ބައިނަލްއަޤްވާމީ އެގްޒިބިޝަނެއްގެ ގޮތުގައި މޯލްޑިވްސް މެރިން އެކްސްޕޯ ކުރިއަށްގެންދިއުމަކީ އުންމީދެއްކަމަށް ބްލަކް ޕްލައިވެޓް ލިމިޓެޑުން ބުނެފިއެވެ.
މޯލްޑިވްސް މެރިން އެކްސްޕޯއަކީ ރާއްޖޭގެ ބޯޓިންގ ދާއިރާ ހަރުދަނާކުރުމަށްޓަކައި ކޮންމެ އަހަރަކު ވެސް ކުރިއަށްގެންދާ ހަރަކާތެކެވެ. 5 ވަނަ މޯލްޑިވްސް މެރިން އެކްސްޕޯ ނިންމާލާފައިވާއިރު، މެރިން އެކްސްޕޯގެ 5 އެޑިޝަންވެސް އިންތިޒާމްކުރީ ބްލަކްއިންނެވެ.
ޕީއެސްއެމް ނިއުސްއަށް މައުލޫމާތުދެއްވަމުން ބްލަކްގެ މެނޭޖިންގ ޑިރެކްޓަރ އިސްމާއިލް ހުޝާމް ވިދާޅުވީ، މި އެކްސްޕޯ ބައިނަލްއަޤްވާމީ އެކްޒިބިޝަނެއްގެ ގޮތުގައި ކުރިއަށްގެންދިއުމަކީ އެ ކުންފުނީގެ އުންމީދެއްކަމަށެވެ. އަދި ސައުތު އީސްޓް އޭޝިޔާ ސަރަހައްދުގައި ފާހަގަކޮށްލެވޭ ވަރުގެ އެގްޒިބިޝަންއަކަށް މެރިން އެކްސްޕޯ ހެދަން އެ ކުންފުނިން ބޭނުންވާކަމަށް އޭނާ ވިދާޅުވިއެވެ. މި އެކްސްޕޯއަށް ދާއިރާގެ ފަރާތްތަކުގެ އެއްބާރުލުން ލިބެމުން އަންނަކަމަށްވެސް ހުޝާމް ވިދާޅުވިއެވެ.
"އުންމީދުކުރަނީ ކުރިއަށްއޮތް އަހަރުތަކުގައިވެސް ތަރުހީބު ލިބިގެން އަޅުގަނޑުމެންނަށް މި އެގްޒިބިޝަން ސައުތު އީސްޓް އޭޝިޔާ ރީޖަންގެ ފާހަގަކޮށްލެވޭ އެގްޒިބިޝަނަކަށް އެގްޒިބިޝަން ގްރޯ ކޮށްލެވޭނެކަމަށް." ހުޝާމް ވިދާޅުވިއެވެ.
މިއަހަރުގެ މެރިން އެކްސްޕޯ ނިންމާލާފައިވާއިރު 30 ކުންފުންޏަކުން 50 ސްޓޯލް ވަނީ ބަހައްޓާފައެވެ. އެކްސްޕޯގައި ބައިވެރިވި ކުންފުނިތަކުން ޕީއެސްއެމް ނިއުސްއަށް މައުލޫމާތުދެމުން ބުނީ، މިފަދަ އެކްސްޕޯތައް ބޭއްވުމަކީ ވިޔަފާރިތަކަށް ލިބޭ ވަރަށްބޮޑު ކުރިއެރުމެއްކަމަށެވެ. އެކްސްޕޯގެ ސަބަބުން އެއްތަނަކުން ކަސްޓަމަރުންނާއި ދިމާވެ، އެހެން ކުންފުނިތަކުގެ އުފެއްދުންތައް ފެނި ތަފާތު ދެނެގަނެވޭކަމަށް އެކްސްޕޯގެ ބައިވެރިން ބުނެއެވެ.
މި އެކްސްޕޯ ބޭއްވުމުގެ އެންމެ ބޮޑު މަޤްސަދަކީ މި ދާއިރާގައި މަސައްކަތްކުރާ ދިވެހި އަދި ބޭރުގެ ފަރާތްތަކަށް، އެފަރާތްތަކުގެ އުފެއްދުންތައް ބައިނަލްއަޤްވާމީ ޕްލެޓްފޯމެއްގައި ދައްކާލުމުގެ ފުރުޞަތު ހޯދައިދިނުންކަމަށް ނޭޝަނަލް ބޯޓިންގ އެސޯސިއޭޝަނުން ބުނެއެވެ.
މިއަހަރުގެ އެކްސްޕޯގައި އެންމެ ބޮޑު ތަފާތެއްގެ ގޮތުގައި ފެނިގެންގޮސްފައި ވަނީ ކުރިން ދަރުބާރުގޭގައި ޑިސްޕްލޭކުރި މެރިން ދާއިރާގެ އުޅަނދުތައް މިފަހަރު މޫދުގައި ޑިސްޕްލޭ ކުރުމެވެ. މިފަހަރުގެ އެކްސްޕޯގައި އުޅަނދުތައް ޑިސްޕްލޭކުރީ މަސްވެރިންގެ ޕާކު ކުރިމަތީގައެވެ. މޯލްޑިވްސް މެރިން އެކްސްޕޯ މިފަހަރު ޚާއްސަކޮށްފައިވަނީ "މެރިން ޓެކްނޮލޮޖީ" މި ތީމަށެވެ.