ކަނޑުފަޅުގެ ދިރުންތައް ހިމާޔަތްކޮށް ރައްކާތެރިކުރުމަށް މިހާރަށްވުރެ ބޮޑަށް މަސައްކަތް ކުރާނަން - ރައީސް ޞާލިޙު

ރާއްޖޭގެ ކަނޑުފަޅުގެ ދިރުންތައް ހިމާޔަތްކޮށް، ކަނޑުގެ ސަރަޙައްދު ބެލެހެއްޓުން މިހާރަށްވުރެ ހަރުދަނާކުރުމަށް ގިނަ މަސައްކަތްތަކެއް ކުރައްވާނެކަމަށް ރައީސުލްޖުމްހޫރިއްޔާ އިބްރާހީމް މުޙައްމަދު ޞާލިޙު ވިދާޅުވެއްޖެއެވެ. އެމަނިކުފާނު މިހެން ވިދާޅުވެފައިވަނީ މިއަދު ރާއްޖޭގައި ފެށުނު އިންޑިއަން އޯޝަން ކޮންފަރެންސް، އައި.އޯ.ސީގެ 4 ވަނަ ބައްދަލުމުގައި ބައިވެރިވެވަޑައިގެން ދެއްކެވި ވާހަކަފުޅުގައެވެ.

ރައީސުލްޖުމްހޫރިއްޔާ އިބްރާހީމް މުޙައްމަދު ޞާލިޙު ވިދާޅުވީ، ކޮންމެ ޤައުމަކުންވެސް އެންމެ ބޮޑު އަހައްމިއްޔަތުކަމެއްދޭނީ އެ ޤައުމެއްގެ ރައްޔިތުންގެ ސަލާމަތާއި ރައްކާތެރިކަން ކަށަވަރުކުރުމަށް ކަމަށްވާއިރު، ޤައުމުތަކުގެ މެދުގައިހުރި އެއްގޮތް ކަންބޮޑުވުންތަކާމެދު މަޝްވަރާކޮށް، އަވަސް ހައްލެއް ހޯދުމަށް މިއީ ބޭނުންތެރި ކޮންފަރެންސަކަށް ވެގެންދާނެކަމަށެވެ. އެގޮތުން މިފަހަރުގެ ކޮންފަރެންސްގައި ޤައުމުތަކުގެ މެދުގައި އެންމެ ފުޅާ ދާއިރާއެއްގައި މަޝްވަރާކުރެވިގެންދާނެ 3 ދާއިރާއަކީ ދަތުރުފަތުރުގެ ރައްކާތެރިކަން ކަށަވަރުކުރުމާއި، ޓެރެރިޒަމާދެކޮޅަށް ޤައުމުތައް ގުޅިގެން މަސައްކަތްކުރުމާއި، ގުދުރަތީ ވަސީލަތްތައް ރައްކާތެރިކޮށް ދެމެހެއްޓުމާ ގުޅޭގޮތުންކަމަށް ރައީސް ވިދާޅުވިއެވެ.

ރައީސް ޞާލިޙު ވިދާޅުވީ، ގުދުރަތީގޮތުން ރާއްޖެ އުފެދިފައިވާގޮތުން، ކަނޑުފަޅުގެ ދިރުންތަކަކަކީ ދިވެހިންގެ އާއްމު ދިރިއުޅުމާ ވަރަށްބޮޑަށް ގުޅިލާމެހިފައިވާކަމެއްކަމުން، ދަތުރުފަތުރުގެ ރައްކާތެރިކަން ކަށަވަރުވެފައިއޮތުމަކީ ރާއްޖެފަދަ ޖަރީޒާ ޤައުމަކަށް ވަރަށް މުހިއްމުކަމެއްކަމަށެވެ. އެގޮތުން ރައްކާތެރިގޮތުގައި ދަތުރުފަތުރުކުރުމާއި، ވިޔަފާރީގެ މުޢާމަލާތްތަކާއި، އެއްތަނުން އަނެއްތަނަށް މުދާ އުފުލުމުގައި، ދުނިޔޭގެ ފެންވަރުގައި ހެދިފައިވާ ޤާނޫނުތަކާއި ޤަވާއިދުތަކަށް ރާއްޖެއިން އަބަދުވެސް އިޙްތިރާމްކުރާނެކަން އެމަނިކުފާނު ވިދާޅުވިއެވެ. ރައީސް ޞާލިޙު ވިދާޅުވީ، ރާއްޖޭގެ ކަނޑުފަޅުގެ ދިރުންތައް ހިމާޔަތްކޮށް، ކަނޑުގެ ސަރަޙައްދު ބެލެހެއްޓުމުގެ ކަންކަން މިހާރަށްވުރެ ބޮޑަށް ހަރުދަނާކުރާނެކަމަށެވެ.

"ރާއްޖޭގެ ކަނޑުގެ ސަރަހައްދު އެންމެ އެދެވޭގޮތެއްގައި ބެލެހެއްޓުމާއި، މަސްތުވާތަކެއްޗާއި، އިންސާނީ ވަގުފާރީގެ އަމަލުތައް ހުއްޓުވުވާ، ރާއްޖޭގެ ކަނޑުފަޅުގެ ދިރުންތަކުގެ ސްޓޮކް ބެލެހެއްޓުންވެސް މިހާރަށްވުރެ ހަރުދަނާގޮތެއްގައި ކުރިއަށްގެންދިއުމަށް ރާއްޖެއިން މިދަނީ މަސައްކަތްކުރަމުން. މެރިޓައިމްގެ ކަންކަމަށް މީހުން މިހާރަށްވުރެ ބޮޑަށް ހޭލުންތެރިކުރުވުމަށް މަސައްކަތްކުރާނަން. ސަރަޙައްދީ ޤައުމުތަކުގެ ސަލާމަތީ ބާރުތަކާ ގުޅިގެން ޕެޓްރޯލްކުރުމާއި ތަމްރީންތައް ގުޅިގެން ކުރިއަށްގެންދާނަން." ރައީސް ވިދާޅުވިއެވެ.

