ޢާއިލީ ފުދުންތެރިކަމަކީ ދަރިންނަށްދޭ ލޯތްބާއި އަޅާލުމަށް އަސަރުކުރާ ކަމަކަށް ވެގެންނުވާނެ - މިނިސްޓަރ އިމްރާން

ޢާއިލާގެ ފުދުންތެރިކަމަކީ ކުއްޖާއަށް ދެވޭ ލޯތްބާއި އަޅާލުމަށް އަސަރުކޮށްގެންވާނެކަމެއް ނޫންކަމަށް މިނިސްޓަރ އޮފް ހޯމް އެފެއާޒް އިމްރާން ޢަބްދުﷲ ވިދާޅުވެއްޖެއެވެ. މިނިސްޓަރ މިހެން ވިދާޅުވެފައިވަނީ ކުޑަކުދިންގެ ޢަދުލުގެ ނިޒާމަށް ހޭލުންތެރިކުރުވުމުގެ ގޮތުން ބޭއްވި 27ވަނަ ތަމްރީން ޕްރޮގްރާމް ނިންމުމުގެ ރަސްމިއްޔާތުގައި ވާހަކަފުޅުދައްކަވަމުންނެވެ.

ކުޑަކުދިންގެ ޢަދުލުގެ ނިޒާމާ ގުޅޭގޮތުން ހޭލުންތެރިކުރުމަށް ބޭއްވި 27ވަނަ މަސައްކަތު ބައްދަލުވުން ނިންމުމުގެ ރަސްމިއްޔާތު ޝަރަފުވެރިކޮށްދެއްވައި ވާހަކަފުޅު ދައްކަވަމުން މިނިސްޓަރ އޮފް ހޯމް އެފެއާޒް އިމްރާން ޢަބްދުﷲ ވިދާޅުވީ، ޤައުމުގެ ކުރިމަގު ހެޔޮގޮތުގައި ބައްޓަންކުރުމަށް ބޮޑެތިވަމުން އަންނަ ޖީލު ހެޔޮގޮތުގައި ތަރުބިއްޔަތު ކުރުން މުހިއްމުކަމަށެވެ. އަދި ޤައުމުގެ އުފާ ފާގަތިކަން ދެމިއޮންނާނީ ކުޑަކުދިންނާއި ޒުވާނުންގެ ޢިލްމީ ޤާބިލުކަމާއި، ހުނަރުވެރިކަމާއި ފަންނުވެރިކަން އިތުރުކުރުމަށް ސީދާ މުޖުތަމަޢަށް އަމާޒުކޮށްގެން ޙަރަކާތްތަކެއް ހިންގިގެންކަމަށްވެސް މިނިސްޓަރ ވިދާޅުވިއެވެ.

ކުށަށް އަރައިގަންނަ ކުޑަކުދިންގެ ނިސްބަތް ރާއްޖޭގައިވެސް ކަންބޮޑުވާ ދަރަޖައަކަށް އިތުރުވެފައިވާކަން ފާހަގަކުރައްވައި، މިނިސްޓަރ ޢިމްރާން ވިދާޅުވީ މިޙާލަތު ރަނގަޅުކުރުމަށް ސަރުކާރުގެ އަމާޒުތަކަކާއި ސިޔާސަތުތަކެއް ކަނޑައެޅިފައިވާކަމަށާ، ނަމަވެސް އެކަންކަން ތަންފީޒުކުރެވޭނީ އެންމެން ގުޅިގެންކުރެވޭ މަސައްކަތުގެ ނަތީޖާއިންކަމަށެވެ.

އަދި ޢާއިލާއެއްގެ މުއްސަނދިކަން ނުވަތަ ފަޤީރުކަމަކީ އެ އާއިލާގެ ފަރާތުން ކުއްޖާއަށް ދެވޭ ލޯތްބާއި އަޅާލުމަށް އަސަރުކޮށްގެންވާނެކަމެއް ނޫންކަމަށްވެސް މިނިސްޓަރ ޢިމްރާން ވިދާޅުވިއެވެ.

