ވެސްޓް ޕާކު ސަރަހައްދުގައި ހުރި ގާޑިޔާތައް ނަގާ، އެ ސަރަހައްދުގެ މަގު ހެދުމަށް ނިންމާފައިވާކަމަށް މާލޭ ސިޓީ ކައުންސިލުން ވިދާޅުވެއްޖެއެވެ.
މާފަންނު ވެސްޓް ޕާކު ސަރަހައްދުގައި ހުރި ގާޑިޔާތަކާއި ވެހިކަލްތައް ނަގާ، މާލޭ ސިޓީ ކައުންސިލްގެ ފަރާތުން އެ ސަރަހައްދު މިހާރު ވަނީ ސާފުކޮށްފައެވެ. އެތަނުގައި ހުރި ގާޑިޔާތައް ނަގާފައިވަނީ ހެލްތް ޕްރޮޓެކްޝަން އެޖެންސީ، އެޗް.ޕީ.އޭއިން އެތަންތަނުގެ ހާލަތު ބަލާ ތައްޔާރުކޮށްފައިވާ ރިޕޯޓުގައި އެ ތަންތަނުގެ ސާފުތާހިރުކަން ކުޑަކަމަށް ބުނެފައިވާތީއެވެ.
އެގޮތުން އެ ސަރަހައްދުގައި 6 ފަރާތަކުން ހިންގަމުންދިޔަ ގާޑިޔާތައް ނަގާފައިވާއިރު، މީގެ ތެރެއިން ބައެއް ގާޑިޔާތަކަކީ ޤަވާއިދާ ޚިލާފަށް ހިންގަމުންދިޔަ ގާޑިޔާތަކެއްކަން ފާހަގަކުރެވިފައިވާކަމަށް ސިޓީ ކައުންސިލުން ވިދާޅުވެއެވެ. އަދި ގާޑިޔާތައް ނެގީ، ސާފުތާހިރުކަން ކުޑަކަމަށް ފާހަގަކުރެވުނު ގާޑިޔާތަކަށް އެކަންކަން އިސްލާޙުކުރުމަށް ނަސޭޙަތްދީ، ނޯޓިސްވެސް ދިނުމަށްފަހުކަމަށްވެސް މާލޭ ސިޓީ ކައުންސިލުން ވަނީ ވިދާޅުވެފައެވެ.
މާލޭ ސިޓީގެ ޑެޕިއުޓީ މޭޔަރ ޝަމާޢު ޝަރީފް ވިދާޅުވީ، ވެސްޓްޕާކު ސަރަހައްދުގައި ހުރި ގާޑިޔާތައް ނަގައި، އެ ސަރަހައްދު މިހާރު ހުސްކޮށްފައިވާއިރު، އެތަން ދެން ބޭނުންކުރާނެ ގޮތަކާމެދު އަދި ވަކި ގޮތެއް ކައުންސިލުން ނިންމާފައިނުވާކަމަށެވެ. ނަމަވެސް އެ ސަރަހައްދު ހިމެނޭހެން މާލޭގެ މަގުތައް ހެދުމުގެ މަޝްރޫޢެއް ވަރަށް އަވަހަށް ފެށުމަށް ތައްޔާރުވަމުންދާކަމަށް ޝަމާޢު ވިދާޅުވިއެވެ.
ވިޔަފާރި އުޞޫލުން މާލޭގެ އެކި ސަރަޙައްދުތަކުގައި ހިންގަމުންދާ ގާޑިޔާތަކަކީ އާއްމުންގެ މެދުގައި ބޮޑު މަގުބޫލުކަމެއް ހޯދާފައިވާ ތަންތަނެވެ. ދިވެހިންގެ މެދުގައި ގާޑިޔާތަކަށް ބޮޑު މަޤުބޫލުކަމެއް އޮތްނަމަވެސް، ބައެއް ގާޑިޔާތަކުގެ ސާފުތާހިރުކަން ކުޑަވުމާއި، ގިނަ އަދަދެއްގެ ބިދޭސީން މި މަސައްކަތުގައި ހަރަކާތްތެރިވަމުންދާކަމީ ބައެއް ފަރާތްތަކުން ކަންބޮޑުވުން ފާޅުކުރާ ކަމެކެވެ.
ގާޑިޔާގެ ވިޔަފާރި ކުރުމުގެ ހުއްދަ ސަރުކާރުން ދެނީ ދިވެހި އުފެއްދުންތަކަށް މާކެޓް ހޯދައިދީ، ދިވެހިންނަށް އާމްދަނީ ހޯދުމުގެ ފުރުޞަތު ފަހިކޮށްދިނުމުގެ މަޤުޞަދުގައިނަމަވެސް ހުއްދަދީފައިވާ މިންވަރަށްވުރެ އިތުރަށް ގާޑިޔާތައް ބެހެއްޓުމާއި، އެކަމުގެ ނާޖާއީޒް ފައިދާ ބައެއް ދިވެހިން ނަގައިގެން ބިދޭސީން ލައްވާ ބޮޑު ވިޔަފާރިއެއް ކުރާކަމުގެ ޝަކުވާ ސިޓީ ކައުންސިލަށް ލިބިފައިވާކަމަށް އެ ކައުންސިލުން ވިދާޅުވެއެވެ.
ވެސްޓްޕާކުގައި ހިންގަމުންދިޔަ ގާޑިޔާތައް ނަގާފައިވާއިރު، މިހާރު ގާޑިޔާތައް ހިންގަމުންދަނީ މަސްވެރިންގެ ޕާކާއި، އާ ސަހަރާ ފުރަގަހުން އޮންނަ މަގާއި، ވިލާކޮލެޖް ހިމެނޭ ސަރަޙައްދުގައެވެ.