ރިޕޯޓްގައި ހުރި ސިއްރު ހެކިންގެ ނަންތައް އަދިވެސް އޮތީ ސިއްރު ހެކިންގެ ގޮތުގައި - ރައީސް ނަޝީދު
މަރާލާފައިވާ މިނިވަން ނޫހުގެ ނޫސްވެރިޔާ ޢަޙްމަދު ރިޟްވާންގެ މަރުގެ މައްސަލައިގެ ތަޙްޤީޤް ރިޕޯޓާމެދު މަޖިލީހުން ޢަމަލުކޮށްފައިވަނީ މިބާވަތުގެ އެހެން ރިޕޯޓްތަކާމެދުވެސް ޢަމަލުކުރާ އުސޫލުންކަމަށާއި، ރިޕޯޓްގައިވާ ސިއްރު ހެކިންގެ ނަންތައް އަދިވެސް އޮތީ ސިއްރުކަންމަތީކަމަށް ރައްޔިތުންގެ މަޖިލީހުގެ ރައީސް، ރައީސް މުޙައްމަދު ނަޝީދު ވިދާޅުވެއްޖެއެވެ. އެމަނިކުފާނު މިހެން ވިދާޅުވީ 19 ވަނަ ރައްޔިތުންގެ މަޖިލީހުގެ ފުރަތަމަ ދައުރު ނިންމާ މަޢުލޫމާތު ހާމަކުރުމަށް ބޭއްވި ޕްރެސްކޮންފަރެންސްގައެވެ.
ރިޟްވާންގެ މަރުގެ މައްސަލާގެ ތަޙްޤީޤް ރިޕޯޓް މަޖިލީހުގެ ޕާލިމަންޓްރީ ގްރޫޕްތަކުގެ ލީޑަރުންނާއި ހިއްސާކުރެއްވުމުން އަމާޒުވެފައިވާ ފާޑުކިއުންތަކަށް ރައްދުދެއްވަމުން ރައްޔިތުންގެ މަޖިލީހުގެ ރައީސް ނަޝީދު ވިދާޅުވީ، ތަހްޤީޤީ ރިޕޯޓް ލިބިވަޑައިގެންނެވިއިރު ސިއްރު ހެކިން ފާހަގަކޮށްފައިވާކަމަށާއި، އަދިވެސް ސިއްރު ހެކިންގެ ނަންތައް އޮތީ ސިއްރުކޮށްކަމަށް އެމަނިކުފާނު ވިދާޅުވިއެވެ. ރައީސް ނަޝީދު ވިދާޅުވީ ރިޕޯޓް ޢާންމުކުރުމަކީ އެންމެ ރަނގަޅުކަމެއްކަމަށް ދެކެވަޑައިގަންނަވާކަމަށާއި، އެ ރިޕޯޓް ޢާންމުކޮށްގެން ތަޙްޤީޤަށްވެސް އަދި ޝަރީޢަތަށްވެސް އެޅޭނެ އެއްވެސް ހުރަހެއް ނެތްކަމަށެވެ.
"ސިއްރު ހެކި ހުރީ ސިއްރު ހެކީގެ ގޮތުގައި. ކޮމިޝަންގެ ރައީސް ޙުސްނުއްސުޢޫދު އަޅުގަނޑަށް ރިޕޯޓް ދެއްވިއިރުވެސް ސިއްރު ހެކިހުރީ ސިއްރުހެކި އެކެއް، ސިއްރު ހެކި ދޭއް، ސިއްރު ހެކި ތިނެއް މި ދެންނެވިގޮތަށް. މި ރިޕޯޓް ޢާންމުކުރުން އެއީ ރައްޔިތުންނަށްވެސް ރަނގަޅަށް ކުރިކަމެއް." ރައީސް ނަޝީދު ވިދާޅުވިއެވެ.
މަޖިލީހުގެ ރައީސްގެ ވާހަކަފުޅުގައި ވަނީ ރިޟްވާންގެ ރިޕޯޓް ލިބިވަޑައިގަތުމުން މަޖިލީހުން ޢަމަލުކޮށްފައިވަނީ މިބާވަތުގެ އެހެން ރިޕޯޓްތަކާމެދު ތަޙްޒީބު އެހެން ޤައުމުތަކުގައިވެސް ޢަމަލުކުރާ އުސޫލުންކަމަށް ވިދާޅުވެފައެވެ.
"މިސާލަކަށް އީވާން ނަސީމުގެ މަރުގެ މައްސަލާގެ ރިޕޯޓުން ލިބުނު އެންމެ ބޮޑު ދެރަޔަކީ އެ ރިޕޯޓުން އެތައް ބައެއް އުނިކުރުން. ހަޤީޤީ ހޯދުންތަކަށް ރައްޔިތުން އިތުބާރުނުކުރެބުން. ހޫނުކަންމަތީ އެ ރިޕޯޓް ރައްޔިތުންނަށް ސާފުވީމަ ރައްޔިތުން އެ ރިޕޯޓް ޤަބޫލުކުރާނެ. މާބޮޑަށް އިތުބާރުހިފޭނެ." ރައީސް ނަޝީދު ވިދާޅުވިއެވެ.
ރައީސް ނަޝީދު ވަނީ ރިޟްވާންގެ މައްސަލާގައި އިހުމާލުވެފައިވާ ފުލުހުންގެ ފަސް އޮފިޝަލުންނަށް ފިޔަވަޅުއެލުމަށްވެސް ބާރުއަޅުއްވާ ވާހަކަފުޅު ދައްކަވާފައެވެ. ރައީސުލްޖުމްހޫރިއްޔާ އިބްރާހީމް މުޙައްމަދު ޞާލިޙްއަށް އެނގިވަޑައިނުގެން އެ ރިޕޯޓް މަޖިލީހުގެ މެންބަރުންނާއި ހިއްސާކުރެއްވިކަމަށް ދެކެވޭ ވާހަކަތައް ދޮގުކުރައްވާ ރައީސް ނަޝީދު ވިދާޅުވީ، އެމަނިކުފާނާއި ރައީސުލްޖުމްހޫރިއްޔާއާއި، ރިޔާސީ ކޮމިޝަނާއި މަޝްވަރާކުރައްވާފައިވާކަމަށެވެ.
ރައީސް ނަޝިދު ވަނީ މަޖިލިސް ޗުއްޓީގައި އޮންނަ ދުވަސްތަކުގައިވެސް މަޖިލީހުގެ ސަލާމަތީ ޚިދުމަތްތަކާއިބެހޭ ކޮމިޓީން މަރާލާފައިވާ މީހުންނާއި ގެއްލުވާލާފައިވާ މީހުންގެ މައްސަލަތައް ބަލާ ކޮމިޝަނާއެކު މަސައްކަތްތައް ކުރިއަށްދާނެކަން ފާހަގަކުރައްވާފައެވެ.