ތިމާވެއްޓާއި ރަޙުމަތްތެރި ގޮތަކަށް އެލައިޑުން "ގްރީން ފޯ ގުޑް"ގެ ނަމުގައި ޙާއްސަ އިނީޝިއޭޓިވްއެއް ލޯންޗްކޮށްފިއެވެ.
މި އިނީޝިއޭޓިވް ލޯންޗްކޮށްފައިވަނީ އަންސާނާ އިހުރުގައި ކުރިޔަށް ދިޔަ ޓެން ޓެން ޑައިވް އިވެންޓްގެ ތެރެއިންނެވެ. މި އިނީޝިއޭޓިވް ލޯންޗްކޮށްދެއްވީ ބަންޔަން ޓްރީ ގްރޫޕްގެ ސަސްޓެއިނަބިލިޓީ ޑިރެކްޓަރު އަދި ބަންޔަން ޓްރީ ގްލޯބަލް ފައުންޑޭޝަންގެ ކޯޑިނޭޓިން ޑިރެކްޓާރ ސްޓީވް ނިއުމަންއެވެ.
މި އިނީޝިއޭޓިވްގެ ދަށުން އެލައިޑުން މިފަހަރު ތައާރަފުކޮށްފައި ވަނީ ތިމާވެއްޓާ ރައްޓެހި ކޮތަޅާއި ފުޅި އަދި އޮފީސް މާހައުލުގައި ކަރަންޓާއި ކަރުދާސް ބޭނުންކުރާ މިންވަރު މަދުކުރުމާއި އޮފީސް މާހައުލަކީ ތިމާވެއްޓާއި ރައްޓެހި ތަނަކަށް ހެދުމަށް ކުރެވޭ މަސައްކަތްތައްކަމަށް އެލައިޑުން ބުނެއެވެ.
އެލައިޑް އިންޝުއަރަންސްގެ މެނޭޖިންގް ޑިރެކްޓަރު މުހައްމަދު ޝަފާޒު ވިދާޅުވީ "ގްރީން ފޯ ގުޑް" އަކީ ވަރަށް ފުޅާ ދާއިރާއެއްގައި ކުރިޔަށްގެންދިޔުމަށް ރާވާފައިވާ ޕްލޭނެއް ކަމަށާއި ގައުމަށާއި ރައްޔިތުން އަދި ވަށައިގެންވާ މާހައުލާއި ކަނޑުގެ ދިރުންތަކަށް ވެސް ރައްކާތެރިކަމާއި އަޅާލުން ކަށަވަރުކުރުމަށް ގިނަ ކަންތައްތަކެއް މުސްތަގުބަލުގައި ތައާރަފުވެގެންދާނެ ކަމަށެވެ. މިއީ އެލައިޑް އިންޝުއަރަންސް ކުންފުނީގެ އިޖްތިމާއީ ޒިންމާގެ މަސައްކަތްތައްކުރުމަށް ޓަކައި ބްރޭންޑް ކުރެވިފައިވާ ޕްރޮޖެކްޓެވެ.