ރާއްޖޭގެ ތައުލީމީ އިދާރާތަކުގެ ތަޖުރިބާކާރުންނަށް ޙާއްސަކޮށްގެން "ނެޝަނަލް ވޯކްޝޮޕް ފޮރ އައިސީޓީ އިން އެޑިއުކޭޝަން މަސްޓަރ ޕްޕޭން ޑިވޮލޮޕްމަންޓް" ނަމުގައި ތަމްރީނު ޕްރޮގްރާމެއް ފަށައިފިއެވެ.
ތަމްރީނު ޕްރޮގްރާމް ފެށުމުގެ ގޮތުން އާޒީ ބިލްޑިންގގައި ބޭއްވި ރަސްމިއްޔާތު ޗަރަފުވެރިކޮށްދެއްވާ ވާހަކަފުޅު ދައްކަވަމުން މިނިސްޓްރީ އޮފް ކޮމިއުނިކޭޝަން ސައިންސް އެންޑް ޓެކްނޮލޮޖީގެ ސްޓޭޓް މިނިސްޓްރ މުހަންމަދު އަފްސަލް އިބްރާހިމް ވިދާޅުވީ މަސައްކަތުގެ މައިދާނުގައި ތަޢުލީމީ ކަމަށް ގާބިލް ބޭފުޅުން ތިބުން މުހިންމު ކަމަށެވެ. އެގޮތުން ސަރުކާރުންވެސް އައިސީޓީ މެދުވެރިކޮށް ކުރިއެރުން ގެންނަން ގިނަ މަސައްކަތްތަކެއް ކުރައްވާ ކަމަށް އޭނާ ވިދާޅުވިއެވެ.
މިރަސްމިއްޔާތުގައި ވާހަކަ ދައްކަވަމުން އެޑިއުކޭޝަން ޑިވޮލޮޕްމަންޓް އޮފިސަރ ކޮޑިނޭޓަރ ޝަހުދާ ރިޒްވާން ވިދާޅުވީ މި މަސައްކަތު ބައްދަލުވުމަކީ ކުރިއަށްއޮތް ފަސްއަހަރު ތައުލީމީ ދާއިރާގައި އައިސީޓީ ބޭނުން ކުރާނެގޮތްތަކާއި ބެހޭގޮތުން މާސްޓަރ ޕްލޭންއެއް އެކުލަވާލުމުގެ ގޮތުން ކުރިއަށްގެންދެވޭ ވޯކްޝޮޕެއް ކަމަށެވެ. އެއާއެކު މި ވޯކްޝޮޕުގެ ސަަބަބުން ބައިވެރިންނަށާއި އެ އިދާރާތަކަށްވެސް ގިނަ ފައިދާތަކެއް ކުރާނެ ކަމަށެވެ.
ޔުނެސްކޯގެ އެހީއާއި އެކު ކުރިއަށްގެންދާ މި ވޯކްޝޮޕް ކުރިއަށްގެންދިއުމަށް ހަމަޖެހިފައިވަނީ 4 ދުވަހުގެ މުއްދަތަކަށެވެ. "ނެޝަނަލް ވޯކްޝޮޕް ފޮރ އައިސީޓީ އިން އެޑިއުކޭޝަން މަސްޓަރ ޕްޕޭން ޑިވޮލޮޕްމަންޓް" ޕްރޮގްރާމަކީ ގިނަ ބަޔަކަށް ފައިދާކުރާނެގޮތަކަށް ރާވާފައިވާ ތަމްރީނު ޕްރޮގްރާމެކެވެ. މިމަހުގެ 16ން 19 އަށް ކުރިއަށްދާ މި ތަމްރީނު ޕްރޮގްރާމުގައި ސްކޫލްތަކުގެ ޕްރިންސިޕަލުންނާއި ލީޑިގް ތީޗަރުންގެ އިތުރުން ޔުނިވަރސިޓީތަކުގެ ލެކްޗަރަރއިން ބައިވެރިވެއެވެ.