ގަރާޖުތަކާއި ގުދަންތަކުގައި، ކުރަން ހުއްދަ ނަގާ މަސައްކަތް ނޫން އެހެން މަސައްކަތްތައް ކުރޭ - ސިފާ

ހުއްދަ ނަގާ މަސައްކަތްތައް ނޫން އެހެން މަސައްކަތްތައް ގަރާޖުތަކާއި ގުދަންފަދަ ތަންތަނުގައި ކުރާކަމަށް ސިޓީ ކައުންސިލަށް ފާހަގަވެފައިވާކަމަށް މަލޭ ސިޓީ ކައުންސިލްގެ މޭޔަރު ސިފާ މުޙައްމަދު ވިދާޅުވެއްޖެއެވެ.

މާލޭގައި ހިނގައިދިޔަ އަލިފާނުގެ ބޮޑު ޙާދިސާއާ، މާލެއަށް ދިމާވި ފެންބޮޑުވުމުގެ ޙާދިސާއާގުޅޭ މަޢުލޫމާތު ދިނުމަށް ބޭއްވި ނޫސްވެރިންގެ ބައްދަލުވުމުގައި މާލޭ ސިޓީ ކައުންސިލްގެ މޭޔަރު ސިފާ މުޙައްމަދު ވިދާޅުވީ ގުދަން ހެދުމަށް ސިޓީ ކައުންސިލުން ފުރަތަމަ ދެނީ ތިންމަހުގެ ވަގުތީ ހުއްދައެއްކަމަށެވެ. އަދި ގޭގޭގައި މިފަދަ ކަންކަން ކުރަން ހުއްދަ ދެނީ ގޭދެ ވެރި މީހާއަށްކަމަށް ސިފާވިދުޅިވިއެވެ. ސިފާ ވިދާޅުވީ ދާއިމީ ހުއްދަ ނުނގާ މިކަންކަން ކުރަމުންދާކަމަށާ، އެފަދަ ކަންކަން ހުއްޓުވުމަށް ސިޓީ ކައުންސިލުން މަސައްކަތްވެސް ކުރާކަމަށެވެ. އަދި ގޭގެ ވެރިމީހާ އެހެން މީހުންނަށް އެތަންތައް ކުއްޔައްދީ، އެފަދަ ތަންތަން ރަނގަޅަށް ބަލަހައްޓަމުން ނުދާ ކަންވެސް ފާހަގަވާކަމަށް ސިފާ ވިދާޅުވިއެވެ.

"ކާރެއް ބާއްވަން، ކެފޭއެއް ހަދަން، ސްޓޯރޭޖެއް ހަދަން ހުއްދަ ނަގަނީ. އެކަމަކު އެތާ ކުރަނީ އެހެން މަސައްކަތްތައް. ބޭސްފިހާރަ ހުޅުވަން އެބަ ބުނޭ 4 ފޫޓު ގޯޅީގައި. ކިހިނެތްތޯ ވެހިކަލްއަށްވެސް ނުވަދެވޭ ތަނަކުން ހުއްދަދޭނީ" ސިފާ ވިދާޅުވިއެވެ.

ސިފާ ވިދާޅުވީ ކަންކަން އެންމެ ރަނގަޅު ގޮތުގައި މޮނިޓަރ ކުރެވޭވަރަށް ސިޓީ ކައުންސިލުގައި ސުޕަވައިޒަރުންނާއި މުވައްޒަފުން ނެތް ކަމަށެވެ. އާބާދީ ބޮޑު މާލެ ބެލެހެއްޓުމަށް ސަރުކާރުގެ މުއައްސަސާތަކުގެ އިތުރު އެހީއާއި އެއްބާރުލުން ބޭނުންވާކަމަށް ސިފާ ވިދާޅުވިއެވެ.

"5 ސުޕަވައިޒަރުން ތިބީ. ކައުންސިލްގައި މާލީ މިނިވަން ކަމެއް ނެތް. ބަޖެޓެއް ނެތް. އަޅުގަނޑުމެން ބޭނުންވަނީ ސިޓީ ޕޮލިސް ތަޢާރަފްކޮށް ކަންކަން ގާތުން ބެލޭނެ ނިޒާމެއް ޤާއިމުކުރުން." ސިފާ ވިދާޅުވިއެވެ.

ސިފާ ވިދާޅުވީ މިފަދަ ގުދަންތައް ހުރި ތަންތަނާއި، އެތަންތާންގައި ބަހައްޓާފައި ހުރި ތަކެތި ބެލުމުގެ މަސައްކަތް، އެމްއެންޑީއެފާއި ގުޅިގެން މި ފެށޭ ހަފްތާގައި ފަށާނެކަމަށެވެ.

ސިޓީ ކައުންސިލުން ބޭއްވި ނޫސްވެރިންގެ ބައްދަލުވުމުގައި ވަނީ ވިއްސާރަގެ ސަބަބުން ލިބުނު ގެއްލުންތައްވެސް ހިއްސާކޮށްފައެވެ. ޑެޕިއުޓީ މޭޔަރ ޝަމާޢު ވިދާޅުވީ މޫސުމީ އެލަރޓް ނެރުމާއެކު ޕަމްޕުތައް ޗެކްކޮށް، ފެންބޮޑުވެ ހިނގާފާނެ ޙާދިސާއަކަށް ސިޓީ ކައުންސިލުން ތައްޔާރުވިކަމަށެވެ. ޝަމާޢު ވިދާޅުވީ 100އަށްވުރެ ގިނަ ގެއަށް ފެން ވަދެގެން އެހީދިންކަމަށެވެ.

"ފެން ވަދެގެން 27 ގެއެއްގެ އެސެސްމަންޓް ހެދުމަށްވަނީ ނިންމާފައި. ކިރިއާވެސް ގެއްލުމެއް ވި ގެއެއްވިޔާ ބަލާނަން. މާބޮޑު ގެއްލުންތަކެއް ވިއްސާރައިގައި ނުވެ." ސަމާއު ވިދާޅުވިއެވެ.

ސިޓީ ކައުންސިލުން ބުނެފައިވަނީ ކުރިއަށްވުރެ އިތުރަށް މާލެތެރެ ބެލެހެއްޓޭނެ އިންތިޒާމެއް ހަމަޖެއްސޭނެގޮތް ހަދާނެކަމަށެވެ. އަދި މިފަދަ ޙާދިސާ ހިނގައި، އެކަމަށް އެހީ ދިނުމަށް ލަސްވާ އެއްސަބަބުކަމަށްވާ މާލޭގެ ތޮއްޖެހުމުގެ މައްސަލައަށް ޙައްލުގެނައުމަށް މާލޭ ރީޑިވެލޮޕްމަންޓްގެ ތެރެއިން މަސައްކަތް ކުރާނެކަމަށެވެ.