ޤައިދީން ރިހެބިލިޓޭޓްކޮށް، ފައިދާހުރި ބައެއްގެ ގޮތުގައި އަނބުރާ މުޖުތަމަޢުއަށް ނެރުމުގައި ޖަލު އޮފިސަރުންގެ ދައުރު ބޮޑުކަމަށާ، ޖަލު އޮފިސަރުންނަށް ބޭނުންވާ ތަމްރީނުގެ ފުރުޞަތުތައް ވިހާވެސް ބޮޑަކަށް ފަހިވާންޖެހޭކަމަށް މިނިސްޓަރ އޮފް ހޯމް އެފެއާޒް އައްޝައިޚް އިމްރާން ޢަބްދުﷲ ވިދާޅުވެއްޖެއެވެ. މިނިސްޓާރ މިހެން ވިދާޅުވީ މޯލްޑިވްސް ކަރެކްޝަނަލް ސަރވިސްއާއި އިންޓަރނޭޝަނަލް ކޮމެޓީ އޮފް ދަ ރެޑްކްރޮސް (އައި.ސީ.އާރ.ސީ) ގުޅިގެން ޕްރިޒަން މެނޭޖަރުންނަށް ޚާއްސަކޮށްގެން ކުރިއަށްގެންދާ ވޯކްޝޮޕް ފަށްޓަވައިދެއްވާ ވާހަކަފުޅުދައްކަވަމުންނެވެ.
މޯލްޑިވްސް ކަރެކްޝަނަލް ސަރވިސްގެ ޖަލު މެނޭޖަރުންނަށް އަމާޒުކޮށްގެން ކުރިއަށްގެންދާ "މެނޭޖްމަންޓް ޓްރެއިނިންގ ފޯރ މިޑިލް މެނޭޖަރސް ވޯރކްޝޮޕް" ފަށްޓަވާދެއްވާ ވާހަކަފުޅުދައްކަވަމުން ހޯމް މިނިސްޓަރ އައްޝައިޚް އިމްރާން ޢަބްދުﷲ ވިދާޅުވީ މި ތަމްރީން ޕްރޮގްރާމަކީ ރާއްޖޭގެ ޖަލުތައް އިސްލާޙުކޮށް، އެތަންތަނުގެ ޚިދުމަތުގެ ފެންވަރު މަތިކުރުމަށް އަޅާ މުހިއްމު ފިޔަވަޅެއްކަމަށެވެ. އަދި ޖަލުތައް މެނޭޖްކުރުމަކީ ފަސޭހަކަމެއް ނޫންކަމަށާ، ޤައިދީންނާ މުޢާމަލާތުކުރުމުގައިވެސް ވަރަށް ކެތްތެރިވާންޖެހޭކަމަށެވެ.
މިއީވެސް އިޖްތިމާޢީ ޚިދުމަތެއްކަން ފާހަގަކުރައްވައި މިމަސައްކަތުގައި ތެދުވެރިކަމާއި އިޚްލާސްތެރިކަން އިސްކުރުމަށް ހުރިހާ އޮފިސަރުންނަށް މިނިސްޓަރ ގޮވާލެއްވެވިއެވެ. މިފަދަ ތަމްރީން ޕްރޮގްރާމްތައް ހިންގުމުގެ އެންމެ ބޮޑު ބޭނުމަކީ އިންސާނީ ކަރާމާތަށް ގެއްލުންނުވާނެހެން ޖަލުތަކުގެ ކަންކަން އިންތިޒާމްކުރުން ކަމަށް މިނިސްޓަރ އިމްރާން ވިދާޅުވިއެވެ.
"މިފަދަ ތަމްރީން ޕްރޮގްރާމްތައް ތަނަވަސްކޮށްދިނުމުގެ ބޭނުމަކީ ރާއްޖޭގެ ޖަލުތަކަކީ އިންސާނީ ކަރާމާތާއި އިއްޒަތް ނުގެއްލޭގޮތަށް ހިންގޭތަންތަންކަމުގައި ހެދުން. އެކިއެކި ސަބަބުތަކަށްޓަކާ ޖަލުގައި ބަންދުކުރަންޖެހޭ މީހުން މުޖުތަމަޢުއަށް ފައިދާހުރި ބައެއްގެ ގޮތުގައި ރިހެބިލިޓޭޓްކޮށްގެން ނެރެވޭ ބަޔަކަށް ހެދުން. އެގޮތުން ކަރެކްޝަނަލް ސަރވިސްގެ ދައުރު ފުރިހަމަގޮތުގައި މުޖުތަމަޢުއަށް ފޯރުކޮށްދިނުމަށް އެންމެ އުއްމީދާއެކު ކުރެވޭ މަސައްކަތަކީ ޕްރިޒަން އޮފިސަރުންނަށް ފުރިހަމަ ތަމްރީން ފޯރުކޮށްދިނުން." ހޯމް މިނިސްޓަރ ވިދާޅުވިއެވެ.
މިތަމްރީން ޕްރޮގްރާމާ ގުޅޭގޮތުން ވާހަކަފުޅުދައްކަވަމުން ކޮމިޝަނަރ އޮފް ޕްރިޒަންސް ޢަބްދުﷲ މުނާޒް ވިދާޅުވީ ކަރެކްޝަނަލް ސަރވިސްގެ ބެލުމުގެ ދަށުގައި ހުރި ޖަލުތަކުގައި މަސައްކަތްކުރާ އޮފިސަރުންނަކީ މަސައްކަތުގެ ފުރިހަމަ ތަމްރީނާއި ތަޖުރިބާ ލިބިފައިވާ ބަޔަކަށް ހެދުން އެއީ އެއިދާރާގެ މުހިއްމު އަމާޒެއްކަމަށެވެ. އަދި މިޕްރޮގްރާމުގައި ޤައިދީންނާއި މުޢާމަލާތްކުރުމާއި، ޖަލުގެ ކަންކަން ހިންގާ ބެލެހެއްޓުމުގައި އޮފިސަރުން ގެންގުޅެންޖެހޭ މިންގަނޑުތަކާއި ގުޅޭގޮތުން ބައިވެރިންނަށް މަޢުލޫމާތުދެވިގެންދާނެކަމަށްވެސް އޭނާ ވިދާޅުވިއެވެ.
މޯލްޑިވްސް ކަރެކްޝަނަލް ސަރވިސްއާއި އައި.ސީ.އާރ.ސީ ގުޅިގެން ކުރިއަށްގެންދާ މިތަމްރީން ޕްރޮގްރާމަކީ 5 ދުވަހުގެ މުއްދަތަކަށް ކުރިއަށްގެންދާ ޕްރޮގްރާމެކެވެ. މިޕްރޮގްރާމުގައި އެމް.ސީ.އެސްގެ ހެޑް ކުއަރޓާރޒް، މާލޭ ޖަލު، ހުޅުމާލޭ ޖަލު، އައްސޭރި ޖަލު، އަދި މާފުށީ ޖަލު ހިމެނޭހެން 24 ޕްރިޒަން މެނޭޖަރުން ބައިވެރިވެފައިވެއެވެ. މިތަމްރީން ޕްރޮގްރާމުގައި ސެޝަންތައް ނަގައިދޭނީ އައި.ސީ.އާރ.ސީގެ ފަންނީ ތަޖުރިބާކާރުންނެވެ.