މިއަހަރުގެ މަސްވެރިންގެ ދުވަހުގެ ރަސްމިއްޔާތު ހުޅުމާލޭގައި ބޭއްވުމަށް ސަރުކާރުން ނިންމަވައިފިއެވެ.
މިނިސްޓްރީ އޮފް ފިޝަރީޒް މެރިން ރިސޯސަސް އެންޑް އެގްރިކަލްޗަރއިން ވިދާޅުވީ، މިއަހަރުގެ މަސްވެރިންގެ ދުވަސް ހުޅުމާލޭގައި ބޭއްވުމަށް ނިންމެވީ މަސްވެރިކަމުގެ ސިނާއަތުގައި ހަރަކާތްތެރިވާ ފަރާތްތަކާއިއެކު މަޝްވަރާކުރުމަށްފަހު މި ސިނާއަތުގައި ހަރަކާތްތެރިވާ ގިނަ ބަޔަކަށް ރަސްމިއްޔާތުގައި ބައިވެރިވުމުގެ ފުރުސަތު ދިނުމުގެ ގޮތުންކަމަށެވެ.
މަސްވެރިންގެ ދުވަހުގެ ގޮތުގައި ފާހަގަކުރަނީ ކޮންމެ އަހަރެއްގެ ޑިސެމްބަރ މަހުގެ 10 ވަނަ ދުވަހެވެ. މިއަހަރު ފާހަގަކުރަނީ 39 ވަނަ މަސްވެރިންގެ ދުވަހެވެ.
މަސްވެރިންގެ ދުވަހާއި ގުޅުވައިގެން މިއަހަރުވެސް ގިނަ ހަރަކާތްތަކެއް ކުރިއަށްގެންދިއުމަށް ވަނީ ހަމަޖެހިފައެވެ. އޭގެތެރޭގައި މަސްވެރިންނަށް ދިމާވާ މައްސަލަތައް ދެނެގަތުމަށް ބާއްވާ ފިޝަރީޒް ފޯރަމްއަކާއި ސްކޫލް ކުދިންނަށް ޙާއްސަކޮށްގެން ބާއްވާ ކުއިޒްއެއްގެ އިތުރުން އޯޝަން ޕްލާސްޓިކް އިވެންޓެއް ބޭއްވުމަށް ހަމަޖެހިފައިވާކަމަށް ފިޝަރީޒް މިނިސްޓްރީން ބުނެއެވެ.