ރާއްޖޭގެ ޑިމޮކްރަސީގެ ކަންކަން ކުރިއަރުވާ، އިޖްތިމާޢީ އަދި އިޤްތިޞާދީ ކަންކަން މިހާރަށްވުރެ ހަރުދަނާކުރުމުގައި ސްރިލަންކާ ސަރުކާރުގެ ފަރާތުން ފުރިހަމަ އެއްބާރުލުމާއި އެހީތެރިކަން ލިބިގެންދާނެކަމަށް އެ ޤައުމުގެ ބޮޑުވަޒީރު ރަނިލް ވިކްރަމަސިންހަ ވިދާޅުވެއްޖެއެވެ.
ސްރިލަންކާގެ ބޮޑުވަޒީރު ރަނިލް ވިކްރަމަސިންހައިގެ ދެކަނބަލުންގެ ޝަރަފުގައި ރައީސުލްޖުމްހޫރިއްޔާގެ ދެކަނބަލުން ކުރުނބާ މޯލްޑިވްސްގައި ބޭއްވި ޙާއްސަ ޖާފަތުގައި ވާހަކަފުޅުދައްކަވަމުން ސްރިލަންކާގެ ބޮޑުވަޒީރު ރަނިލް ވިކްރަމަސިންހަ ވަނީ، ރާއްޖެއާއި ލަންކާއާދެމެދު އުފެދިފައިވާ ޒަމާންވީ ގާތްގުޅުމުގެ މައްޗަށް އަލިއަޅުއްވާލައްވާފައެވެ. އެގޮތުން އަވަށްޓެރި ޤައުމެއްގެ ހައިސިއްޔަތުން ރާއްޖެއަށް އެކިގޮތްގޮތުން ބޭނުންވާ އެހީތެރިކަމާއި އެއްބާރުލުން ދެއްވުމަށް ލަންކާއިން އަބަދުވެސް ތައްޔާރަށް އޮންނާނެކަން އެމަނިކުފާނު ފާހަގަކުރެއްވިއެވެ. ލަންކާގެ ބޮޑުވަޒީރު ވިދާޅުވީ، ޓެރެރިޒަމްގެ ބިރާއި، ޑްރަގް ޓްރެފިކިންގގެ ބިރު އިންޑިއާ ކަނޑުގައިވެސް މިހާރު ބޮޑުވެފައިވާއިރު، ބައިނަލްއަޤްވާމީ މައިދާނުގައި ދެ ޤައުމު ގުޅިގެން މިހާރަށްވުރެ ބޮޑަށް މަސައްކަތްކުރަންޖެހޭކަމަށެވެ.
މި ޖާފަތުގައި ވާހަކަފުޅުދައްކަވަމުން ރައީސުލްޖުމްހޫރިއްޔާ އިބްރާހީމް މުޙައްމަދު ޞާލިޙު ދެއްކެވި ވާހަކަފުޅުގައި ރާއްޖޭގެ އިންސާނީ ވަސީލަތްތައް ތަރައްޤީކުރުމުގެ ދާއިރާއިން ލަންކާއިން ފޯރުކޮށްދެމުންދާ އެހީތެރިކަމާއި އެއްބާރުލުން ފާހަގަކުރައްވާ، އެކަމަށް ޝުކުރު އަދާކުރައްވާފައެވެ. އަދި ލަންކާގެ ބޮޑުވަޒީރުގެ މި ދަތުރުފުޅުގެ ތެރެއިން އެކި ދާއިރާތަކުން ވެވުނު އެއްބަސްވުންތަކާއެކު، ދިވެހިންނަށް ލަންކާއަށް ދަތުރުކުރުމުގައާއި، ލަންކާ ރައްޔިތުންނަށްވެސް ރާއްޖެއަށް ދަތުރުކުރުމުގައި ލުއިގޮތްތަކެއް ހަމަޖެހިގެންދާނެކަން ރައީސް ފާހަގަކުރެއްވިއެވެ. ރައީސް ޞާލިޙު ވިދާޅުވީ، ބައިނަލްއަޤްވާމީ މައިދާނުގައި ދެ ޤައުމުގެ މަސްލަހަތު ހިމެނޭ ކަންކަމުގައި ދެ ޤައުމު ގުޅިގެން މަސައްކަތް ކުރުމަށް ރާއްޖެއިން އަބަދުވެސް ތަރުހީބުދެއްވާނެކަމަށެވެ.
ސްރިލަންކާގެ ބޮޑުވަޒީރު ރަނިލް ވިކްރަމަސިންހައާއި އެމަނިކުފާނުގެ އަނބިކަނބަލުން ޕްރޮފެސަރ މައިތިރީ ވިކްރަމަސިންހަ ރާއްޖެއަށް ފައްޓަވާފައިވާ ދަތުރުފުޅުގެ ތެރެއިން ދެ ޤައުމުގެ ދެމެދު ރަސްމީ މަޝްވަރާތައް ބާއްވަވާފައިވާއިރު، 4 އެއްބަސްވުމެއްގައި ދެ ޤައުމުން ވަނީ ސޮއިކުރައްވާފައެވެ. ރާއްޖެއާއި ސްރީލަންކާއާއި ދެމެދު ޙާރިޖީ ގުޅުން ޤާއިމުކޮށްފައިވަނީ 1965 އަހަރެވެ.