ދިވެހި އުފެއްދުންތެރިކަމުގެ ގައުމީ މައުރަޒު ނުވަތަ "ފަންނު އެކްސްޕޯ"ގައި މާލެއިން އެކަނިވެސް 100 އަށްވުރެ ގިނަ ފަރާތުން ބައިވެރިވާން ހުށަހަޅާފައިވާކަމަށް އިކޮނޮމިކް މިނިސްޓްރީން ބުނެފިއެވެ.
ޕީއެސްއެމް ނިއުސްއަށް މައުލޫމާތުދެއްވަމުން އިކޮނޮމިކް މިނިސްޓްރީން ބުނީ، ފަންނު އެކްސްޕޯއަށް ބޮޑު ތަރުހީބެއް ލިބެމުން އަންނަކަމަށެވެ. އަތޮޅުތެރެއިންނާއި، މާލެއިންވެސް މި އެކްސްޕޯއަށް މިހާތަނަށް ބޮޑު ތަރުހީބެއް ލިބެމުންއަންނަކަމަށާއި، މާލެއިން އެކަނިވެސް 100 އަށްވުރެ ގިނަ ފަރާތުން މި އެކްސްޕޯގައި ބައިވެރިވުމަށް ހުށަހަޅާފައިވާކަމަށް އެ މިނިސްޓްރީން ބުނެއެވެ.
މާލެއިން ބައިވެރިވާ ފަރާތްތަކުން ފޯމު ހުށައަޅަންޖެހޭނީ އިކޮނޮމިކް މިނިސްޓްރީއަށެވެ. އަތޮޅުތަކުންނަމަ ބިޒްނަސް ސެންޓަރުތަކުގެ އިތުރުން އަތޮޅު ކައުންސިލްތަކަށްވެސް ފޯމު ހުށައެޅޭނެއެވެ.
އިކޮނޮމިކް މިނިސްޓްރީން ބުނީ މި މައުރަޒުގެ މައިގަނޑު މަޤްޞަދަކީ ދިވެހި ރާއްޖޭގެ އިޤްތިޞާދުގައި ޙިއްޞާކުރާ ސިނާއަތްތަކަށް ބޭނުންވާ ދިވެހި އުފެއްދުންތައް މާކެޓަށް ނެރެ، އެފަދަ އުފެއްދުންތަކަށް އެކަށީގެންވާ މާކެޓެއް ހޯދައިދީ، ދިވެހި އުފެއްދުންތައް ކުރިއެރުވުންކަމަށެވެ. މީގެ އިތުރުން ރާއްޖެއަށް ޒިޔާރަތްކުރާ ފަތުރުވެރިންނާއި، އާއްމުންނަށް އެއްތަނަކުން ދިވެހި އުފެއްދުންތައް ފެނިގެންދާނެ މާހައުލެއް ޤާއިމްކޮށްދީ، ނެތެމުންދާ ދިވެހި އުފެއްދުންތަކާއި އަދި މާކެޓަށް އަލަށް ނެރެވޭ އުފެއްދުންތައް ކުރިއެރުވުމަށް ހިއްވަރުދީ، ދިވެހި މަސައްކަތްތެރިން ކުރިއެރުވުމަށް އިތުރު ފުރުޞަތުތައް ހޯދައިދިނުންކަމަށް އިކޮނޮމިކް މިނިސްޓްރީން ބުނެއެވެ.
މައުރަޒުގައި ޖުމްލަ 6 ދާއިރާއަކުން ބައިވެރިވުމުގެ ފުރުސަތު އިކޮނޮމިކް މިނިސްޓްރީން ވަނީ ހުޅުވާލާފައެވެ. ދާއިރާތަކުގެ ތެރޭގައި ވަކިވަކި ފަރުދުންގެ ދާއިރާއާއި ރަށު ފެންވަރުގައި ތަކެތި ބައިވެރިކުރުމުގެ ދާއިރާއާއި ވިޔަފާރިތަކުގެ ދާއިރާ ހިމެނެއެވެ. މީގެއިތުރުން ތަޢުލީމު ދޭ މަރުކަޒުތަކުގެ ދާއިރާއާއި، ޚާއްސަ އެހީއަށް ބޭނުންވާ ފަރާތްތަކުގެ ދާއިރާގެ އިތުރުން ކްލަބު ޖަމިއްޔާތަކުގެ ދާއިރާއިން ބައިވެރިވުމުގެ ފުރުސަތު ހިމެނެއެވެ.
މި މައުރަޒުގައި 2 ގޮތަކަށް ބައިވެރިވެވޭނެއެވެ. އޭގެތެރޭގައި ވާދަކުރުމުގެ ބައިންނާއި ޑިސްޕްލޭ ކުރުން ނުވަތަ ވިއްކުމުގެ ބައިންވެސް ބައިވެރިވެވޭނެކަމަށް އިކޮނޮމިކް މިނިސްޓްރީން ބުނެއެވެ. މި އެކްސްޕޯގައި ބައިވެރިވާ އުފެއްދުންތެރިންނަށް މުސްތަޤްބަލުގައި ރާއްޖެއިން ބޭރުގައި އޮންނަ މިފަދަ ފެއަރތަކުގައި އެ ފަރާތްތަކުގެ އުފެއްދުންތައް ބައިވެރިކުރުމުގެ ފުރުސަތުތައް ހޯދައިދޭނެކަމަށް މިނިސްޓްރީން މައުލޫމާތުދެއެވެ.
މިއަހަރު ބޭއްވުމަށް ހަމަޖެހިފައިވާ ދިވެހި އުފެއްދުންތެރިކަމުގެ ގައުމީ މައުރަޒު ނުވަތަ "ފަންނު އެކްސްޕޯ" ބޭއްވުމަށް ހަމަޖެހިފައިވަނީ ނޮވެމްބަރ 22 އިން 28ގެ ނިޔަލަށެވެ. އެކްސްޕޯގައި ބައިވެރިވުމުގެ ފުރުސަތު ސެޕްޓެމްބަރުމަހުގެ ނިޔަލަށް ވަނީ ހުޅުވާލާފައެވެ.