިވާ މަސައްކަތްތެރިންގެ ހައްޤުތައް ރައްކާތެރިކޮށް ހިމާޔަތްކޮށްދިނުމުގައި އެ ޔޫނިއަނުން ފަސްޖެހުމެއްނެތި މަސައްކަތް ކުރަމުންދާނެކަމަށްވެސް އޭނާ ވިދާޅުވިއެވެ.