ރާއްޖޭގެ ޒުވާން ވިޔަފާރިވެރިންނަށް އަމާޒުކޮށްގެން ސާކް ޗެންބަރ އޮފް ކޮމާސް އެންޑް އިންޑަސްޓްރީގެ ފަރާތުން "ސްޓާޓްއަޕް ބޫޓް ކޭމްޕް"ގެ ނަމުގައި ވޯކްޝޮޕެއް ފަށައިފިއެވެ.
މި ވޯކްޝޮޕް ފަށްޓަވައިދެއްވީ ރާއްޖޭގެ އިކޮނޮމިކް މިނިސްޓަރ ފައްޔާޟު އިސްމާއިލްއެވެ. މި ވޯކްޝޮޕްގައި ރާއްޖޭގެ 30 ވިޔަފާރިވެރިން ވަނީ ބައިވެރިވެފައެވެ. މި ވޯކްޝޮޕް ކުރިއަށްދާނީ 3 ދުވަހުގެ ނިޔަލަށް މާގިރި ހޮޓެލްގައެވެ.
މި ވޯކްޝޮޕް ފެށުމުގެ ރަސްމިއްޔާތުގައި ވާހަކަދައްކަވަމުން ސާކް ޗެމްބަރ އޮފް ކޮމާސް އެންޑް އިންޑަސްޓްރީގެ ސެކްރެޓަރީ ޖެނެރަލް ހިނާ ސައީދު ވިދާޅުވީ، މި ސްޓާޓްއަޕް ބޫޓް ކޭމްޕްތަކުގެ މަޤްސަދަކީ ސާކް ސަރަހައްދުގައި ވިޔަފާރި ފަށަން ބޭނުންވާ ފަރާތްތަކަށާއި، ޒުވާން ވިޔަފާރިތަކަށް އެހީވުންކަމަށެވެ.
މި ވޯކްޝޮޕް ނިމިގެންދާއިރު ބައިވެރިންނަށް އެމީހުންގެ ވިޔަފާރީގައި ކުރިއަށްދާންވީ ގޮތް އެނގިގެންދާނެކަމަށް އުންމީދުކުރާކަމަށަށް ހިނާ ވިދާޅުވިއެވެ.
ސާކް ޗެމްބަރ އޮފް ކޮމާސް އެންޑް އިންޑަސްޓްރީގެ ފަރާތުން ސާކް ޤައުމުތަކުގެ ކުދި އަދި މެދުފަންތީގެ ވިޔަފާރިވެރިންނަށް އަމާޒުކޮށްގެން މިފަދަ ވޯކްޝޮޕްތައް އަންނަނީ އަބަދުވެސް ބާއްވަމުންނެވެ. އެގޮތުން މިއީ މިއަހަރު ސާކް ޗެމްބަރ އޮފް ކޮމާސްއިން ބާއްވާ 3 ވަނަ ވޯކްޝޮޕެވެ. މީގެ ކުރިން މި ވޯކްޝޮޕް ބާއްވާފައިވަނީ ބަންގްލަދޭޝް އަދި ނޭޕާލްގައެވެ. އަދި މިދިޔަ އަހަރު އިންޑިއާގައިވެސް މީގެ ވޯކްޝޮޕެއް ވަނީ ބާއްވާފައެވެ.