ޓީޖެޓީ ސަރަޙައްދުގައި ތެޔޮ ބައުޒަރުތަކެއްގައި ރޯވެގެން ހިނގި ނުރައްކާތެރި އަލިފާނުގެ ޙާދިސާގައި ޖުމުލަ ނުވަ މީހަކަށް އެކިވަރުގެ ހާނީއްކަވެގެން ފަރުވާ ދީފައިވާކަމަށާއި، އޭގެ ތެރެއިން އެކަކަށް އައި.ސީ.ޔޫގައި ފަރުވާ ދެމުންދާކަމަށް އިންދިރާ ގާނދީ މެމޯރިއަލް ހޮސްޕިޓަލް، އައި.ޖީ.އެމް.އެޗުން ވިދާޅުވެއްޖެއެވެ.
މިއަލިފާނުގެ ޙާދިސާގައި 9 މީހަކަށް އައި.ޖީ.އެމް.އެޗުގައި ފަރުވާދީފައިވާއިރު، އޭގެ ތެރޭގައި 2 ބިދޭސީންނާއި 7 ދިވެހިން ހިމެނޭ. އަދި 2 މީހަކަށް ފަރުވާ ދިނުމަށްފަހު މިހާރު ދޫކޮށްލާފައިވާކަމަށާ، އެކަކަށް އައި.ސީ.ޔޫގައި ފަރުވާ ދެމުންދާކަމަށްވެސް އައި.ޖީ.އެމް.އެޗް ހޮސްޕިޓަލުން ވިދާޅުވެއެވެ. އައި.ސީ.ޔޫގައި ފަރުވާ ދެމުންދަނީ ދިވެއްސަކަށް ކަމަށާއި، އޭނާގެ ހަށިގަނޑުގެ ފަންސާސް އިންސައްތަ ފިހިފައިވާކަމަށް އެހޮސްޕިޓަލުން މަޢުލޫމާތުދެއްވައެވެ.
މީގެ އިތުރުން، މި ޙާދިސާއާއި ގުޅިގެން 2 މީހަކަށް އެޗް.ޑީ.ޔޫގައި، އަދި 4 މީހަކު ވޯޓުގައި އެޑްމިޓްކުރެވި އިތުރަށް ފަރުވާދެމުންދާކަމަށްވެސް އައި.ޖީ.އެމް.އެޗުން ވިދާޅުވެއެވެ. މިއަދު ހަވީރު ތިންގަޑި ސާޅީސް ހާއިރު ހިނގި މިޙާދިސާގައި، ފެރީ ލޯންޗެއްގެ އިތުރުން ޓީ ޖެޓީ ސަރަޙައްދުގައި އޮތް 4 ތެޔޮ ބައުޒަރެއް ވަނީ، ބޭނުން ނުކުރެވޭމިންވަރަށް އަނދާފައެވެ.