ތޫފާން ޑޯރިއަންގެ ސަބަބުން ބަހަމާސްއަށް ލިބުނު ގެއްލުންތަކާއި ގުޅިގެން މިނިސްޓަރ އޮފް ފޮރިން އެފެއާޒް ޢަބްދުﷲ ޝާހިދު، އެޤައުމުގެ ފޮރިން މިނިސްޓަރ ޑެރެން އެލެން ހެންފިލްޑަށް ޙަމްދަރުދީގެ މެސެޖެއް ފޮނުއްވައިފިއެވެ.
މިނިސްޓަރ ޝާހިދުގެ މެސެޖްގައި ތޫފާން ޑޯރިއަން ބަހަމާއަށް އެރުމާ ގުޅިގެން ގިނަބައެއްގެ ފުރާނަ ގެއްލި، ބޮޑެތި ގެއްލުންތަކެއް ލިބުނު ޚަބަރު އެއްސެވީ ހިތާމަޔާއއެކުކަމަށް ވިދާޅުވެފައިވެއެވެ. އަދި ޤައުމީ ހިމާތައިގެ މި ދަނޑިވަޅުގައި ދިވެހި ސަރުކާރާއި ރައްޔިތުންނާއި އަދި އެމަނިކުފާނުގެ އަމިއްލަ ނަންފުޅުގައި ބަހަމާސްގެ ސަރުކާރާއި ރައްޔިތުންނަށް ތައުޒިޔާ ވިދާޅުވިއެވެ. އަދި ތޫފާނުގެ ސަބަބުން ލިބުނު ގެއްލުންތަކުން ވީހާވެސް އަވަހަކަށް އަރިގަނެވޭނެކަމަށް އުއްމީދުކުރައްވާކަމަށް މިނިސްޓަރ ޝާހިދު ވިދާޅުވިއެވެ.
މި ތޫފާނުގައި ވިއްސައްވުރެ ގިނަމީހުން މަރުވެ، ފަސްދޮޅަސް ހާސް މީހުންނަށް ކާނާއާއި ސާފު ބޯފެން ބޭނުންވެފައިވާކަމަށް މީޑިއާތަކުން ބުނެއެވެ. ތޫފާނުގެ ސަބަބުން ގިނަ ބައެއްގެ ގެދޮރުވެސްވަނީ ގެއްލިފައެވެ.