މިހާރު ރާއްޖެއަށް ކުރަމުންގެންދާ ވިއްސާރައާއި ގުޅިގެން ފާފު އަތޮޅާއި އައްޑު އަތޮޅާއި ދެމެދަށް ރީނދޫ އެލާޓް ނެރެފިއެވެ.ރީނދޫ އެލާޓަކީ މޫސުން ގޯސްވުމުގެ ސަބަބުން ތައްޔާރީ ހާލަތުގައި ތިބުމަށް ނެރޭ އެލާޓެކެވެ.މޫސުމާއި ބެހޭ ގައުމީ އިދާރާއިން މައުލޫމާތުދޭ ގޮތުގައި، ހުޅަނގު މޫސުމުގެ ބާރުގަދަވެ ރާއްޖޭގެ އެކި ހިސާބަށް ކުރަމުންދާ ވިއްސާރާގައި ފާފު އަތޮޅާއި އައްޑު އަތޮޅާއި ދެމެދުގެ އަތޮޅުތަކަށް ހެނދުނު އަށަކުން ބާރަ ޖެހުމާއި ދޭތެރޭ ގުގުރުމާއިއެކު ބޯކޮށް ވާރޭވެހޭނެކަމަށެވެ. އެހެންކަމުން ޚާއްސަކޮށް މިސަރަހައްދުތަކުގައި މޫސުމަށް ވަރަށް ބޮޑަށް ސަމާލުވުމަށް އެއިދާރާއިން އިލްތިމާސްކުރެއެވެ.މީގެ އިތުރުން މެދު ރާއްޖެތެރެއާއި، ދެކުނުގެ އަތޮޅުތަކަށްވެސް ގުގުރުމާއި އެކު ވިއްސާރަކުރާނެކަމަށްމޫސުމާއި ބެހޭ އިދާރާއިންވަނީ ހާމަކޮށްފައެވެ. އަދި އެސަރަހައްދުތަކުގައި 13 މޭލާއި 23 މޭލާއި ދެމެދު ބާރުމިނުގައި ވައި ޖެހޭނެކަމަށާއި، ވިލާގަނޑުގައި 45 މޭލަށް ވައިގަދަވާނެކަމަށްވެސް އެ އިދާރާއިން ހާމަކުރެއެވެ. އަދި އުތުރުގެ ހިސާބުތަކަށްވެސް ވިއްސާރަކުރާނެކަމަށާއި، ވިލާގަނޑުގައި އެސަރަހައްދުތަކަށްވެސް އާދައިގެވަރަށް ގަދަވާނެކަމަށްވެސް އެއިދާރާއިން ވަނީ ހާމަކޮސްފައެވެ.އެހެންކަމުން ރާއްޖޭގެ ހުރިހާ ސަރަހައްދުތަކުންވެސް މޫސުމަށް ސަމާލުވުމަށް އެއިދާރާއިން އިލްތިމާސްކުރެއެވެ.މީގެ އިތުރުން މޫސުން ގޯސް ވުމުގެ ސަބަބުން، މިއަދުގެ ވަގުތެއްގައި މާލެއަތޮޅު ޒިޔާރަތްފުށީ ކައިރިން ލަކުޑި ހިފައިގެން ދިޔަ ދޯންޏެއް އަޑިއަށް ދިއުމުގެ ސަބަބުން އެ ސަރަހައްދުގައި ސިފައިން ހަރަކާތްތެރިވަމުންދާކަމަަށްވެސް އެމްއެންޑީއެފުންވަނީ ބުނެފައެވެ. މިކަމާއި ގުލޭ އިތުރު ތަފްސީލެއް އަދި ލިބިފައެއްނުވެއެވެ.