މޯލްޑިވްސް އިސްލާމިކް ބޭންކުގެ ހިއްސާ ގަތުން ހުޅުވާލި ފުރުޞަތު މިމަހުގެ 18 ވަނަ ދުވަހު ހަމަވާނެއެވެ.
މޯލްޑިވްސް އިސްލާމިކް ބޭންކް، އެމްއައިބީގެ ހިއްސާ ވިއްކަން ފަށާފައިވަނީ ޖުލައިމަހުގެ 28 ވަނަ ދުވަހުއެވެ. މިއީ އެކުންފުނިން ހިއްސާ އާއްމުންނަށް ވިއްކަން ފެށި ފުރަތަމަ ފަހަރެވެ.
އިސްލާމިކް ބެންކުގެ ހިއްސާ އިންފިނިޓީ ޕޯޓަލް މެދުވެރިކޮށް، އަދި މާލޭގައި ހުންނަ އެ ކުންފުނީގެ އައިޕީއޯ ސެންޓަރުން ނުވަތަ ރަށްރަށުގައި ހުންނަ އެ ބޭންކުގެ ބްރާންޗްތަކުންވެސް ގަނެވޭނެއެވެ.
ހިއްސާ ވިއްކަން ހުޅުވާލުމާއިއެކު އާންމުންގެ ފަރާތުން ބޮޑު ތަރުހީބެއް ލިބެމުން އަންނަކަމަށް އެ ބެންކުން ބުނެއެވެ. މާލޭގެ އިތުރުން އަތޮޅުތަކުންވެސް ހިއްސާ ގަތުމަށް ބޮޑު ތަރުހީބެއް ލިބެމުން އަންނަކަމަށް އިސްލާމިކް ބެންކުން މައުލޫމާތުދެއެވެ.
އެމްއައިބީއިން މުޅިން އަލަށް ހިއްސާ ވިއްކަން ފަށާފައިވާއިރު ޖުމްލަ 6.9 މިލިއަން ހިއްސާ ވިއްކުމަށް ވަނީ ހަމަޖެހިފައެވެ. މިއީ ކުންފުނީގެ 31 އިންސައްތަ ހިއްސާއެވެ. އެމްއައިބީގެ ހިއްސާއެއް 35 ރުފިޔާއަށް ވިއްކާއިރު މަދުވެގެން ގަނެވޭނީ 20 ހިއްސާއެވެ. އެއީ ހިއްސާއަކަށް 35 ރުފިޔާގެ ރޭޓުންކަމަށްވާނަމަ 700 ރުފިޔާއެވެ. އަދި މިއަދަދު 10 ހިއްސާއިން ބޭނުންވާ އަދަދަކަށް އިތުރުކުރެވޭނެކަމަށް ވެސް އެމްއައިބީއިން މަޢުލޫމާތުދެއެވެ.