ޓެރެރިޒަމާއި ހައްދުފަހަނައެޅުން އެއީ މިހާރު މުޅި ދުނިޔެއަށްވެސް ކުރިމަތިވެފައިވާ އެންމެ ބޮޑު ނުރައްކާކަން ފާހަގަކުރައްވާ ރައީސް އިބްރާހީމް މުޙައްމަދު ޞާލިޙު ވިދާޅުވީ، އެތެރޭގެ ހަނގުރާމަތަކާއި، އެއް ޤައުމުން އަނެއް ޤައުމުގެ ކަންކަމާބެހުމާއި، އިޤްތިޞާދީ ހީނަރުކަންފަދަ މައްސަލަތަކަކީ މިހާރު އިންޑިއާ ކަނޑަށްވެސް ކުރިމަތިވެފައިވާ ބިރެއްކަމަށެވެ. ހަމައެހެންމެ ވަކި މަންފާއެއް ޙާޞިލުކުރުމަށްޓަކާ، އިންސާނިއްޔަތާ ޚިލާފު ކަންކަމުގައި ކުޑަކުދިންނާއި ޒުވާނުންގެ ބައިވެރިވުން އިތުރުކުރުމަށް ބަޔަކު އަޑީގައި ތިބެގެން މަސައްކަތްކުރާކަން، އެއީ މިހާރު ޤަބޫލުކުރަންޖެހިފައިވާ ހަޤީޤަތެއްކަމަށާއި، ލަންކާއަށް ދާދިފަހުން ދިން ޓެރެރިސްޓް ހަމަލާއަކީ އެކަމުގެ ހެއްކެއްކަމަށް ރައީސް ޞާލިޙު ވިދާޅުވިއެވެ. އެހެންކަމުން ޤައުމުތަކުގެ ބޯޑަރުތައް ބެލެހެއްޓުން މިހާރަށްވުރެ ޚަރުދަނާކޮށް، އިންޓެލިޖެންސްގެ ކަންކަން މިހާރަށްވުރެ ހަރުދަނާކުރުމަށް ޤައުމުތައް ގުޅިގެން މަސައްކަތް ކުރަންޖެހޭކަން ރައީސް ފާހަގަކުރެއްވިއެވެ.

"ޓެރެރިޒަމާއި ހައްދުފަހަނައެޅުން އެއީ މިހާރު މުޅި ދުނިޔެއަށްވެސް ކުރިމަތިވެފައިވާ އެންމެ ބޮޑު ބިރު. އެތެރޭގެ ހަނގުރާމަތަކާއި، އެއްގައުމުން އަނެއް ޤައުމުގެ ކަންކަމާބެހުމާއި، އިޤްތިޞާދީ ހީނަރުކަން އެއީ މިހާރު އިންޑިއާ ކަނޑަށްވެސް އޮތް ނުރައްކަލެއް. ހަމައެހެންމެ އަމިއްލަ ވަކި އެޖެންޑާއެއް ޕްރޮމޯޓްކޮށް، ފިކުރެއް ފެތުރުމުގެ ބޭނުމުގައި ބޮޑެތިވަމުން އަންނަ ކުދިންގެ ސިކުނޑިތައް ކާލާ ކަމީ މިއަދު ޤަބޫލުކުރަންޖެހޭ ހަޤީޤަތެއް. ލަންކާއަށް ދާދިފަހުން ދިން ޓެރެރިސްޓް ހަމަލާއިންވެސް މިކަން ވަރަށް ބޮޑަށް ހާމަވެގެން އެބަދޭ. ޤައުމުތަކުގެ ބޯޑަރުތައް މިހާރަށްވުރެ ހަރުދަނާކުރަންޖެހޭ. އަދި އެއް ޤައުމުން އަނެއް ޤައުމަށް މަޢުލޫމާތު ބަދަލުކުރުމުގެ ކަންކަންވެސް މިހާރަށްވުރެ ހަރުދަނާކުރަންޖެހޭ." ރައީސް ވިދާޅުވިއެވެ.

ރައީސުލްޖުމްހޫރިއްޔާ އިބްރާހީމް މުޙައްމަދު ޞާލިޙު ވިދާޅުވީ، އިންޑިއާ ކަނޑުގެ ސަލާމަތާ ރައްކާތެރިކަން ކަށަވަރުކޮށް، މި ސަރަޙައްދުގައި ސުލްހަ ޤާއިމުކުރުމަށް ރާއްޖެއިން އަބަދުވެސް ފުރިހަމަ އެހީތެރިކަމާއި އެއްބާރުލުންދޭނެ ކަމަށެވެ. އަދި ސަރަޙައްދީ ފެންވަރުގެ މިފަދަ މުހިއްމު ބައްދަލުވުމެއް ރާއްޖެއަށް ކޯ-ހޯސްޓްކުރަން ލިބުމަކީ ލިބުނު ބޮޑު އުފަލެއްކަމަށްވެސް އެމަނިކުފާނުގެ ވާހަކަފުޅުގައި ވިދާޅުވެފައިވެއެވެ.