"ކުށުގެ ވެއްޓާށް ކުދިން ދުރުކުރުމުގައި އާއިލާގެ ޒިންމާ ވަރަށް ބޮޑު. އާއިލާގެ މުއްސަނދިކަމާއި ފަޤީރުކަމަކީ ކުއްޖާއަށްދެވޭ ލޯތްބާއި އަޅާލުމަށް އަސަރުކޮށްގެންވާނެކަމެއްނޫން. އެކި އާއިލާތަކުގެ ފުދުންތެރިކަން ހުންނާނީ އެކި މިންވަރަށް، ނަމަވެސް ކުއްޖާ ތަރުބިއްޔަތުކުރުމުގައި އެކަންކަމުގެ އަސަރުކޮށްގެން ނުވާނެ. ކުއްޖާގެ ދީންވެރިކަމާއި، އަޙްލާޤާއި، އުޅުންކަމަށްވިޔަސް ހުރިހާކަމެއް ބިނާވާނީ އެ އާއިލާއެއްގެ މެދުގައި އޮންނަ ބަދަހިކަމެއްގެ މައްޗަށް." މިނިސްޓަރ އޮފް ހޯމް އެފެއާޒް ޢިމްރާން ޢަބްދުﷲ ވިދާޅުވިއެވެ.

މި ތަމްރީން ޕްރޮގްރާމާ ގުޅޭގޮތުން ވާހަކަފުޅުދައްކަވަމުން ޖުވައިނަލް ޖަސްޓިސް ޔުނިޓްގެ އެގްޒެކެޓިވް ޑިރެކްޓަރ ޙާމިދު ޔޫސުފް ވިދާޅުވީ، މިޕްރޮގްރާމުގައި ކުޑަކުދިންގެ ޢަދުލުގެ ނިޒާމާ ބެހޭގޮތުންނާއި ކުށުގެ ވެށިން ގެނެވޭ ކުދިންނާމެދު މުޢާމަލާތުކުރާނެ ގޮތް ބައިވެރިންނަށް ކިޔާދީފައިވާނެކަމަށެވެ.
އަދި ކުޑަކުދިންނާ ގުޅުންހުރި މައްސަލަތަކުގައި ޢަމަލުކުރަމުންދާގޮތާއި، ބައިނަލްއަޤްވާމީ ގޮތުންވެސް ހެދިފައިވާ ޤާނޫނުތަކާއި ޤަރާރުތަކާގުޅޭގޮތުންވެސް މަޢުލޫމާތު ޙިއްސާކޮށްފައިވާކަމަށް ޙާމިދު ވިދާޅުވިއެވެ.

"މިއީ ކުޑަކުދިންގެ އަދުލުގެ ނިޒާމާބެހޭ ގޮތުން ކަމާގުޅޭ މުއައްސަސާތައް ހޭލުންތެރިކުރުވުމަށް ހިންގުނު ތަމްރީން ޕްރޮގްރާމެއް. މައިގަނޑުގޮތެއްގައި ކުޑަކުދިންގެ އަދުލުގެ ނިޒާމާގުޅޭގޮތުން ހެދިފައިވާ ޤާނޫނުތަކާއި، ކުށުގެ ވެށިން ގެނެވޭ ކުދިންނާ މުޢާމަލާތުކުރާނެ ގޮތާއި، ކަމާގުޅޭ މުއައްސަސާތަކުން މަސައްކަތް ކުރަމުންދާގޮތާއި ގުޅޭގޮތުން ވާނީ މަޢުލޫމާތުދީފައި." ޙާމިދު ޔޫސުފް ވިދާޅުވިއެވެ.

ކުޑަކުދިންގެ ޢަދުލުގެ ނިޒާމަށް ހޭލުންތެރިކުރުމުގެ ގޮތުން ބޭއްވި މިމަސައްކަތު ބައްދަލުވުމުގައި ފުލުހުންނާއި ޕްރޮސެކިއުޓަރ ޖެނެރަލްގެ އޮފީހާއި ޑްރަގް ކޯޓާއި ނެޝެނަލް ޑްރަގް އެޖެންސީއާއި ޖުވެނައިލް ކޯޓާއި ޖުވެނައިލް ޖަސްޓިސް ޔުނިޓާއި މޯލްޑިވްސް ކަރެކްޝަނަލް ސަރވިސްގެ އިތުރުން 3 ސްކޫލެއް ހިމެނޭހެން ޖުމްލަ 31 ފަރާތަކުން ބައިވެރިވެފައިވެއެވެ. 2011ވަނަ އަހަރުން ފެށިގެން ކުރިއަށްގެންދާ މި ތަމްރީން ޕްރޮގްރާމް މެދުވެރިކޮށް މިހާތަނަށް 700އަށްވުރެ ގިނަ މީހުން ކުޑަކުދިންގެ ޢަދުލުގެ ނިޒާމަށް ހޭލުންތެރިކުރެވިފައިވާކަމަށް ޖުވެއިނަލް ޖަސްޓިސް ޔުނިޓުން މަޢުލޫމާތުދެއެވެ.