ޙާލުގައި ޖެހުނު ފަރާތްތަކަށް އެހީވުމަށް ހުޅުވި ފަންޑަށް އެއްލައްކައަށްވުރެ ގިނަ ރުފިޔާ ލިބިއްޖެ
މާލޭގައި ހިނގި ނުރައްކާތެރި އަލިފާނުގެ ޙާދިސާއާއި ގުޅިގެން ޙާލުގައި ޖެހުނު ޢާއިލާތަކަށް އެހީވުމަށް ނެޝެނަލް ޑިޒާސްޓަރ މެނޭޖްމަންޓް އޮތޯރިޓީ، އެން.ޑީ.އެމް.އޭއިން ޤާއިމުކުރި ރިލީފް ފަންޑަށް މިހާތަނަށް އެއްލައްކަ ފަންސާސް ހާހަށްވުރެ ގިނަ ރުފިޔާ ލިބިފައިވާކަމަށް އެ އޮތޯރިޓީއިން ވިދާޅުވެއްޖެއެވެ.
މިދިޔަ ހުކުރު ދުވަހު ހިނގި އަލިފާނުގެ ޙާދިސާގައި ޙާލުގައިޖެހުނު ފަރާތްތަކަށް އެހީތެރިކަން ފޯރުކޮށްދިނުމަށް ބޭނުންވާ ފަރާތްތަކަށް އެ ފުރުޞަތު ފަހިކޮށްދިނުމަށްޓަކައި "20 ސެޕްޓެމްބަރ މާލެ ފަޔަރ ރިލީފް އެކައުންޓް"ގެ ނަމުގައި ޚާއްސަ ރިލީފް އެކައުންޓެއް އެން.ޑީ.އެމް.އޭއިން ވަނީ ހުޅުވާފައެވެ. މި އެކައުންޓަށް މިހާތަނަށް އެއްލައްކަ ފަންސާސް އަށްހާސް ފަސް ސަތޭކަ ފަސް ރުފިޔާ ފަންސަވީސް ލާރި ލިބިފައިވާކަމަށް އެން.ޑީ.އެމް.އޭއިން ވިދާޅުވެއެވެ.
އެން.ޑީ.އެމް.އޭއިން ވިދާޅުވީ، މި ޙާދިސާއާއި ގުޅިގެން އެކި ގޮތްގޮތުން އެހީތެރިކަން ބޭނުންވެގެން ހަތް ސަތޭކަ ފަސްދޮޅަސް ހަ މީހުން ރަޖިސްޓްރީކޮށްފައިވާކަމަށެވެ. އޭގެ ތެރޭގައި ހަތަރު ސަތޭކަ ތިރީސް ހަތް ފިރިހެނުންނާއި، ތިން ސަތޭކަ ދުއިސައްތަ ނުވަ އަންހެނުން ހިމެނޭކަމަށާ، މި ޙާދިސާއާއި ގުޅިގެން ދުއިސައްތަ ފަސްދޮޅަސް ދެ މީހަކަށް ވަގުތީ ބޯހިޔާވަހިކަން ފޯރުކޮށްދީފައިވާކަމަށްވެސް އެ އޮތޯރިޓީން ވިދާޅުވެއެވެ.
އަލިފާނުގެ ޙާދިސާގައި ގެއްލުން ލިބުނު ފަރާތްތަކަށް ބޭނުންވާ އެހީތެރިކަން ފޯރުކޮށްދިނުމުގެ މަސައްކަތް އެން.ޑީ.އެމް.އޭއިން ކުރަމުންދާއިރު، އެފަރާތްތަކަށް ކެއުން ބުއިމަށް ބޭނުންވާ ސާމާނާއި، އަންނައުނު މިވަގުތަށް ބޭނުންވާ ވަރަށް ލިބިފައިވާކަމަށް އެ އޮތޯރިޓީން ވިދާޅުވެއެވެ.