ދިވެހި އުފެއްދުންތެރިކަމުގެ ގައުމީ މައުރަޒު ނުވަތަ "ފަންނު އެކްސްޕޯ"އާ ބެހޭގޮތުން މައުލޫމާތު ދިނުމަށް މިމަހުގެ އެކި ދުވަސްތަކުގައި ގިނަ ހަރަކާތްތަކެއް ބޭއްވުމަށް ހަމަޖެހިފައިވާކަމަށް އިކޮނޮމިކް މިނިސްޓްރީން ބުނެފިއެވެ.
އިކޮނޮމިކް މިނިސްޓްރީން ބުނީ އެންމެ ފުރަތަމަ މައުލޫމާތުދިނުމުގެ ހަރަކާތް ކުރިއަށްދާނީ ހުކުރު ދުވަހު ހުޅުމާލޭގައިކަމަށެވެ. މި ހަރަކާތް ކުރިއަށްދާނީ ހުކުރު ދުވަހު ހަވީރު 4 އިން 6 އަށް ހުޅުމާލޭ ކޮމާޝަލް ސަރަހައްދުގައިކަމަށެވެ. މި ހަރަކާތުގައި ފަންނު އެކްސްޕޯއާ ގުޅޭގޮތުން މައުލޫމާތުދިނުމާއި، ފޯމު ބަލައިގަތުމާއި، ފޯމު ދޫކުރުން ކުރިއަށްދާނެއެވެ.
ހުޅުމާލޭގެ އިތުރުން މާލެއާއި އަތޮޅުތަކުގައިވެސް ފަންނު އެކްސްޕޯއާ ގުޅޭގޮތުން މައުލޫމާތު ދިނުމުގެ އެކި ހަރަކާތްތައް މިމަހުގެ ތެރޭގައި ކުރިއަށްދާނެއެވެ. މިއަހަރު ބޭއްވުމަށް ހަމަޖެހިފައިވާ ދިވެހި އުފެއްދުންތެރިކަމުގެ ގައުމީ މައުރަޒު ނުވަތަ "ފަންނު އެކްސްޕޯ" ބޭއްވުމަށް ހަމަޖެހިފައިވަނީ ނޮވެމްބަރ 22 އިން 28 ވަނަ ދުވަހުގެ ނިޔަލަށެވެ. އެކްސްޕޯގައި ބައިވެރިވުމުގެ ފުރުސަތު މިމަހުގެ ނިޔަލަށް ވަނީ ހުޅުވާލާފައެވެ.
މި އެކްސްޕޯއަށް ބޮޑު ތަރުހީބެއް ލިބެމުން އަންނަކަމަށް އިކޮނޮމިކް މިނިސްޓްރީން ބުނެއެވެ. އެގޮތުން މާލެއިން އެކަނިވެސް 100 އަށްވުރެ ގިނަ ފަރާތުން އެކްސްޕޯގައި ބައިވެރިވުމަށް ހުށަހަޅާފައިވާކަމަށް އިކޮނޮމިކް މިނިސްޓްރީން ބުނެފިއެވެ.
މައުރަޒުގައި ޖުމްލަ 6 ދާއިރާއަކުން ބައިވެރިވުމުގެ ފުރުސަތު އިކޮނޮމިކް މިނިސްޓްރީން ވަނީ ހުޅުވާލާފައެވެ.
ދާއިރާތަކުގެ ތެރޭގައި ވަކިވަކި ފަރުދުންގެ ދާއިރާއާއި ރަށު ފެންވަރުގައި ތަކެތި ބައިވެރިކުރުމުގެ ދާއިރާއާއި ވިޔަފާރިތަކުގެ ދާއިރާ ހިމެނެއެވެ. މީގެއިތުރުން ތަޢުލީމު ދޭ މަރުކަޒުތަކުގެ ދާއިރާއާއި، ޚާއްސަ އެހީއަށް ބޭނުންވާ ފަރާތްތަކުގެ ދާއިރާގެ އިތުރުން ކްލަބު ޖަމިއްޔާތަކުގެ ދާއިރާއިން ބައިވެރިވުމުގެ ފުރުސަތު ހިމެނެއެވެ.